അന്താരാഷ്ട്ര യോഗാ ദിനംത്തോടനുബന്ധിച്ച് കുവൈറ്റിൽ ജൂൺ 19 മുതൽ ഇന്ത്യൻ എംബസിയുടെ ആഭിമുഖ്യത്തിൽ ത്രിദിന യോഗാ ഫെസ്റ്റിവൽ സംഘടിപ്പിക്കുന്നു ; മുഖ്യ ചടങ്ങ് സാൽമിയ ബൊളിവാർഡ് സ്റ്റേഡിയത്തിൽ

കുവൈറ്റ് സിറ്റി: 12-ാമത് അന്താരാഷ്ട്ര യോഗാ ദിനാചരണത്തോടനുബന്ധിച്ച് (IDY-2026) കുവൈറ്റിൽ മൂന്ന് ദിവസം നീണ്ടുനിൽക്കുന്ന വിപുലമായ യോഗാ ഫെസ്റ്റിവൽ സംഘടിപ്പിക്കാൻ ഇന്ത്യൻ എംബസി ഒരുങ്ങുന്നു. ജൂൺ 19 മുതൽ 21 വരെയാണ് യോഗാ ഫെസ്റ്റിവൽ നടക്കുക. ഇതിൽ ഏറ്റവും പ്രധാനപ്പെട്ട മുഖ്യ ചടങ്ങ് ജൂൺ 20 ശനിയാഴ്ച സാൽമിയയിലെ ബുലവാർഡ് ക്രിക്കറ്റ് സ്റ്റേഡിയത്തിൽ വെച്ച് നടക്കുമെന്ന് എംബസി ഔദ്യോഗിക വാർത്താക്കുറിപ്പിൽ അറിയിച്ചു.

വനിതാ വെൽനസ് സെഷനോടെ തുടക്കം

യോഗാ ദിനാഘോഷങ്ങളുടെ കുവൈറ്റ് തലത്തിലുള്ള ഔദ്യോഗിക ഉദ്ഘാടനം മെയ് 29-ന് ഇന്ത്യ ഹൗസ് കോംപൗണ്ടിൽ നടന്ന വനിതാ വെൽനസ് സെഷനോടെയാണ് ആരംഭിച്ചത്. ഇന്ത്യൻ അംബാസഡർ ഹെർ എക്സലൻസി പരമിത ത്രിപാഠി, കുവൈറ്റ് യോഗ കമ്മിറ്റി പ്രസിഡന്റും ദാർ ആത്മ സ്ഥാപകയുമായ പത്മശ്രീ ഷെയ്ഖ ഷെയ്ഖ അൽ സബാഹ് എന്നിവർ ചേർന്ന് ചടങ്ങ് ഉദ്ഘാടനം ചെയ്തു. നയതന്ത്ര പ്രതിനിധികളും കുവൈറ്റിലെ പ്രമുഖരും ചടങ്ങിൽ പങ്കെടുത്തു.

വിപുലമായ മുന്നൊരുക്ക പരിപാടികൾ

ആഘോഷങ്ങളുടെ ഭാഗമായി കുവൈറ്റിന്റെ വിവിധ ഭാഗങ്ങളിൽ വിപുലമായ മുന്നൊരുക്ക പരിപാടികളാണ് (കർട്ടൻ റെയ്‌സർ) എംബസി ആസൂത്രണം ചെയ്തിരിക്കുന്നത്. ഇതിന്റെ ഭാഗമായി മെയ് 30-ന് ഇന്ത്യൻ ഡെന്റിസ്റ്റ്സ് അലയൻസ് ഇൻ കുവൈറ്റ് (IDAK), കേരള ആയുർവേദിക് ഹെൽത്ത് ഇൻസ്റ്റിറ്റ്യൂട്ട് എന്നിവയുമായി സഹകരിച്ച് എംബസിയിൽ പ്രത്യേക യോഗാ വർക്ക്ഷോപ്പ് സംഘടിപ്പിച്ചിരുന്നു.

ഇതിനുപുറമെ കുവൈറ്റിലെ വിവിധ ഇന്ത്യൻ സ്കൂളുകളിലും യോഗാ സെഷനുകൾ നടന്നു വരുന്നുണ്ട്. വരും ദിവസങ്ങളിൽ വിവിധ ഇന്ത്യൻ കമ്മ്യൂണിറ്റി കൂട്ടായ്മകൾ, യോഗാ ഇൻസ്റ്റിറ്റ്യൂട്ടുകൾ, കുവൈറ്റ് സംഘടനകൾ എന്നിവയുടെ നേതൃത്വത്തിലും നിരവധി പരിപാടികൾ നടക്കും. കൂടാതെ, എംബസിയുടെ ആഭിമുഖ്യത്തിൽ എല്ലാ വെള്ളിയാഴ്ചകളിലും ശനിയാഴ്ചകളിലും വർഷം മുഴുവൻ നീണ്ടുനിൽക്കുന്ന യോഗാ വർക്ക്ഷോപ്പുകളും പൊതുജനങ്ങൾക്കായി നടത്തിവരുന്നുണ്ട്.

പ്രമേയം: ‘ആരോഗ്യകരമായ വാർദ്ധക്യത്തിന് യോഗ’

‘ആരോഗ്യകരമായ വാർദ്ധക്യത്തിന് യോഗ’ (Yoga for Healthy Ageing) എന്നതാണ് ഈ വർഷത്തെ അന്താരാഷ്ട്ര യോഗാ ദിനത്തിന്റെ മുഖ്യ പ്രമേയം. പ്രായഭേദമന്യേ ജീവിതത്തിന്റെ എല്ലാ ഘട്ടങ്ങളിലും ശാരീരിക-മാനസികാരോഗ്യം നിലനിർത്തുന്നതിലും വൈകാരിക പ്രതിരോധശേഷി കൈവരിക്കുന്നതിലും യോഗയ്ക്കുള്ള പ്രാധാന്യമാണ് ഇത് അടിവരയിടുന്നത്.

2014 സെപ്റ്റംബറിൽ ഇന്ത്യൻ പ്രധാനമന്ത്രി നരേന്ദ്ര മോദി ഐക്യരാഷ്ട്രസഭയുടെ പൊതുസഭയിൽ മുന്നോട്ടുവെച്ച പ്രമേയത്തെ തുടർന്നാണ് ജൂൺ 21 അന്താരാഷ്ട്ര യോഗാ ദിനമായി പ്രഖ്യാപിച്ചത്. അന്ന് ലോകത്തെ 177 രാജ്യങ്ങൾ ഈ പ്രമേയത്തെ പിന്തുണച്ചിരുന്നു. 2015 മുതൽ ഇത് ആഗോളതലത്തിൽ വലിയൊരു ജനകീയ പ്രസ്ഥാനമായി മാറി.

എംബസിയുടെ ക്ഷണം

കുവൈറ്റിലുള്ള മുഴുവൻ യോഗാ പ്രേമികളെയും പൊതുജനങ്ങളെയും ഈ ത്രിദിന യോഗാ ഉത്സവത്തിലേക്ക് ഇന്ത്യൻ എംബസി ഹാർദ്ദവമായി സ്വാഗതം ചെയ്യുന്നു. പരിപാടിയുടെ കൃത്യമായ സമയക്രമം, വേദി, രജിസ്ട്രേഷൻ വിവരങ്ങൾ എന്നിവ എംബസിയുടെ ഔദ്യോഗിക സാമൂഹിക മാധ്യമങ്ങളിലൂടെയും വെബ്സൈറ്റിലൂടെയും (https://www.indembkwt.gov.in) ഉടൻ പ്രസിദ്ധീകരിക്കുന്നതായിരിക്കും.