കുവൈറ്റിലെ ഉപഭോക്താക്കൾക്ക് വിദേശ പണമിടപാടുകൾ ഇനി കൂടുതൽ എളുപ്പമാകും ; അൽ മുസൈനി എക്സ്ചേഞ്ചും മണിഗ്രാമും തന്ത്രപ്രധാന പങ്കാളിത്ത കാരാറിൽ ഒപ്പുവച്ചു

കുവൈറ്റ് സിറ്റി: കുവൈറ്റിലെ പ്രമുഖ ധനകാര്യ സേവന ദാതാക്കളായ അൽ മുസൈനി എക്സ്ചേഞ്ചും പ്രമുഖ ആഗോള പണമിടപാട് ശൃംഖലയായ മണിഗ്രാമും (MoneyGram) തമ്മിൽ തന്ത്രപ്രധാനമായ പങ്കാളിത്ത കരാറിൽ ഒപ്പുവെച്ചു. കുവൈറ്റിലെ പ്രവാസികൾക്കും സ്വദേശികൾക്കും വിദേശങ്ങളിലേക്ക് കൂടുതൽ സുരക്ഷിതവും ലളിതവുമായി പണം അയക്കുന്നതിനുള്ള സൗകര്യങ്ങൾ വിപുലീകരിക്കുന്നതിന്റെ ഭാഗമായാണ് ഈ പുതിയ സഹകരണം. ഇതോടെ അൽ മുസൈനിയുടെ വിപുലമായ ശൃംഖല വഴി ഉപഭോക്താക്കൾക്ക് മണിഗ്രാമിന്റെ മികച്ച ആഗോള സേവനങ്ങൾ പ്രയോജനപ്പെടുത്താൻ സാധിക്കും.

പുതിയ കരാറിലൂടെ ലോകത്തിലെ 200-ലധികം രാജ്യങ്ങളിലേക്കും വിവിധ പ്രദേശങ്ങളിലേക്കും അതിവേഗത്തിൽ പണം അയക്കാനും സ്വീകരിക്കാനും സാധിക്കും. ഗുണഭോക്താക്കൾക്ക് തങ്ങളുടെ ബാങ്ക് അക്കൗണ്ടുകളിലേക്കോ മൊബൈൽ വാലറ്റുകളിലേക്കോ നേരിട്ട് തുക കൈപ്പറ്റാം. കൂടാതെ ആഗോളതലത്തിലുള്ള അഞ്ച് ലക്ഷത്തോളം വരുന്ന മണിഗ്രാം ഔട്ട്‌ലെറ്റുകൾ വഴി നേരിട്ട് പണമായി (ക്യാഷ് പിക്ക്അപ്പ്) തുക കൈപ്പറ്റാനുള്ള സവിശേഷമായ സൗകര്യവും ഈ പങ്കാളിത്തത്തിലൂടെ ലഭ്യമാക്കിയിട്ടുണ്ട്.

കുവൈറ്റിലുടനീളമുള്ള അൽ മുസൈനിയുടെ 145-ലധികം ബ്രാഞ്ചുകളിലൂടെയും ഡിജിറ്റൽ പ്ലാറ്റ്‌ഫോമുകളിലൂടെയും ഈ ലോകോത്തര സേവനങ്ങൾ ലഭ്യമാകും. സുരക്ഷിതവും വേഗതയേറിയതുമായ വിദേശ പണമിടപാടുകൾ ഉറപ്പാക്കുന്നതിനൊപ്പം, ഉപഭോക്താക്കളുടെ ആവശ്യങ്ങൾക്ക് മുൻഗണന നൽകുന്ന മികച്ച സാമ്പത്തിക പങ്കാളികളാകാൻ ഈ സഹകരണം സഹായിക്കുമെന്ന് അൽ മുസൈനി എക്സ്ചേഞ്ച് ജനറൽ മാനേജർ ഹഗ് ഫെർണാണ്ടസും മണിഗ്രാം പ്രതിനിധികളും വ്യക്തമാക്കി.