ഇന്ത്യൻ അംബാസഡർ ഡോ: ആദർശ്ശ്‌ സ്വൈകക്ക് ഊഷ്മളമായ യാത്രയയപ്പ് നൽകി കുവൈറ്റ്

കുവൈറ്റ് : മൂന്ന് വർഷത്തെ സേവനം പൂർത്തിയാക്കിയ ഇന്ത്യൻ അംബാസഡർ ഡോ. ആദർശ് സ്വൈകക്ക് കുവൈറ്റ് യാത്രയയപ്പ് നൽകി. ഔദ്യോഗിക പദവികൾ ഒഴിഞ്ഞ ശേഷം മടങ്ങുന്ന അംബാസഡർ, ഇരു രാജ്യങ്ങളും തമ്മിലുള്ള തന്ത്രപരമായ ബന്ധത്തിന്റെ പ്രാധാന്യത്തെ എടുത്തുപറഞ്ഞു. പ്രധാനമന്ത്രി നരേന്ദ്ര മോദിയുടെ കുവൈറ്റ് സന്ദർശനത്തെത്തുടർന്ന് ഇരു രാജ്യങ്ങളും തമ്മിലുള്ള ബന്ധം തന്ത്രപരമായ പങ്കാളിത്തത്തിലേക്ക് ഉയർത്തിയതിന് പിന്നിൽ അംബാസഡറുടെ നേതൃപരമായ പങ്കാളിത്തം നിർണ്ണായകമായിരുന്നു.

അംബാസഡറായിരുന്ന കാലയളവിൽ, വിവിധ മേഖലകളിലായി ഇന്ത്യയും കുവൈത്തും തമ്മിലുള്ള ബന്ധം കൂടുതൽ ശക്തമായി. വ്യാപാരം, ഊർജ്ജം, നിക്ഷേപം, പ്രതിരോധം, സുരക്ഷ, പ്രവാസികളുടെ ക്ഷേമം തുടങ്ങിയ കാര്യങ്ങളിൽ ഇരു രാജ്യങ്ങളും തമ്മിൽ പുതിയ ധാരണകളും സഹകരണ ഉടമ്പടികളും രൂപപ്പെട്ടു. ഇരു രാജ്യങ്ങളിലെയും ഉന്നതതല ഉദ്യോഗസ്ഥർ തമ്മിൽ പതിവായ കൂടിക്കാഴ്ചകൾ നടത്താനും, പരസ്പരം സഹകരണത്തിന്റെ പുതിയ വാതിലുകൾ തുറക്കാനും ഇത് സഹായകമായി.

കുവൈറ്റിലെ ഏറ്റവും വലിയ പ്രവാസി സമൂഹമായ ഏകദേശം പത്ത് ലക്ഷത്തിൽ അധികം വരുന്ന ഇന്ത്യൻ സമൂഹത്തിന്റെ സംഭാവനകളെ അംബാസഡർ പ്രത്യേകം പ്രശംസിച്ചു. കുവൈത്തിന്റെ സാമ്പത്തിക വികസനത്തിലും സാമൂഹിക പുരോഗതിയിലും ഇന്ത്യൻ സമൂഹം ഒരു നിർണ്ണായക ശക്തിയായി പ്രവർത്തിക്കുന്നുണ്ട്. ഇരു രാജ്യങ്ങളും തമ്മിലുള്ള സൗഹൃദത്തിന്റെ പാലമായി പ്രവർത്തിക്കുന്ന ഇന്ത്യൻ സമൂഹത്തിന്റെ ക്ഷേമം ഉറപ്പുവരുത്താൻ അദ്ദേഹത്തിന്റെ കാലയളവിൽ ഊന്നൽ നൽകിയിരുന്നു.

യാത്രയയപ്പ് കൂടിക്കാഴ്ചകളിൽ, കഴിഞ്ഞ മൂന്ന് വർഷത്തെ സഹകരണത്തിന്റെ അനുഭവങ്ങൾ അംബാസഡർ പങ്കുവെച്ചു. വിവിധ മേഖലകളിലെ പുരോഗതിയും, ഇരു രാജ്യങ്ങളും തമ്മിൽ കൂടുതൽ ഉന്നതതല സന്ദർശനങ്ങൾ നടത്തേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി. ഇന്ത്യ-കുവൈറ്റ് ബന്ധങ്ങൾ വരും കാലങ്ങളിലും കൂടുതൽ ശക്തമായി മുന്നോട്ട് പോകുമെന്ന പ്രതീക്ഷയും അദ്ദേഹം പങ്കുവെച്ചു.

അദ്ദേഹത്തിന്റെ സേവനത്തിന് നന്ദി അറിയിച്ചുകൊണ്ട്, ഇന്ത്യൻ മാധ്യമങ്ങളുടെ പ്രതിനിധികൾ ഉൾപ്പെടെയുള്ളവർ അംബാസഡർക്ക് ആശംസകൾ അർപ്പിച്ചു.