രാജ്യത്തിന് പുറത്തേക്ക് അനധികൃതമായി കടത്താൻ ശ്രമിച്ച സബ്‌സിഡി ഭക്ഷ്യവസ്തുക്കൾ പിടിച്ചെടുത്ത് കസ്റ്റംസ് ജനറൽ അഡ്മിനിസ്ട്രേഷൻ

രാജ്യത്തിന് പുറത്തേക്ക് അനധികൃതമായി കടത്താൻ ശ്രമിച്ച സബ്‌സിഡി നിരക്കിലുള്ള ഭക്ഷ്യവസ്തുക്കൾ കുവൈത്ത് ജനറൽ അഡ്മിനിസ്‌ട്രേഷൻ ഓഫ് കസ്റ്റംസ് പിടികൂടി. വടക്കൻ തുറമുഖങ്ങളിലും ഫൈലക്ക ദ്വീപിലുമായി ഇറാനിയൻ ഫെറിയിലെ യാത്രക്കാരിൽ നിന്നാണ് സാധനങ്ങൾ പിടിച്ചെടുത്തത്.

കസ്റ്റംസ് ഉദ്യോഗസ്ഥർ നടത്തിയ കർശനമായ പരിശോധനയിലാണ് നിയമലംഘനം കണ്ടെത്തിയത്. രാജ്യത്ത് സബ്‌സിഡി നിരക്കിൽ നൽകുന്ന ഉൽപ്പന്നങ്ങൾ കയറ്റുമതി ചെയ്യുന്നതിന് കർശനമായ വിലക്കുണ്ട്. ഈ നിയമം ലംഘിച്ചതിനാണ് നടപടി.
പിടിച്ചെടുത്ത ഭക്ഷ്യവസ്തുക്കൾ സുരക്ഷിതമായി സംഭരിച്ചിട്ടുണ്ട്.

രാജ്യത്തെ നിയമങ്ങൾ പാലിക്കാൻ എല്ലാവരും ബാധ്യസ്ഥരാണെന്നും നിയമലംഘനങ്ങൾക്കെതിരെ ശക്തമായ നടപടികൾ തുടരുമെന്നും അധികൃതർ മുന്നറിയിപ്പ് നൽകി.