കുവൈറ്റ് ജലീബ് അൽ ഷുയൂഖിൽ നിയമലംഘനം കണ്ടെത്തിയ 263 കെട്ടിടങ്ങൾ പൊളിച്ചുമാറ്റാൻ തുടങ്ങി ;

മൂന്ന് ആഴ്ചയ്ക്കുള്ളിൽ 494 കെട്ടിടങ്ങൾ കൂടി പൊളിച്ചു നീക്കും : ചെലവ് ഉടമകളിൽ നിന്ന് ഈടാക്കാൻ കുവൈറ്റ് മുൻസിപ്പാലിറ്റി

കുവൈറ്റ് സിറ്റി: ജലീബ് അൽ ഷുയൂഖ് പ്രദേശത്ത് നിർമ്മാണ നിയമലംഘനങ്ങൾ നടത്തിയ കെട്ടിടങ്ങൾ പൊളിച്ചുമാറ്റാനുള്ള വ്യാപക നടപടികൾക്ക് കുവൈറ്റ് മുൻസിപ്പാലിറ്റി തുടക്കം കുറിച്ചു. സർക്കാരിന്റെ സമഗ്ര ശുദ്ധീകരണ ദൗത്യത്തിന്റെ ഒന്നാം ഘട്ടമായി 263 നിയമലംഘന കെട്ടിടങ്ങളാണ് നിലവിൽ പൊളിച്ചുമാറ്റുന്നത്.

നോട്ടീസ് നൽകിയിട്ടും കെട്ടിടങ്ങൾ സ്വന്തം നിലയിൽ പൊളിച്ചുനീക്കാൻ ഉടമകൾ തയ്യാറാകാത്തതിനെ തുടർന്നാണ് അധികൃതർ നേരിട്ട് സ്ഥലത്തെത്തി നടപടി സ്വീകരിക്കുന്നത്. മുൻസിപ്പാലിറ്റി ഔദ്യോഗിക ഗസറ്റിൽ നോട്ടീസ് പ്രസിദ്ധീകരിക്കുകയും ആവശ്യമായ നിയമനടപടികൾ പൂർത്തിയാക്കുകയും ചെയ്ത ശേഷമാണ് ശക്തമായ നടപടികളിലേക്ക് കടന്നത്. പ്രദേശത്തെ കെട്ടിട ലംഘനങ്ങൾ പൂർണ്ണമായി ഇല്ലാതാക്കുന്നതിന് മൂന്ന് ഘട്ടങ്ങളിലായുള്ള സമയക്രമം നിശ്ചയിച്ചാണ് മുൻസിപ്പാലിറ്റി പ്രവർത്തനം ഏകോപിപ്പിക്കുന്നത്.

മൂന്ന് ഘട്ടങ്ങളായുള്ള നടപടിക്രമം:

ഒന്നാം ഘട്ടം: നിയമനടപടികൾ പൂർത്തിയായ 263 കെട്ടിടങ്ങളാണ് നിലവിൽ പൂർണ്ണമായി പൊളിച്ചുനീക്കുന്നത്.

രണ്ടാം ഘട്ടം: 494 കെട്ടിടങ്ങളാണ് ഈ ഘട്ടത്തിൽ ഉൾപ്പെട്ടിട്ടുള്ളത്. കുവൈറ്റ് മുൻസിപ്പാലിറ്റി ഡയറക്ടർ ജനറലിന്റെ ഔദ്യോഗിക ഉത്തരവ് പുറത്തുവരുന്നതോടെ മൂന്ന് ആഴ്ചയ്ക്കുള്ളിൽ ഇവ പൊളിക്കുന്ന നടപടികൾ ആരംഭിക്കും.

മൂന്നാം ഘട്ടം: പൊതുമരാമത്ത് മന്ത്രാലയത്തിൽ (Ministry of Public Works) നിന്നുള്ള സാങ്കേതിക റിപ്പോർട്ടുകളും വിശദാംശങ്ങളും ലഭ്യമാകുന്ന മുറയ്ക്ക് മൂന്നാം ഘട്ടത്തിൽ ഉൾപ്പെടുന്ന കെട്ടിടങ്ങളുടെ പട്ടിക പുറത്തുവിടും.

ചെലവ് കെട്ടിട ഉടമകൾ വഹിക്കണം:

നിയമലംഘനം നടത്തിയ കെട്ടിടങ്ങൾ പൊളിച്ചുമാറ്റുന്നതിനും അവശിഷ്ടങ്ങൾ നീക്കം ചെയ്യുന്നതിനുമുള്ള മുഴുവൻ ചെലവും കെട്ടിട ഉടമകളിൽ നിന്ന് തന്നെ ഈടാക്കുമെന്ന് മുൻസിപ്പാലിറ്റി വൃത്തങ്ങൾ വ്യക്തമാക്കി. ഇതിനായുള്ള തുക കൃത്യമായ മാനദണ്ഡങ്ങളുടെ അടിസ്ഥാനത്തിലാണ് കണക്കാക്കുക. അവശിഷ്ടങ്ങൾ കൊണ്ടുപോകുന്നതിനുള്ള ഗതാഗത പാതയും ദൂരവും, ഉപയോഗിക്കുന്ന യന്ത്രസാമഗ്രികൾ, കെട്ടിടത്തിന്റെ നിലകളുടെ എണ്ണം, മൊത്തം വിസ്തീർണ്ണം എന്നിവ വിലയിരുത്തിയാകും ഓരോ കെട്ടിട ഉടമയിൽ നിന്നും ഈടാക്കേണ്ട അന്തിമ തുക നിശ്ചയിക്കുക.