കുവൈറ്റിൻ്റെ വിദേശനാണ്യ കരുതൽ ശേഖരത്തിൽ ജൂണിൽ 3.84 ശതമാനം ഇടിവ് രേഖപ്പെടുത്തി

ന്യൂസ് ബ്യൂറോ, കുവൈറ്റ്

കുവൈറ്റ് സിറ്റി : കുവൈറ്റിൻ്റെ വിദേശനാണ്യ കരുതൽ ശേഖരം 2023 ജൂണിൽ 3.84% കുറഞ്ഞു, മെയ് മാസത്തിൽ 13.98 ബില്യൺ ദിനാറിൽ നിന്ന് ജൂണിൽ 13.44 ബില്യൺ ദിനാറായി എത്തിയതായി  പ്രാദേശിക ദിനപത്രം റിപ്പോർട്ട് ചെയ്തു. കുവൈറ്റ് സെൻട്രൽ ബാങ്കിലെ മൊത്തം കാഷ് ബാലൻസുകൾ, അക്കൗണ്ടുകൾ, ബോണ്ടുകൾ, നിക്ഷേപ സർട്ടിഫിക്കറ്റുകൾ, ട്രഷറി ബില്ലുകൾ, വിദേശ കറൻസി നിക്ഷേപങ്ങൾ എന്നിവയാണ് രാജ്യത്തിന്റെ വിദേശ നാണയ ശേഖരം.

    വേൾഡ് ഗോൾഡ് കൗൺസിലിന്റെ കണക്കനുസരിച്ച് കുവൈറ്റിന്റെ സ്വർണ ശേഖരം 79 ടണ്ണായി തുടരുന്നു. 31.7 ദശലക്ഷം ദിനാർ ആണ് ഇത്രയും സ്വർണത്തിന്റെ  മൂല്യം, അത് വാങ്ങുന്ന സമയത്തെ വിലയെ അടിസ്ഥാനമാക്കിയുള്ളതാണ്.

കൂടാതെ, സെൻട്രൽ ബാങ്ക് ഓഫ് കുവൈറ്റിന്റെ പ്രതിമാസ ബുള്ളറ്റിൻ പ്രകാരം മൊത്തം ആസ്തി 13.808 ബില്യൺ ദിനാറിലെത്തിയതായും റിപ്പോർട്ട് സൂചിപ്പിക്കുന്നു.