അൽ മുസൈനി എക്സ്ചേഞ്ചിന്റെ പുതിയ ശാഖ സാദ് അൽ അബ്ദുള്ളയിൽ പ്രവർത്തനം ആരംഭിച്ചു

കുവൈറ്റ് സിറ്റി: പ്രമുഖ ധനകാര്യ ഇടപാട് സ്ഥാപനമായ അൽ മുസൈനി എക്സ്ചേഞ്ചിന്റെ ഏറ്റവും പുതിയ ശാഖ അൽ ജഹ്റ ഗവർണറേറ്റിലെ സാദ് അൽ അബ്ദുള്ളയിൽ പ്രവർത്തനം ആരംഭിച്ചു. ബുധനാഴ്ച (ഓഗസ്റ്റ് 5) ഉച്ചകഴിഞ്ഞ് 3:30-ന് നടന്ന ചടങ്ങിൽ മാനേജ്‌മെന്റ് പ്രതിനിധികളുടെയും പ്രമുഖരുടെയും സാന്നിധ്യത്തിൽ പുതിയ ശാഖയുടെ ഉദ്ഘാടനം അൽ മുസൈനി എക്സ്ചേഞ്ച് ജനറൽ മാനേജർ ശ്രീ. ഹ്യൂ ഫെർണാണ്ടസ് നിർവ്വഹിച്ചു.

സാദ് അൽ അബ്ദുള്ള ഏരിയ, ബ്ലോക്ക് 8, സ്ട്രീറ്റ് 24-ലെ ബിൽഡിംഗ് നമ്പർ 900079, ഗ്രൗണ്ട് ഫ്ലോറിലാണ് (ഷോപ്പ് നമ്പർ 14) പുതിയ ശാഖ സജ്ജീകരിച്ചിരിക്കുന്നത്. 1942 മുതൽ കുവൈറ്റിലെ ധനകാര്യ സേവന രംഗത്ത് വിശ്വാസ്യതയോടെ പ്രവർത്തിക്കുന്ന അൽ മുസൈനി, ഉപഭോക്താക്കൾക്ക് കൂടുതൽ വേഗത്തിലും സുരക്ഷിതമായും പണമിടപാട് സേവനങ്ങൾ ലഭ്യമാക്കുക എന്ന ലക്ഷ്യത്തോടെയാണ് ശൃംഖല കൂടുതൽ ശക്തമാക്കുന്നത്. പുതിയ ശാഖ പ്രവർത്തനം തുടങ്ങിയതോടെ പ്രദേശത്തെ സ്വദേശികൾക്കും പ്രവാസികൾക്കും മികച്ച എക്സ്ചേഞ്ച് സേവനങ്ങൾ കൂടുതൽ എളുപ്പത്തിൽ ലഭ്യമാകും.

ശാഖാ ശൃംഖല വികസിപ്പിക്കുന്നതിനൊപ്പം, ഡിജിറ്റൽ രംഗത്തും അൽ മുസൈനി മുന്നേറ്റം തുടരുകയാണ്. ഉപഭോക്താക്കൾക്ക് എളുപ്പത്തിൽ ഉപയോഗിക്കാവുന്ന മൊബൈൽ ആപ്ലിക്കേഷനിലൂടെ 24/7 സേവനങ്ങൾ ലഭ്യമാണ്. പുതിയ ഉപഭോക്താക്കൾക്ക് രജിസ്റ്റർ ചെയ്യാനും ഗുണഭോക്താക്കളെ ചേർക്കാനും വെസ്റ്റേൺ യൂണിയൻ, വിസ ഡയറക്ട് എന്നിവ വഴി തൽക്ഷണം പണം അയക്കാനും ആപ്പിലൂടെ സാധിക്കുമെന്നും അധികൃതർ അറിയിച്ചു.