കുവൈറ്റ് വ്യാജ ഇ-വിസ തട്ടിപ്പ്: രാജ്യാന്തര ശൃംഖലയെ തകർത്ത് സിബിഐ; പ്രതികൾ പിടിയിൽ

ന്യൂഡൽഹി: കുവൈറ്റിലേക്കുള്ള വ്യാജ ഇ-വിസകൾ നിർമ്മിച്ച് കോടിക്കണക്കിന് രൂപയുടെ തട്ടിപ്പ് നടത്തിവന്ന വൻ സൈബർ ക്രിമിനൽ ശൃംഖലയെ സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) തകർത്തു. ‘ഓപ്പറേഷൻ സൈസ്ട്രൈക്ക്’ (Operation CyStrike) എന്ന് പേരിട്ട രാജ്യാന്തരതലത്തിലുള്ള സംയുക്ത നീക്കത്തിലൂടെയാണ് തട്ടിപ്പ് സംഘത്തെ പിടികൂടിയത്.

കുവൈറ്റ് ഗവൺമെന്റിന്റെ ഔദ്യോഗിക വിസ പോർട്ടലുകളോട് സാമ്യമുള്ള വ്യാജ വെബ്‌സൈറ്റുകൾ നിർമ്മിച്ചായിരുന്നു സംഘത്തിന്റെ പ്രവർത്തനം. കുവൈറ്റിലേക്ക് ജോലി അന്വേഷിക്കുന്നവരെയും സന്ദർശകരെയും ലക്ഷ്യമിട്ടായിരുന്നു ഈ തട്ടിപ്പ്. യഥാർത്ഥ വിസ വെബ്‌സൈറ്റാണെന്ന് വിശ്വസിച്ച് അപേക്ഷിക്കുന്നവരിൽ നിന്ന് വിസ ഫീസിനത്തിലും മറ്റും വൻ തുകകൾ സംഘം കൈക്കലാക്കിയിരുന്നു.

മിന്നൽ പരിശോധന രാജ്യവ്യാപകമായി സിബിഐയുടെ നേതൃത്വത്തിൽ ഡൽഹി, മുംബൈ തുടങ്ങി രാജ്യത്തെ വിവിധ നഗരങ്ങളിൽ ഒരേസമയം പരിശോധനകൾ നടന്നു. തട്ടിപ്പിന് ഉപയോഗിച്ച കമ്പ്യൂട്ടറുകൾ, മൊബൈൽ ഫോണുകൾ, ലാപ്ടോപ്പുകൾ, വ്യാജ രേഖകൾ, ക്രെഡിറ്റ് കാർഡുകൾ എന്നിവ റെയ്ഡിൽ പിടിച്ചെടുത്തു. വിദേശ ഏജൻസികളുമായി സഹകരിച്ചാണ് തട്ടിപ്പിന്റെ അന്താരാഷ്ട്ര ബന്ധങ്ങൾ സിബിഐ കണ്ടെത്തിയത്.

ഗൂഗിൾ സെർച്ചിലും മറ്റും മുൻനിരയിൽ എത്തുന്ന രീതിയിൽ വ്യാജ വെബ്‌സൈറ്റുകൾ ക്രമീകരിച്ചാണ് ഉദ്യോഗാർത്ഥികളെ സംഘം ആകർഷിച്ചിരുന്നത്. വിസ നടപടിക്രമങ്ങൾ പൂർത്തിയായെന്ന് വിശ്വസിപ്പിക്കാൻ വ്യാജ വിസ കോപ്പികൾ ഇവർ ഇമെയിൽ വഴി അയച്ചുനൽകും. പണം കൈമാറിക്കഴിഞ്ഞാൽ പിന്നീട് ഇവരുമായി ബന്ധപ്പെടാൻ സാധിക്കില്ല. ഇന്ത്യക്കാർക്ക് പുറമെ മറ്റ് വിദേശ രാജ്യങ്ങളിലുള്ളവരും ഈ തട്ടിപ്പിന് ഇരയായിട്ടുണ്ടെന്നാണ് പ്രാഥമിക വിവരം.

സൈബർ കുറ്റകൃത്യങ്ങൾ തടയുന്നതിന്റെ ഭാഗമായി വരും ദിവസങ്ങളിലും പരിശോധനകൾ തുടരുമെന്ന് സിബിഐ വക്താവ് അറിയിച്ചു. ഇലക്ട്രോണിക് വിസ അപേക്ഷകൾക്കുള്ള ഏക ഔദ്യോഗിക പോർട്ടൽ www.indianvisaonline.gov.in ആണെന്നും അപേക്ഷകർ അനധികൃത പ്ലാറ്റ്‌ഫോമുകൾ ഒഴിവാക്കണമെന്നും കുവൈറ്റിലെ ഇന്ത്യൻ എംബസി മുന്നറിയിപ്പ് നൽകി. വ്യാജ വെബ്സൈറ്റുകളെ ആശ്രയിക്കുന്നത് സാമ്പത്തിക നഷ്ടം, വ്യക്തിഗത ഡാറ്റ ദുരുപയോഗം, യാത്രാ കാലതാമസം എന്നിവയ്ക്ക് കാരണമാകുമെന്ന് എംബസി എടുത്തുപറഞ്ഞു.

സൈബർ തട്ടിപ്പിന് ഇരയാകുന്നത് തടയാൻ വ്യക്തികൾ ജാഗ്രത പാലിക്കണമെന്നും വിസ സേവന പ്ലാറ്റ്ഫോമുകളുടെ വിശ്വാസ്യത പരിശോധിക്കണമെന്നും സംശയാസ്പദമായ പ്രവർത്തനം റിപ്പോർട്ട് ചെയ്യണമെന്നും അധികൃതർ അഭ്യർത്ഥിച്ചു.

സംഭവത്തിൽ കൂടുതൽ പ്രതികൾക്കായി സിബിഐ അന്വേഷണം ഊർജ്ജിതമാക്കിയിട്ടുണ്ട്. പിടിക്കപ്പെട്ടവരെ ഉടൻ കോടതിയിൽ ഹാജരാക്കും.