ജൂൺ 7 മുതൽ കുവൈറ്റ് കൊടും വേനലിലേക്ക് ; കടുത്ത ചൂടും പൊടിക്കാറ്റും ; ‘തുരയ്യ’ സീസൺ ആരംഭിക്കുന്നു

കുവൈറ്റ് സിറ്റി: കുവൈറ്റിൽ വരും ദിവസങ്ങളിൽ ചൂടും ശക്തമായ പൊടിക്കാറ്റും വർധിക്കുമെന്ന് കാലാവസ്ഥാ നിരീക്ഷകർ. ജൂൺ 7 മുതൽ രാജ്യത്ത് കടുത്ത വേനലിന്റെയും പൊടിക്കാറ്റിന്റെയും ആഗമനം കുറിക്കുന്ന ‘തുരയ്യ’ (Thuraya) സീസൺ ആരംഭിക്കുന്നതായി അൽ-ഉജൈരി സയന്റിഫിക് സെന്ററിനെ ഉദ്ധരിച്ച് പ്രാദേശിക പത്രം റിപ്പോർട്ട് ചെയ്തു. 13 ദിവസം നീണ്ടുനിൽക്കുന്ന ഈ സീസണിൽ താപനിലയിൽ ഗണ്യമായ വർധനവുണ്ടാകും.

ആകാശത്ത് പ്ലേയാഡീസ് (Pleiades) അഥവാ ‘തുരയ്യ’ നക്ഷത്രക്കൂട്ടം പ്രത്യക്ഷപ്പെടുന്ന കാലയളവാണിത്. അറബ് ജ്യോതിശാസ്ത്രത്തിൽ ഏറെ പ്രാധാന്യമുള്ള ഈ നക്ഷത്രസമൂഹം ജൂൺ 19 വരെ രാത്രികാലങ്ങളിൽ കിഴക്കൻ ചക്രവാളത്തിൽ ദൃശ്യമാകും.

ഈ സീസണിന്റെ തുടക്കത്തോടെ മേഖലയിൽ ‘ബവാരിഹ്’ (Bawareh) കാറ്റുകൾ ശക്തമാകും. ഇത് അന്തരീക്ഷത്തിൽ വൻതോതിൽ പൊടിയുയരാനും കാഴ്ചപരിധി കുറയാനും കാരണമാകുമെന്ന് അൽ-ഉജൈരി സെന്റർ മുന്നറിയിപ്പ് നൽകുന്നു. കടുത്ത ചൂടും വരണ്ട കാലാവസ്ഥയും നിറഞ്ഞ, വേനൽക്കാലത്തിന്റെ ഏറ്റവും തീവ്രമായ ‘മുറബ്ബഅനിയ്യത്തുൽ ഖൈള്’ (Murabba’aniyat Al-Qaydh) ഘട്ടത്തിലേക്കാണ് ഇതോടെ കുവൈറ്റും മറ്റ് ഗൾഫ് രാജ്യങ്ങളും പ്രവേശിക്കുന്നത്.

സൂര്യൻ അതിന്റെ ഏറ്റവും വടക്കേ അറ്റത്തുകൂടി ഉദിച്ചുയരുകയും അസ്തമിക്കുകയും ചെയ്യുന്ന പ്രതിഭാസവും ഈ സമയത്താണ് സംഭവിക്കുന്നത്. വടക്കുപടിഞ്ഞാറൻ ദിശയിൽ നിന്ന് വീശുന്ന ശക്തമായ കാറ്റ് അന്തരീക്ഷത്തിൽ മണൽത്തരികൾ നിറയ്ക്കും. വേനൽക്കാലത്തെ ഏറ്റവും ഉയർന്ന താപനില രേഖപ്പെടുത്തുന്ന ഈ ഘട്ടത്തിൽ പകൽ സമയങ്ങളിൽ കടുത്ത ചൂടാണ് അനുഭവപ്പെടുക. അന്തരീക്ഷത്തിലെ കടുത്ത ചൂടും ശക്തമായ കാറ്റും പൊടിയും സമന്വയിക്കുന്ന ഈ കാലാവസ്ഥാ വ്യതിയാനം വരും ദിവസങ്ങളിൽ ജനജീവിതത്തെ സ്വാധീനിച്ചേക്കാം.