ഇന്ത്യയില്‍ നിന്ന് യു.കെ.യിലേക്കും തിരിച്ചുമുളള വിമാന സര്‍വീസ് ജനുവരി എട്ട് മുതല്‍ പുനരാരംഭിക്കും

Times of Kuwait

ന്യൂഡല്‍ഹി: അതിവേഗം വ്യാപിക്കുന്ന ജനിതക മാറ്റം വന്ന കോവിഡ് ബ്രിട്ടണില്‍ കണ്ടെത്തിയതിനെ തുടര്‍ന്ന് നിര്‍ത്തിവെച്ച ഇന്ത്യയില്‍ നിന്ന് യു.കെ.യിലേക്കും തിരിച്ചുമുളള വിമാന സര്‍വീസ് ജനുവരി എട്ട് മുതല്‍ പുനരാരംഭിക്കും. ജനുവരി 8 മുതല്‍ നിയന്ത്രിതമായ രീതിയില്‍ വീണ്ടും വിമാനസര്‍വീസുകള്‍ തുടങ്ങുമെന്ന് കേന്ദ്രവ്യോമയാനമന്ത്രി ഹര്‍ദീപ് സിംഗ് പുരി വ്യക്തമാക്കി.

‘ജനുവരി 8 2021 മുതല്‍ വിമാനങ്ങള്‍ ഇന്ത്യയില്‍ നിന്ന് യുകെയിലേക്കും യുകെയില്‍ നിന്ന് തിരികെയും സര്‍വീസ് തുടങ്ങും. ജനുവരി 23 വരെ ആഴ്ചയില്‍ 15 ഫ്ലൈറ്റുകള്‍ മാത്രമേ സര്‍വീസ് നടത്തൂ. ഡല്‍ഹി, മുംബൈ, ബെംഗളുരു, ഹൈദരാബാദ് എന്നീ നഗരങ്ങളിലേക്ക് മാത്രമേ സര്‍വീസുകളുണ്ടാകൂ.
കൃത്യമായി ഏതെല്ലാം വിമാനങ്ങള്‍, എപ്പോഴെല്ലാം സര്‍വീസ് നടത്തുമെന്ന വിവരം വ്യോമയാന അതോറിറ്റി പുറത്തുവിടും’, ഹര്‍ദീപ് സിംഗ് പുരി ട്വീറ്റ് ചെയ്തു.

ഡിസംബര്‍ അവസാനവാരത്തോടെയാണ് ഇന്ത്യ-യു.കെ. വിമാന സര്‍വീസ് താത്കാലികമായി റദ്ദാക്കിയത്.