‘ന്യൂ കുവൈറ്റ് വിഷൻ 2035’ ലക്ഷ്യമാക്കി ‘വിസിറ്റ് കുവൈറ്റും’ ജസീറ എയർവേസും സംയുക്തമായി സഹകരണ കരാറിൽ ഒപ്പുവെച്ചു.

കുവൈറ്റ് സിറ്റി: കുവൈറ്റിന്റെ ടൂറിസം, സാംസ്കാരിക മേഖലകൾക്ക് ഉണർവേകി ദേശീയ പ്ലാറ്റ്‌ഫോമായ ‘വിസിറ്റ് കുവൈറ്റും’ പ്രമുഖ വിമാനക്കമ്പനിയായ ജസീറ എയർവേസും തമ്മിൽ തന്ത്രപരമായ സഹകരണ കരാറിൽ ഒപ്പുവെച്ചു. രാജ്യത്തെ ലോകോത്തര ടൂറിസം, സാംസ്കാരിക കേന്ദ്രമായി ശക്തിപ്പെടുത്തുന്നതിനുള്ള സുപ്രധാന ചുവടുവെപ്പാണിതെന്ന് അധികൃതർ അറിയിച്ചു.

പൊതു-സ്വകാര്യ സംയോജനം

വിവര-സാംസ്കാരിക മന്ത്രിയും യുവജനകാര്യ സഹമന്ത്രിയുമായ അബ്ദുൽറഹ്മാൻ അൽ-മുതൈരി കരാർ ഒപ്പിടൽ ചടങ്ങിൽ സംസാരിച്ചു. പൊതു-സ്വകാര്യ മേഖലകളുടെ സംയോജനം യാഥാർത്ഥ്യമാക്കുന്ന ഈ കരാർ, ‘ന്യൂ കുവൈറ്റ് വിഷൻ 2035’ ലക്ഷ്യങ്ങൾ കൈവരിക്കുന്നതിന് സഹായകമാകും. കുവൈറ്റിന്റെ നാഗരികവും മാനുഷികവുമായ വ്യക്തിത്വം ഉയർത്തിക്കാട്ടുന്ന ഒരു ദേശീയ കുടക്കീഴിൽ പ്രചാരണ പ്രവർത്തനങ്ങൾ ഏകീകരിക്കുന്നതിലൂടെ ടൂറിസം മേഖലയുടെ ഡിജിറ്റൽ ആശയവിനിമയ സംവിധാനം വികസിപ്പിക്കുകയാണ് മന്ത്രാലയത്തിന്റെ തന്ത്രപരമായ ലക്ഷ്യമെന്നും അദ്ദേഹം കൂട്ടിച്ചേർത്തു.

‘സ്റ്റോപ്പ്ഓവർ പാക്കേജ്’ പദ്ധതി

ദേശീയ സമ്പദ്‌വ്യവസ്ഥയെ വൈവിധ്യവത്കരിക്കുന്നതിനും മൊത്തത്തിലുള്ള വളർച്ചയെ ഉത്തേജിപ്പിക്കുന്നതിനുമുള്ള സർക്കാരിന്റെ കാഴ്ചപ്പാടിന്റെ പ്രായോഗിക നടപ്പാക്കലാണ് ഈ കരാറെന്ന് ജസീറ എയർവേസ് ചെയർമാൻ മർവാൻ ബൂദായി വ്യക്തമാക്കി. രാജ്യത്തിന്റെ പൈതൃകവും സംസ്കാരവും അടുത്തറിയാൻ യാത്രക്കാർക്ക് അവസരം നൽകുന്ന ‘സ്റ്റോപ്പ്ഓവർ പാക്കേജ്’ ആരംഭിക്കുന്നതാണ് പ്രധാന പദ്ധതി.

വിസ ലഭ്യത വർദ്ധിപ്പിച്ച് പ്രവേശന നടപടികൾ ലഘൂകരിക്കുന്നതിൽ ആഭ്യന്തര മന്ത്രാലയം നടത്തിയ ശ്രമങ്ങളെ അദ്ദേഹം അഭിനന്ദിച്ചു. ഗൾഫ് മേഖലയിൽ ടൂറിസം ഏറ്റവും കൂടുതൽ തൊഴിലവസരങ്ങൾ സൃഷ്ടിക്കുന്ന മേഖലയായി മാറിയിരിക്കുകയാണെന്നും, ഒരു വിനോദസഞ്ചാരി ഒരു സന്ദർശനത്തിൽ കുറഞ്ഞത് 2,500 യുഎസ് ഡോളർ വരെ ചെലവഴിക്കുന്നതിനാൽ ഇത് പ്രാദേശിക സമ്പദ്‌വ്യവസ്ഥയ്ക്ക് സുപ്രധാനമായ നേട്ടമുണ്ടാക്കുമെന്നും മർവാൻ ബൂദായി ചൂണ്ടിക്കാട്ടി.

ടൂറിസം, വ്യോമയാനം, ഹോസ്പിറ്റാലിറ്റി തുടങ്ങിയ അനുബന്ധ സേവന മേഖലകളിലെ അവസരങ്ങൾ ഉപയോഗപ്പെടുത്താൻ കുവൈറ്റി യുവജനങ്ങളോട് അദ്ദേഹം അഭ്യർത്ഥിക്കുകയും ചെയ്തു.