കുവൈറ്റ് ആഭ്യന്തര മന്ത്രിയെ വധിക്കാൻ ഗൂഢാലോചന നടത്തിയ കേസിൽ ചാരവൃത്തി, തീവ്രവാദ ഗ്രൂപ്പ് ബന്ധമുള്ള മൂന്ന് പേർക്ക് വധശിക്ഷ വിധിച്ച് കുവൈറ്റ് ക്രിമിനൽ കോടതി

കുവൈറ്റ് സിറ്റി: പ്രഥമ ഉപപ്രധാനമന്ത്രിയും ആഭ്യന്തരമന്ത്രിയുമായ വ്യക്തിയെ വധിക്കാൻ ഗൂഢാലോചന നടത്തൽ, ഇറാനുവേണ്ടി ചാരവൃത്തി ചെയ്യൽ, ലബനീസ് ഹിസ്ബുള്ള സംഘടനയിൽ അംഗത്വമെടുക്കൽ എന്നീ ഗുരുതര കുറ്റകൃത്യങ്ങളിൽ കുവൈറ്റ് ക്രിമിനൽ കോടതിയിലെ സ്റ്റേറ്റ് സെക്യൂരിറ്റി സർക്യൂട്ട് നിർണായക വിധി പ്രസ്താവിച്ചു. കേസിൽ മൂന്ന് പ്രതികൾക്ക് വധശിക്ഷയും എട്ട് കുവൈറ്റ് പൗരന്മാർക്ക് അഞ്ച് വർഷം വീതം തടവുശിക്ഷയുമാണ് കോടതി വിധിച്ചത്.

കുവൈറ്റിന്റെ ദേശീയ താൽപ്പര്യങ്ങൾക്ക് ഹാനി വരുത്തൽ, ഇറാനുമായി സഹകരിച്ച് പ്രവർത്തിക്കൽ, ലബനീസ് ഹിസ്ബുള്ള സംഘടനയിൽ ചേരൽ, കുവൈറ്റ് രാജ്യത്തിനെതിരെ ശത്രുതാപരമായ നടപടികൾ ആസൂത്രണം ചെയ്യൽ, പ്രഥമ ഉപപ്രധാനമന്ത്രിയും ആഭ്യന്തരമന്ത്രിയുമായ വ്യക്തിയെ വധിക്കാൻ പദ്ധതിയിടൽ തുടങ്ങിയ കുറ്റങ്ങളാണ് പ്രതികൾക്കെതിരെ ചുമത്തിയത്.

കേസിന്റെ വിശദാംശങ്ങൾ അനുസരിച്ച്, നാല് മുതൽ പത്ത് വരെയുള്ള പ്രതികൾ വധശ്രമം ആസൂത്രണം ചെയ്യുന്നതിനായി രഹസ്യയോഗം ചേരുകയും ചുമതലകൾ വിഭജിച്ചെടുക്കുകയും ചെയ്തു. ആദ്യ മൂന്ന് പ്രതികളുടെ നിർദ്ദേശപ്രകാരം പതിനൊന്നാമത്തെ പ്രതിയെ ആക്രമണത്തിന് ആവശ്യമായ ഉപകരണങ്ങൾ ലഭ്യമാക്കാൻ ചുമതലപ്പെടുത്തി. രാജ്യത്ത് ഭീതി വിതയ്ക്കുകയെന്ന ലക്ഷ്യത്തോടെ സ്ഫോടകവസ്തുക്കൾ ഉപയോഗിച്ച് ആക്രമണം നടത്താനും പ്രതികൾ ആസൂത്രണം ചെയ്തിരുന്നു. ഈ ഓപ്പറേഷൻ നടപ്പിലാക്കുന്നതിനായി രാജ്യത്തേക്ക് സ്ഫോടകവസ്തുക്കൾ കടത്താൻ ശ്രമിച്ചതിനാണ് പതിനൊന്നാം പ്രതിക്കെതിരെ കേസെടുത്തത്.

കുവൈറ്റിന്റെ സുരക്ഷ തകർക്കാനും സമൂഹത്തിൽ അശാന്തി പടർത്താനും ജനങ്ങളുടെ ജീവനും സ്വത്തിനും സംരക്ഷണം നൽകാനുള്ള ഭരണകൂടത്തിന്റെ ശേഷിയിലുള്ള പൊതുജനവിശ്വാസം തകർക്കാനുമാണ് പ്രതികൾ ശ്രമിച്ചതെന്ന് കോടതി വിധിന്യായത്തിൽ വ്യക്തമാക്കി. ദേശീയ സുരക്ഷ എന്നത് ഏതെങ്കിലും വ്യക്തിയുടെയോ പ്രത്യേക വിഭാഗത്തിന്റെയോ താൽപ്പര്യമല്ലെന്നും അത് സമൂഹത്തിന്റെ മുഴുവൻ അവകാശമാണെന്നും കോടതി ഓർമ്മിപ്പിച്ചു.

കുവൈറ്റിന്റെ പരമാധികാരത്തെ ചോദ്യം ചെയ്യാൻ വിദേശ ശക്തികൾക്ക് അവകാശമില്ലെന്നും അതിർത്തികൾക്കപ്പുറത്ത് നിന്ന് അടിച്ചേൽപ്പിക്കുന്ന ഉത്തരവുകൾ കുവൈറ്റ് അംഗീകരിക്കില്ലെന്നും കോടതി ചൂണ്ടിക്കാട്ടി. രാജ്യത്തെ സ്ഥാപനങ്ങളെയും ഭരണാധികാര ചിഹ്നങ്ങളെയും വിദേശ ഗൂഢാലോചനകളുടെ ലക്ഷ്യസ്ഥാനമാക്കാൻ അനുവദിച്ച് നൽകില്ലെന്നും സ്റ്റേറ്റ് സെക്യൂരിറ്റി സർക്യൂട്ട് വിധിന്യായത്തിൽ വ്യക്തമാക്കി.