ആഗോള സമൃദ്ധി സൂചികയിൽ അറബ്-ഗൾഫ് രാജ്യങ്ങളിൽ ഒന്നാമതായി കുവൈറ്റ് ; ആഗോളതലത്തിൽ 50-ാം സ്ഥാനം

കുവൈറ്റ് സിറ്റി: പ്രമുഖ അന്താരാഷ്ട്ര ഗവേഷണ സ്ഥാപനമായ ലെഗാറ്റം ഇൻസ്റ്റിറ്റ്യൂട്ട് പുറത്തുവിട്ട 2026-ലെ ഗ്ലോബൽ പ്രോസ്പെരിറ്റി ഇൻഡക്സിൽ (ആഗോള സമൃദ്ധി സൂചിക) അറബ്, ഗൾഫ് മേഖലയിൽ കുവൈറ്റ് ഒന്നാം സ്ഥാനം നേടി. 161 രാജ്യങ്ങൾ ഉൾപ്പെട്ട ആഗോള പട്ടികയിൽ 50-ാം സ്ഥാനത്താണ് കുവൈറ്റ്. കേവലം സാമ്പത്തിക വളർച്ചയും മൊത്ത ആഭ്യന്തര ഉൽപ്പാദനവും (ജി.ഡി.പി) മാത്രം മാനദണ്ഡമാക്കാതെ, രാജ്യത്തിന്റെ വികസനം, വ്യക്തിസ്വാതന്ത്ര്യം, സാമൂഹിക അന്തരീക്ഷം എന്നിവ സമഗ്രമായി വിലയിരുത്തിയാണ് ഈ പഠന റിപ്പോർട്ട് തയാറാക്കിയിരിക്കുന്നത്.

ജീവിതനിലവാരം, സാമ്പത്തിക സ്വാതന്ത്ര്യം, ആരോഗ്യ മേഖല എന്നിവയിൽ കുവൈറ്റ് കൈവരിച്ച മുന്നേറ്റമാണ് മികച്ച നേട്ടത്തിന് വഴിയൊരുക്കിയത്. ജീവിതനിലവാരത്തിൽ ആഗോളതലത്തിൽ 22-ാം സ്ഥാനവും, സാമ്പത്തിക സ്വാതന്ത്ര്യത്തിൽ 21-ാം സ്ഥാനവും, ആരോഗ്യ മേഖലയിൽ 37-ാം സ്ഥാനവും കുവൈറ്റ് സ്വന്തമാക്കി. കൂടാതെ വികസന സൂചികയിൽ 42-ാം സ്ഥാനവും, വ്യക്തിസ്വാതന്ത്ര്യത്തിൽ 59-ാം സ്ഥാനവും, സിവിൽ സമാധാനത്തിൽ 62-ാം സ്ഥാനവുമാണ് രാജ്യത്തിനുള്ളത്. 130-ലധികം സൂചകങ്ങളും ആറു ലക്ഷത്തോളം ഡാറ്റാ പോയിന്റുകളും അപഗ്രഥിച്ചാണ് റാങ്കിംഗ് നിശ്ചയിച്ചിരിക്കുന്നത്.

ജി.സി.സി മേഖലയിലെ മറ്റ് രാജ്യങ്ങളിൽ യു.എ.ഇ ആഗോളതലത്തിൽ 51-ാം സ്ഥാനത്തുണ്ട്. ഒമാൻ 54, ഖത്തർ 78, ബഹ്‌റൈൻ 80, സൗദി അറേബ്യ 97 എന്നിങ്ങനെയാണ് മറ്റ് ഗൾഫ് രാജ്യങ്ങളുടെ ആഗോള റാങ്കിംഗ്. രാജ്യത്തിന്റെ കേവല ധനസ്ഥിതിക്ക് ഉപരിയായി സാമൂഹിക ഭദ്രതയ്ക്കും വ്യക്തിസ്വാതന്ത്ര്യത്തിനും പ്രാധാന്യം നൽകുന്നതിൽ കുവൈറ്റ് മുന്നിട്ടുനിൽക്കുന്നുവെന്ന് റിപ്പോർട്ട് വ്യക്തമാക്കി.