കുവൈറ്റ് സാൽമിയയിൽ 17 കാരനെ മർദ്ദിച്ച് ദൃശ്യങ്ങൾ സമൂഹ മാധ്യമത്തിൽ പ്രചരിപ്പിച്ച സംഭവത്തിൽ കൗമാരക്കാരായ മൂന്ന് സ്വദേശികൾ അറസ്റ്റിൽ

കുവൈറ്റ് സിറ്റി, ജൂൺ 28 : സാൽമിയയിലെ പൊതുശൗചാലയത്തിൽ വെച്ച് കൗമാരക്കാരനെ ക്രൂരമായി മർദിക്കുകയും, ഇതിന്റെ ദൃശ്യങ്ങൾ പകർത്തി സമൂഹമാധ്യമങ്ങളിലൂടെ പ്രചരിപ്പിക്കുകയും ചെയ്ത സംഭവത്തിൽ മൂന്ന് സ്വദേശി കൗമാരക്കാരെ കുവൈറ്റ് ആഭ്യന്തര മന്ത്രാലയം അറസ്റ്റ് ചെയ്തു. സമൂഹമാധ്യമങ്ങളിൽ വ്യാപകമായി പ്രചരിച്ച ദൃശ്യങ്ങളെക്കുറിച്ച് ആഭ്യന്തര മന്ത്രാലയത്തിന് കീഴിലുള്ള ക്രിമിനൽ സെക്യൂരിറ്റി സെക്ടറും ജനറൽ ഡിപ്പാർട്ട്‌മെന്റ് ഓഫ് ക്രിമിനൽ ഇൻവെസ്റ്റിഗേഷനും നടത്തിയ ഊർജിത അന്വേഷണത്തിലാണ് പ്രതികൾ വലയിലായത്.

സൈബർ ഇടങ്ങളിലെ നിയമവിരുദ്ധ പ്രവർത്തനങ്ങൾ നിരീക്ഷിക്കുന്നതിന്റെ ഭാഗമായി പോലീസ് നടത്തിയ അന്വേഷണത്തിൽ പ്രതികളെ തിരിച്ചറിയുകയും തുടർന്ന് കസ്റ്റഡിയിലെടുക്കുകയുമായിരുന്നു. അറസ്റ്റിലായ മൂന്ന് പേരും കുവൈറ്റ് പൗരന്മാരാണ്.

പോലീസ് ചോദ്യം ചെയ്യലിൽ പ്രതികൾ കുറ്റം സമ്മതിച്ചിട്ടുണ്ട്. ശൗചാലയത്തിനുള്ളിൽ വെച്ച് 17 വയസ്സുകാരനായ ഇരയെ ശാരീരികമായി മർദിച്ചത് പിടിയിലായ 17 വയസ്സുകാരനായ ഒന്നാം പ്രതിയാണ്. ഈ ക്രൂരത മൊബൈൽ ഫോണിൽ പകർത്തിയത് 16 വയസ്സുകാരനായ രണ്ടാമത്തെ പ്രതിയാണെന്ന് പോലീസ് പറഞ്ഞു. ഈ ദൃശ്യങ്ങൾ ഇന്റർനെറ്റിൽ അപ്‌ലോഡ് ചെയ്ത് പ്രചരിപ്പിച്ചത് 17 വയസ്സുകാരനായ മൂന്നാമത്തെ പ്രതിയുമാണ്.

അറസ്റ്റിലായ മൂന്ന് പ്രതികളെയും തുടർ നിയമനടപടികൾ പൂർത്തിയാക്കുന്നതിനായി ജുവനൈൽ പ്രൊസിക്യൂഷന് (പ്രായപൂർത്തിയാകാത്തവർക്കായുള്ള പ്രൊസിക്യൂഷൻ) കൈമാറി.

രാജ്യത്തെ നിയമങ്ങൾ ലംഘിക്കുന്നവർക്കും പൊതുജനങ്ങളുടെ സുരക്ഷയ്ക്ക് ഭീഷണി സൃഷ്ടിക്കുന്നവർക്കുമെതിരെ വിട്ടുവീഴ്ചയില്ലാത്ത കർശന നടപടികൾ സ്വീകരിക്കുമെന്ന് ആഭ്യന്തര മന്ത്രാലയം പ്രസ്താവനയിലൂടെ ആവർത്തിച്ചു. കുട്ടികളുടെ പെരുമാറ്റങ്ങളിൽ രക്ഷിതാക്കൾ കൃത്യമായ മേൽനോട്ടം വഹിക്കണമെന്നും, ഇത്തരം കുറ്റകൃത്യങ്ങളിൽ പെട്ടുപോകാതെയും നിയമപരമായ പ്രത്യാഘാതങ്ങൾ നേരിടാതെയും അവരെ സംരക്ഷിക്കാൻ ആവശ്യമായ മാർഗനിർദേശങ്ങൾ നൽകണമെന്നും മന്ത്രാലയം ഓർമ്മിപ്പിച്ചു.