കുവൈറ്റിൽ ആരോഗ്യപ്രവർത്തകർക്ക് പുതിയ നിയമങ്ങൾ പ്രാബല്യത്തിൽ; ഉത്തരവ് പുറത്തിറക്കി ആരോഗ്യ മന്ത്രാലയം

കുവൈറ്റ് സിറ്റി: കുവൈറ്റിലെ സർക്കാർ-സ്വകാര്യ ആരോഗ്യ മേഖലകളിൽ ജോലി ചെയ്യുന്ന ഡോക്ടർമാർ, നഴ്സുമാർ, മറ്റ് ആരോഗ്യ അനുബന്ധ പ്രൊഫഷണലുകൾ (Allied Health Professions) എന്നിവരുടെ ലൈസൻസിംഗിനും തൊഴിൽ രീതികൾക്കും പുതിയ മാനദണ്ഡങ്ങൾ ഏർപ്പെടുത്തി. ആരോഗ്യ മന്ത്രി ഡോ. അഹമ്മദ് അൽ അവാധിയാണ് ഇതുസംബന്ധിച്ച മന്ത്രിതല ഉത്തരവ് പുറപ്പെടുവിച്ചത്.

രോഗികളുടെ സുരക്ഷ ഉറപ്പാക്കുന്നതിനും ആരോഗ്യ സേവനങ്ങളുടെ ഗുണനിലവാരം വർദ്ധിപ്പിക്കുന്നതിനുമായി 2020-ലെ 70-ാം നമ്പർ നിയമത്തിന്റെ അടിസ്ഥാനത്തിലാണ് പുതിയ പരിഷ്കാരങ്ങൾ നടപ്പിലാക്കുന്നത്.

പ്രധാന നിർദ്ദേശങ്ങൾ:

• ലൈസൻസിംഗ് മാനദണ്ഡങ്ങൾ: സർക്കാർ, സ്വകാര്യ മേഖലകളിലെ മെഡിക്കൽ, നഴ്സിംഗ്, അനുബന്ധ ആരോഗ്യ തൊഴിലുകൾക്ക് വ്യക്തമായ ലൈസൻസിംഗ് ചട്ടക്കൂട് നിശ്ചയിച്ചു. സ്വദേശി-വിദേശി ആരോഗ്യപ്രവർത്തകർക്ക് ഇത് ബാധകമാണ്.
• വിസിറ്റിംഗ് ഡോക്ടർമാർക്ക് നിയന്ത്രണം: സന്ദർശക ഡോക്ടർമാർ (Visiting Doctors), അസിസ്റ്റന്റ് ഡോക്ടർമാർ, സബ്സ്റ്റിറ്റ്യൂട്ട് ഡോക്ടർമാർ എന്നിവരുടെ നിയമനത്തിന് പുതിയ കർശനമായ നിയന്ത്രണങ്ങൾ ഏർപ്പെടുത്തി.
• അധിക ജോലി സമയം: ഔദ്യോഗിക ജോലി സമയത്തിന് പുറമെ (Work outside official hours) ജോലി ചെയ്യുന്നതിനുള്ള പെർമിറ്റുകൾക്ക് പ്രത്യേക നിബന്ധനകൾ നിശ്ചയിച്ചു.
• ലൈസൻസ് പുതുക്കലും മാറ്റവും: പ്രൊഫഷണൽ ലൈസൻസുകൾ പുതുക്കുന്നതിനും ഒരു സ്ഥാപനത്തിൽ നിന്ന് മറ്റൊന്നിലേക്ക് മാറ്റുന്നതിനും (Transfer) വ്യക്തമായ മാനദണ്ഡങ്ങൾ ഉത്തരവിൽ വിശദീകരിക്കുന്നു.
• പ്രമോഷനും സ്ഥാനപ്പേരും: നഴ്സിംഗ് ഉൾപ്പെടെയുള്ള വിഭാഗങ്ങളിൽ പ്രൊഫഷണൽ പ്രമോഷനുകൾ നടത്തുന്നതിനും പുതിയ തസ്തികകൾ കൂട്ടിച്ചേർക്കുന്നതിനും കൃത്യമായ നടപടിക്രമങ്ങൾ പാലിക്കണം.
• ലൈസൻസ് റദ്ദാക്കൽ: തൊഴിൽപരമായ അച്ചടക്കം ലംഘിക്കുകയോ കൃത്യവിലോപം കാണിക്കുകയോ ചെയ്താൽ ലൈസൻസ് സസ്പെൻഡ് ചെയ്യാനോ റദ്ദാക്കാനോ ഉള്ള വ്യവസ്ഥകളും പുതിയ നിയമത്തിലുണ്ട്.

ആരോഗ്യമേഖലയിലെ ഭരണപരമായ സുതാര്യത ഉറപ്പാക്കാനും ആധുനിക കാലഘട്ടത്തിന് അനുസൃതമായ മാറ്റങ്ങൾ കൊണ്ടുവരാനുമാണ് ഈ തീരുമാനമെന്ന് ആരോഗ്യ മന്ത്രാലയം വ്യക്തമാക്കി. കുവൈറ്റിലെ പതിനായിരക്കണക്കിന് പ്രവാസി മലയാളി ആരോഗ്യപ്രവർത്തകരെയും ബാധിക്കുന്നതാണ് ഈ പുതിയ തൊഴിൽ നിയമങ്ങൾ.