കുവൈറ്റ് വിമാനത്താവളത്തിൽ അടിയന്തര വൈദ്യസഹായത്തിനായി 20 ജീവൻരക്ഷാ ഉപകരണങ്ങൾ സ്ഥാപിച്ച്‌ ആരോഗ്യ മന്ത്രാലയം

കുവൈറ്റ് സിറ്റി: അടിയന്തര സാഹചര്യങ്ങളിൽ അതിവേഗം പ്രതികരിക്കുന്നതിനും യാത്രക്കാരുടെ സുരക്ഷ ഉറപ്പാക്കുന്നതിനുമായി കുവൈറ്റ് അന്താരാഷ്ട്ര വിമാനത്താവളത്തിൽ ആരോഗ്യ മന്ത്രാലയം സുരക്ഷാ ക്രമീകരണങ്ങൾ ശക്തമാക്കി. ഇതിന്റെ ഭാഗമായി, വിമാനത്താവളത്തിലെ പ്രധാന ടെർമിനലുകളിലായി 20 ഓട്ടോമേറ്റഡ് എക്സ്റ്റേണൽ കാർഡിയാക് ഡിഫിബ്രിലേറ്റർ (എഇഡി) ഉപകരണങ്ങൾ സ്ഥാപിച്ചു.

ടെർമിനൽ 1, 4, 5 എന്നിവിടങ്ങളിലും വിമാനത്താവളത്തിലെ ഹെൽത്ത് സെന്ററിലുമായി പൊതുജനാരോഗ്യ വിഭാഗത്തിന്റെ മേൽനോട്ടത്തിലാണ് ഉപകരണങ്ങൾ സ്ഥാപിച്ചതെന്ന് മന്ത്രാലയം വക്താവ് ഡോ. അബ്ദുല്ല അൽ സനദ് അറിയിച്ചു. മന്ത്രാലയത്തിന്റെ ഔദ്യോഗിക ‘എക്സ്’ പ്ലാറ്റ്‌ഫോമിലൂടെയാണ് അദ്ദേഹം ഇക്കാര്യം വ്യക്തമാക്കിയത്.

ഹൃദയസ്തംഭനം പോലുള്ള അടിയന്തര സാഹചര്യങ്ങളിൽ ഡിഫിബ്രിലേറ്ററുകൾ ഉടനടി ഉപയോഗിക്കുന്നത് അതിജീവന സാധ്യത 70 ശതമാനം വരെ വർദ്ധിപ്പിക്കുമെന്ന് ഡോ. അൽ സനദ് കൂട്ടിച്ചേർത്തു. ഹൃദയത്തിന്റെ പ്രവർത്തനം അപകടകരമാംവിധം താളം തെറ്റുകയോ നിലച്ചുപോവുകയോ ചെയ്യുമ്പോൾ, സാധാരണഗതിയിലുള്ള ഹൃദയമിടിപ്പ് പുനഃസ്ഥാപിക്കാൻ സഹായിക്കുന്ന ജീവൻരക്ഷാ ഉപകരണമാണിത്.

പ്രത്യേക പരിശീലനം ലഭിക്കാത്ത സാധാരണക്കാർക്കും എളുപ്പത്തിൽ ഉപയോഗിക്കാൻ കഴിയുന്ന തരത്തിൽ, വ്യക്തമായ ശബ്ദ-ദൃശ്യ നിർദ്ദേശങ്ങളോടു കൂടിയാണ് എഇഡി ഉപകരണങ്ങൾ സജ്ജീകരിച്ചിട്ടുള്ളത്. ഇതിനുപുറമെ, ഉപകരണങ്ങൾ ഫലപ്രദമായി ഉപയോഗിക്കുന്നതിന് വിമാനത്താവളത്തിലെ ജീവനക്കാർക്കായി സമഗ്രമായ പരിശീലന പരിപാടികൾക്കും മന്ത്രാലയം തുടക്കം കുറിച്ചിട്ടുണ്ട്. ഈ നടപടി വിമാനത്താവളത്തിലെ അടിയന്തര മെഡിക്കൽ സംവിധാനത്തിന് കൂടുതൽ കരുത്തേകുമെന്ന് അധികൃതർ വിലയിരുത്തുന്നു.