കുവൈറ്റിനു നേരെ വീണ്ടും വ്യോമാക്രമണ ശ്രമം ; മിസൈലുകളും ഡ്രോണുകളും തകർത്ത് വ്യോമപ്രതിരോധ സേന ; മിസൈൽ അവശിഷ്ടങ്ങളിൽ നിന്ന് അകലം പാലിക്കാൻ മുന്നറിയിപ്പുമായി പ്രതിരോധ മന്ത്രാലയം

കുവൈറ്റ് സിറ്റി, ജൂൺ 3: ഇന്ന് പുലർച്ചെ കുവൈറ്റിന് നേരെ ലക്ഷ്യമിട്ടെത്തിയ മിസൈലുകളെയും ഡ്രോണുകളെയും വ്യോമപ്രതിരോധ സംവിധാനം (Air Defense Systems) വിജയകരമായി നേരിട്ടതായി കുവൈറ്റ് സായുധസേനാ ജനറൽ സ്റ്റാഫ് അറിയിച്ചു. രാജ്യത്തിന് നേരെയുള്ള വ്യോമാക്രമണ ഭീഷണികൾക്കെതിരെ പ്രതിരോധ സേന ശക്തമായി തിരിച്ചടിക്കുമെന്ന് സൈനിക വൃത്തങ്ങൾ വ്യക്തമാക്കി .

രാജ്യത്തിന്റെ വിവിധ ഭാഗങ്ങളിൽ വലിയ സ്ഫോടന ശബ്ദങ്ങൾ കേട്ടതായി റിപ്പോർട്ടുണ്ട്. ആകാശത്തുനിന്നുള്ള ഭീഷണികളെ വ്യോമപ്രതിരോധ സംവിധാനം ആകാശത്തുവെച്ച് തന്നെ തകർക്കുന്നതിന്റെ (Neutralizing) ഭാഗമായാണ് ഈ ശബ്ദങ്ങൾ ഉണ്ടാകുന്നതെന്നും ജനങ്ങൾ പരിഭ്രാന്തരാകേണ്ട സാഹചര്യമില്ലെന്നും മിലിട്ടറി അധികൃതർ വ്യക്തമാക്കി.

വ്യോമാക്രമണ പ്രതിരോധ നടപടികളുടെ ഭാഗമായി വീഴാനിടയുള്ള മിസൈൽ അവശിഷ്ടങ്ങൾ, ചില്ലുകൾ (Shrapnel) അല്ലെങ്കിൽ തിരിച്ചറിയാൻ കഴിയാത്ത മറ്റ് വസ്തുക്കൾ എന്നിവയ്ക്ക് സമീപം പോകരുതെന്നും അവയിൽ തൊടരുതെന്നും സ്വദേശികളോടും വിദേശികളോടും കുവൈറ്റ് ജനറൽ സ്റ്റാഫ് ഓഫ് ദി ആർമി ആവശ്യപ്പെട്ടു. ഇത്തരം അവശിഷ്ടങ്ങൾ പൊതുജനങ്ങളുടെ സുരക്ഷയ്ക്ക് കടുത്ത ഭീഷണിയാണെന്ന് സൈന്യം മുന്നറിയിപ്പ് നൽകി.

പ്രതിരോധ മന്ത്രാലയത്തിന്റെ ഔദ്യോഗിക വക്താവ് കേണൽ സൗദ് അബ്ദുൽ അസീസ് അൽ ഒതൈബി പുറത്തിറക്കിയ പ്രസ്താവനയിലാണ് ഈ സുരക്ഷാ നിർദേശങ്ങൾ വ്യക്തമാക്കിയത്. സംശയാസ്പദമായ രീതിയിലുള്ള ഏതെങ്കിലും അവശിഷ്ടങ്ങളോ അപരിചിത വസ്തുക്കളോ കണ്ടെത്തുകയാണെങ്കിൽ ഉടൻ തന്നെ അടിയന്തര ഹെൽപ്പ് ലൈൻ നമ്പറായ 112-ൽ ബന്ധപ്പെടുകയോ ബന്ധപ്പെട്ട സുരക്ഷാ അധികാരികളെ നേരിട്ട് വിവരമറിയിക്കുകയോ ചെയ്യണം.

രാജ്യത്തെ സ്വദേശികളും പ്രവാസികളും പൂർണ്ണമായും ശാന്തത പാലിക്കണമെന്നും സുരക്ഷാ മന്ത്രാലയവും ബന്ധപ്പെട്ട മറ്റ് ഏജൻസികളും നൽകുന്ന സുരക്ഷാ നിർദ്ദേശങ്ങൾ കർശനമായി പിന്തുടരണമെന്നും അധികൃതർ ആവശ്യപ്പെട്ടു. അടിയന്തര സാഹചര്യത്തെ നേരിടാൻ വ്യോമസേന പൂർണ്ണ സജ്ജമാണെന്നും ഔദ്യോഗിക നിർദ്ദേശങ്ങളോട് ജനങ്ങൾ പൂർണ്ണമായി സഹകരിക്കണമെന്നും ജനറൽ സ്റ്റാഫ് പുറത്തിറക്കിയ അടിയന്തര പ്രസ്താവനയിൽ ഊന്നിപ്പറഞ്ഞു. നിലവിൽ സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണ്.