കേരളപ്പിറവിയും വയലാർ അനുസ്മരണവും സംഘടിപ്പിച്ച് കേരള അസോസിയേഷൻ കുവൈറ്റ്; ശ്രദ്ധേയമായി കാവ്യസദസ്സ്

കുവൈറ്റ് സിറ്റി: കേരളപ്പിറവി ദിനാഘോഷവും വയലാർ അനുസ്മരണവും സമുചിതമായി ആചരിച്ച് കേരള അസോസിയേഷൻ കുവൈറ്റ് സാൽമിയ മേഖല കമ്മിറ്റി. സാൽമിയ മേഖല കമ്മിറ്റി കൺവീനർ ബിനുകുമാർ അധ്യക്ഷത വഹിച്ച ചടങ്ങ് അസോസിയേഷൻ പ്രസിഡന്റ് ബിവിൻ തോമസ് ഔപചാരികമായി ഉദ്ഘാടനം ചെയ്തു. അസോസിയേഷൻ കേന്ദ്ര കമ്മിറ്റി അംഗം ഉണ്ണിമായ ഉണ്ണികൃഷ്‌ണൻ ചടങ്ങിന്റെ ഭാഗമായി നടന്ന കാവ്യസദസ്സ് മോഡറേറ്റ് ചെയ്തു.

ചടങ്ങിൽ ‘മലയാള കവിതകളിലെ കേരളം’ എന്ന വിഷയത്തെക്കുറിച്ച് പ്രമുഖ എഴുത്തുകാരനും സാമൂഹിക പ്രവർത്തകനുമായ ജ്യോതിദാസ് തൊടുപുഴ മുഖ്യപ്രഭാഷണം നടത്തി. അസോസിയേഷൻ ജനറൽ സെക്രട്ടറി ഷംനാദ് എസ്. തോട്ടത്തിൽ, ജനറൽ കോർഡിനേറ്റർ മണിക്കുട്ടൻ എടക്കാട്ട്, ട്രെഷറർ അനിൽ കെ.ജി. എന്നിവർ ആശംസകൾ അർപ്പിച്ചു സംസാരിച്ചു.

തുടർന്ന് നടന്ന കാവ്യസദസ്സിൽ കുവൈറ്റിലെ പ്രമുഖ കവി ഉത്തമൻ വളത്തുകാട് തന്റെ ‘പ്ലാത്തം’, ‘അൽദൂര’ എന്നീ കവിതകളും, കവയിത്രി മിത്തു ചെറിയാൻ ‘അർത്ഥങ്ങൾ’ എന്ന കവിതയും അവതരിപ്പിക്കുകയും അവയുടെ രചനാപശ്ചാത്തലം സദസ്സുമായി പങ്കുവെക്കുകയും ചെയ്തു. ചടങ്ങിന്റെ ഭാഗമായി അതിഥികൾക്ക് ഉപഹാരങ്ങൾ നൽകി ആദരിച്ചു. എക്സിക്യൂട്ടീവ് അംഗം ഷാജി രഘുവരൻ ചടങ്ങിന് നന്ദി രേഖപ്പെടുത്തി. എം. രാജീവൻ, അമൃത് സെൻ, മഞ്ജു മോഹനൻ എന്നിവർ പരിപാടികൾക്ക് വിജയകരമായി നേതൃത്വം നൽകി.