മൊബൈൽ ആക്‌സസറി കടകളിൽ വ്യാപക പരിശോധന : നിരവധി വ്യാജ ഇലക്ട്രോണിക് ഉൽപ്പന്നങ്ങൾ പിടിച്ചെടുത്തു

കുവൈറ്റ് സിറ്റി: വാണിജ്യ-വ്യവസായ മന്ത്രാലയത്തിന്റെ നേതൃത്വത്തിലുള്ള സംഘങ്ങൾ മൊബൈൽ ഫോൺ അനുബന്ധ ഉപകരണങ്ങൾ വിൽക്കുന്ന വിവിധ കടകളിൽ നടത്തിയ പരിശോധനയിൽ ഏകദേശം 1,625 വ്യാജ ഇലക്ട്രോണിക് ഉൽപ്പന്നങ്ങൾ പിടിച്ചെടുത്തു. വ്യാപാര തട്ടിപ്പുകൾ തടയുന്നതിനും ഉപഭോക്തൃ അവകാശങ്ങൾ സംരക്ഷിക്കുന്നതിനുമുള്ള മന്ത്രാലയത്തിന്റെ തുടർനടപടികളുടെ ഭാഗമായാണ് ഈ നീക്കം.

പിടിച്ചെടുത്ത ഉൽപ്പന്നങ്ങളിൽ പ്രമുഖ അന്താരാഷ്ട്ര ബ്രാൻഡുകളുടെ വ്യാജ ലോഗോകളും വ്യാപാരമുദ്രകളും പതിച്ച ഇയർഫോണുകൾ, ചാർജിംഗ് കേബിളുകൾ, മറ്റ് ആക്‌സസറികൾ എന്നിവ ഉൾപ്പെടുന്നു. ഇത് ബൗദ്ധിക സ്വത്തവകാശ സംരക്ഷണ നിയമങ്ങളുടെ നേരിട്ടുള്ള ലംഘനമാണെന്ന് ഔദ്യോഗിക വൃത്തങ്ങൾ അറിയിച്ചു. നിയമലംഘനം നടത്തിയ സ്ഥാപനങ്ങൾക്കെതിരെ കേസുകൾ രജിസ്റ്റർ ചെയ്യുകയും ആവശ്യമായ നിയമനടപടികൾ ആരംഭിക്കുകയും ചെയ്തിട്ടുണ്ട്. കേസ് തുടർനടപടികൾക്കായി ബന്ധപ്പെട്ട അധികാരികൾക്ക് കൈമാറാനുള്ള ഒരുക്കങ്ങൾ പുരോഗമിക്കുകയാണ്.

ഉപഭോക്താക്കളുടെ സുരക്ഷയ്ക്ക് ഹാനികരമാവുകയോ യഥാർത്ഥ ബ്രാൻഡുകളുടെ വിശ്വാസ്യതയെ ബാധിക്കുകയോ ചെയ്യുന്ന എല്ലാത്തരം വ്യാപാര തട്ടിപ്പുകളെയും ശക്തമായി നേരിടുമെന്ന് അധികൃതർ വ്യക്തമാക്കി.

രാജ്യത്തുടനീളമുള്ള വിപണികളിലും ഷോപ്പിംഗ് സെന്ററുകളിലും കർശനമായ പരിശോധനാ കാമ്പയിനുകൾ തുടരുമെന്ന് മന്ത്രാലയം ആവർത്തിച്ച് വ്യക്തമാക്കി. എല്ലാ വാണിജ്യ സ്ഥാപനങ്ങളും ഉപഭോക്തൃ സംരക്ഷണ നിയമങ്ങളും ബൗദ്ധിക സ്വത്തവകാശ ചട്ടങ്ങളും പാലിക്കുന്നുണ്ടെന്ന് ഉറപ്പാക്കുകയാണ് ഇതിലൂടെ ലക്ഷ്യമിടുന്നത്.