സിബിഎസ്ഇ പ്ലസ്സ് 2 പരീക്ഷാഫലം: കുവൈറ്റ് ഉൾപ്പെടെയുള്ള ഗൾഫ് രാജ്യങ്ങളിലെ പ്ലസ്സ് 2 വിദ്യാർത്ഥികൾക്ക് പുതിയ മൂല്യനിർണ്ണയ രീതി പ്രഖ്യാപിച്ച്‌ സിബിഎസ്ഇ

കുവൈറ്റ് സിറ്റി: മേഖലയിലെ നിലവിലെ അസാധാരണ സാഹചര്യങ്ങളും യുദ്ധസമാനമായ പ്രതിസന്ധികളും പരിഗണിച്ച് കുവൈറ്റ് ഉൾപ്പെടെയുള്ള ഗൾഫ് രാജ്യങ്ങളിലെ പന്ത്രണ്ടാം ക്ലാസ് വിദ്യാർത്ഥികൾക്കായി സിബിഎസ്ഇ പുതിയ മൂല്യനിർണ്ണയ രീതി പ്രഖ്യാപിച്ചു. പരീക്ഷകൾ പൂർത്തിയാക്കാൻ കഴിയാത്ത വിദ്യാർത്ഥികളുടെ ഫലം നിശ്ചയിക്കുന്നതിനായി ‘നോട്ടിഫിക്കേഷൻ-2’ പ്രകാരം പ്രത്യേക മാനദണ്ഡങ്ങൾ ബോർഡ് പുറത്തിറക്കി.

കുവൈറ്റ്, ബഹ്‌റൈൻ, ഇറാൻ, ഒമാൻ, ഖത്തർ, സൗദി അറേബ്യ, യുഎഇ എന്നീ രാജ്യങ്ങളിലെ വിദ്യാർത്ഥികൾക്കാണ് ഈ ആനുകൂല്യം ലഭിക്കുക. മേഖലയിൽ പരീക്ഷാ ഷെഡ്യൂളുകൾ തടസ്സപ്പെടുകയും പല പരീക്ഷകളും മാറ്റിവെക്കേണ്ടി വരികയും ചെയ്ത സാഹചര്യത്തിലാണ് വിദ്യാർത്ഥികളുടെ ഭാവി കണക്കിലെടുത്ത് ഇത്തരമൊരു തീരുമാനം.

മാർക്ക് നിശ്ചയിക്കുന്ന രീതി ഇപ്രകാരം:

എല്ലാ പരീക്ഷകളും എഴുതിയവർ: ഇവർക്ക് പരീക്ഷാ മാർക്കിന്റെ അടിസ്ഥാനത്തിൽ തന്നെ ഫലം ലഭിക്കും.

നാല് പരീക്ഷകൾ എഴുതിയവർ: ഇവർക്ക് എഴുതാൻ കഴിയാത്ത വിഷയങ്ങളിൽ, പരീക്ഷയെഴുതിയ നാല് വിഷയങ്ങളിൽ ഏറ്റവും കൂടുതൽ മാർക്ക് ലഭിച്ച മൂന്ന് വിഷയങ്ങളുടെ ശരാശരി (Average) മാർക്ക് നൽകും.

മൂന്ന് പരീക്ഷകൾ എഴുതിയവർ: മികച്ച രണ്ട് വിഷയങ്ങളുടെ ശരാശരി മാർക്ക് ബാക്കിയുള്ള വിഷയങ്ങൾക്ക് നൽകും.

രണ്ട് പരീക്ഷകൾ മാത്രം എഴുതിയവർ: എഴുതിയ രണ്ട് വിഷയങ്ങളുടെ ശരാശരി മാർക്ക് മറ്റ് വിഷയങ്ങൾക്ക് ബാധകമാക്കും.

ഫലപ്രഖ്യാപനവും തുടർനടപടികളും

മറ്റു വിദ്യാർത്ഥികൾക്കൊപ്പം തന്നെ ഇവരുടെ ഫലവും പ്രഖ്യാപിക്കുമെന്ന് സിബിഎസ്ഇ അറിയിച്ചു. ഈ രീതിയിൽ ലഭിക്കുന്ന മാർക്കിൽ തൃപ്തരല്ലാത്ത വിദ്യാർത്ഥികൾക്ക് പിന്നീട് നടക്കുന്ന ബോർഡ് പരീക്ഷകളിൽ ഇംപ്രൂവ്‌മെന്റ് എഴുതാനുള്ള അവസരവും ഉണ്ടായിരിക്കും. പരീക്ഷാ നടത്തിപ്പിലെ അനിശ്ചിതത്വം വിദ്യാർത്ഥികളുടെ ഉന്നത വിദ്യാഭ്യാസത്തെ ബാധിക്കാതിരിക്കാൻ എല്ലാ മുൻകരുതലുകളും സ്വീകരിച്ചതായി ബോർഡ് വ്യക്തമാക്കി.

സ്കൂൾ അധികൃതർക്ക് ഇതുസംബന്ധിച്ച നിർദ്ദേശങ്ങൾ കൈമാറിയിട്ടുണ്ട്. കൂടുതൽ വിവരങ്ങൾക്കായി വിദ്യാർത്ഥികൾക്കും രക്ഷിതാക്കൾക്കും സിബിഎസ്ഇയുടെ ഔദ്യോഗിക വെബ്സൈറ്റ് സന്ദർശിക്കാവുന്നതാണ്.