സർക്കാർ-സ്വകാര്യ മേഖലകളിലെ ജീവനക്കാർ ഓഗസ്റ്റ് 27 ന് മുൻപ് വിദ്യാഭ്യാസ യോഗ്യതകൾ അപ്‌ഡേറ്റ് ചെയ്യണം : കുവൈറ്റ് വാർത്താവിതരണ മന്ത്രാലയം

കുവൈറ്റ് സിറ്റി: കുവൈറ്റ് വാർത്താവിതരണ മന്ത്രാലയത്തിൽ (Ministry of Information) ജോലി ചെയ്യുന്ന ജീവനക്കാർ തങ്ങളുടെ വിദ്യാഭ്യാസ യോഗ്യതകളും അനുബന്ധ രേഖകളും മന്ത്രാലയത്തിന്റെ ഇലക്ട്രോണിക് സംവിധാനം വഴി ഉടൻ അപ്‌ഡേറ്റ് ചെയ്യണമെന്ന് അധികൃതർ ഓർമ്മിപ്പിച്ചു. മന്ത്രാലയം പുറപ്പെടുവിച്ച അഡ്മിനിസ്ട്രേറ്റീവ് സർക്കുലർ നമ്പർ 2026/25 പ്രകാരം, വിവരങ്ങൾ പുതുക്കുന്നതിനുള്ള അവസാന തീയതി 2026 ഓഗസ്റ്റ് 27 വ്യാഴാഴ്ച പ്രവൃത്തി സമയം അവസാനിക്കുന്നത് വരെയാണ്.

നിർദിഷ്ട സമയപരിധിക്കുള്ളിൽ യോഗ്യതാ വിവരങ്ങളും രേഖകളും സമർപ്പിക്കാത്ത ജീവനക്കാർക്ക് അതിന്റെ പൂർണ്ണ ഉത്തരവാദിത്തം ഉണ്ടായിരിക്കുമെന്ന് മന്ത്രാലയം മുന്നറിയിപ്പ് നൽകി. വീഴ്ച വരുത്തുന്നവർക്കെതിരെ സിവിൽ സർവീസ് കമ്മീഷന്റെ ചട്ടങ്ങൾക്കും തീരുമാനങ്ങൾക്കും വിധേയമായി ആവശ്യമായ നിയമപരവും ഭരണപരവുമായ നടപടികൾ സ്വീകരിക്കും.

സർക്കാർ-സ്വകാര്യ മേഖലകളിലെ ജീവനക്കാരുടെ അക്കാദമിക് സർട്ടിഫിക്കറ്റുകൾ പരിശോധിക്കുന്നതിനുള്ള പ്രത്യേക സമിതിയുടെ പ്രവർത്തനങ്ങളുടെ ഭാഗമായാണ് ഈ നടപടി. രാജ്യത്തെ സ്വദേശികളും വിദേശികളുമായ എല്ലാ ജീവനക്കാർക്കും ഇത് ബാധകമാണ്. ജീവനക്കാരുടെ തൊഴിൽ വിവരങ്ങളുടെ കൃത്യത ഉറപ്പുവരുത്തുന്നതിന്റെ ഭാഗമായി മന്ത്രാലയത്തിന്റെ ഔദ്യോഗിക ഇലക്ട്രോണിക് പോർട്ടലായ https://ehub.media.gov.kw/ വഴി അപ്‌ഡേഷൻ നടപടികൾ പൂർത്തിയാക്കാവുന്നതാണ്.