കുവൈറ്റ് അബ്ദലി അതിർത്തി പാത വീണ്ടും തുറന്നു ; യാത്രയും ചരക്ക് നീക്കവും സാധാരണ നിലയിലായി

കുവൈറ്റ് സിറ്റി: അടുത്തിടെയുണ്ടായ ആക്രമണത്തെ തുടർന്ന് താൽക്കാലികമായി അടച്ചിട്ടിരുന്ന ഇറാഖുമായുള്ള അബ്ദാലി അതിർത്തി ക്രോസിംഗ് കുവൈറ്റ് വീണ്ടും തുറന്നു. ഇതോടെ അതിർത്തി വഴിയുള്ള യാത്രക്കാരുടെ സഞ്ചാരവും വാണിജ്യ ചരക്കുകളുടെയും ചരക്ക് വാഹനങ്ങളുടെയും ഗതാഗതവും പൂർണ്ണമായി പുനഃസ്ഥാപിക്കപ്പെട്ടു.

ഒന്നാം ഉപപ്രധാനമന്ത്രിയും ആഭ്യന്തരമന്ത്രിയുമായ ഷെയ്ഖ് ഫഹദ് അൽ-യൂസഫിന്റെ നിർദ്ദേശപ്രകാരമാണ് അതിർത്തി അതിവേഗം വീണ്ടും തുറന്നതെന്ന് സുരക്ഷാ വൃത്തങ്ങൾ വ്യക്തമാക്കി. ബന്ധപ്പെട്ട വകുപ്പുകളുമായി ഏകോപിപ്പിച്ച് ആഭ്യന്തര മന്ത്രാലയമാണ് അതിർത്തിയിലെ പ്രവർത്തനങ്ങൾ പുനരാരംഭിച്ചത്. കഴിഞ്ഞ രണ്ടു ദിവസങ്ങളായി അതിർത്തിയിലെ പ്രവർത്തനങ്ങൾ ക്രമേണ സാധാരണ നിലയിലായി വരികയാണെന്നും ധാരാളം ട്രക്കുകളും യാത്രക്കാരും ഇതിനോടകം അതിർത്തി കടന്നുപോയെന്നും അധികൃതർ അറിയിച്ചു.

ആക്രമണത്തിൽ സംഭവിച്ച നാശനഷ്ടങ്ങൾ പരിഹരിക്കാനുള്ള റിപ്പയറിംഗ് ജോലികൾ ആഭ്യന്തര മന്ത്രാലയം തുടരുകയാണ്. യാത്രക്കാരുടെ സുരക്ഷിതമായ യാത്രയും തടസ്സമില്ലാത്ത ചരക്ക് നീക്കവും ഉറപ്പാക്കാൻ ആവശ്യമായ സുരക്ഷാ മുൻകരുതലുകൾ സ്വീകരിച്ചിട്ടുണ്ട്. കുവൈറ്റും ഇറാഖും തമ്മിലുള്ള സുപ്രധാന കരമാർഗ്ഗ വാണിജ്യ-യാത്രാ ബന്ധമാണ് ഇതിലൂടെ വീണ്ടും സജീവമായിരിക്കുന്നത്.