കുവൈത്ത് ധനമന്ത്രി ഡോ. നൂറ അൽ-ഫസാം രാജിവച്ചു

കുവൈത്ത് സിറ്റി: കുവൈത്ത് ധനകാര്യ മന്ത്രി ഡോ. നൂറ അൽ-ഫസാം രാജിവച്ചതായി ഔദ്യോഗിക വാർത്താ ഏജൻസിയായ കുന റിപ്പോർട്ട് ചെയ്തു. അമീർ ഷെയ്ഖ് മിഷാൽ അൽ-അഹമ്മദ് അൽ-ജാബർ അൽ-സബാഹ് രാജി സ്വീകരിച്ചതായി തിങ്കളാഴ്ച പുറത്തിറക്കിയ അമീരി ഉത്തരവിൽ പറയുന്നു.

രാജിക്ക് പിന്നിലെ കാരണമെന്താണെന്ന് ഔദ്യോഗികമായി വ്യക്തമാക്കിയിട്ടില്ല. അതേസമയം, ഇലക്ട്രിസിറ്റി, ജലം, പുനരുപയോഗ ഊർജ്ജം എന്നീ വകുപ്പുകളുടെ മന്ത്രിയായ ഡോ. സബീഹ് അൽ-മുഖൈസീമിന് ധനകാര്യ മന്ത്രാലയത്തിന്റെ താൽക്കാലിക ചുമതല നൽകിയിട്ടുണ്ട്.

പ്രധാനമന്ത്രി ഷെയ്ഖ് അഹമ്മദ് അബ്ദുല്ല അൽ-അഹമ്മദ് അൽ-സബാഹിന്റെ നേതൃത്വത്തിലുള്ള മന്ത്രിസഭയിൽ, 2024 ഓഗസ്റ്റിൽ നടന്ന ആദ്യ മന്ത്രിസഭാ പുനഃസംഘടനയിലാണ് ഡോ. നൂറ അൽ-ഫസാം ധനമന്ത്രിയായി നിയമിതയായത്.2024 മെയ് മാസത്തിൽ നിലവിലെ സർക്കാർ സത്യപ്രതിജ്ഞ ചെയ്ത് അധികാരമേറ്റതിന് ശേഷമുള്ള രണ്ടാമത്തെ മന്ത്രിസഭയായിരുന്നു ഇത്.

അമീർ പാർലമെന്റ് പിരിച്ചുവിടുകയും ഭരണഘടനയുടെ ചില ഭാഗങ്ങൾ താൽക്കാലികമായി റദ്ദാക്കുകയും ചെയ്തതിന് ശേഷം രൂപീകരിക്കപ്പെട്ട ആദ്യ സർക്കാരായിരുന്നു ഇത്.