ദേശീയ ഐക്യ ദിനവും കേരള പിറവി ദിനവും പ്രമാണിച്ച്‌ പരിസ്ഥിതി സംരക്ഷണത്തിന്റെ പ്രാധാന്യം വിളിച്ചോതി ARMS4U കുവൈറ്റ് സംഘടിപ്പിച്ച ബീച്ച് ക്ലീനിംഗ് ക്യാമ്പെയിൻ ശ്രദ്ധേയമായി

കുവൈറ്റ്, ഒക്ടോബർ 31: ദേശീയ ഐക്യ ദിനവും കേരള പിറവി ദിനവും പ്രമാണിച്ച്‌ പരിസ്ഥിതി സംരക്ഷണ ബോധവത്കരണത്തിന്റെ ഭാഗമായി  ARMS4U കുവൈറ്റ് അഞ്ജഫ ബീച്ചിൽ ഒക്ടോബർ 31 വെള്ളിയാഴ്ച ബീച്ച് ക്ലീനിംഗ് ക്യാമ്പെയിൻ സംഘടിപ്പിച്ചു.

രാവിലെ ആറരയ്ക്ക് ആരംഭിച്ച പരിപാടിയിൽ സംഘടനയുടെ അംഗങ്ങളും കുടുംബാംഗങ്ങളും യുവാക്കളും ഉൾപ്പെടെ നിരവധി പേർ പങ്കെടുത്തു. തീരപ്രദേശത്ത് നിന്നുള്ള മാലിന്യങ്ങൾ നീക്കംചെയ്ത് കടൽ തീരവും സമീപ പ്രദേശവും ശുചിയായി പരിപാലിക്കുന്നതിൽ സംഘടനയുടെ സന്നദ്ധ പ്രവർത്തകർ സജീവമായി പങ്കുചേർന്നു.

പങ്കെടുത്തവരോടുള്ള നന്ദി പ്രകടിപ്പിച്ച ARMS4U പ്രതിനിധികൾ, ഇത്തരത്തിലുള്ള കൂട്ടായ്മകൾ പരിസ്ഥിതി ബോധവും സാമൂഹിക ഉത്തരവാദിത്വവും വളർത്തുന്നതിൽ പ്രധാന പങ്ക് വഹിക്കുന്നതായി വ്യക്തമാക്കി. തുടർന്നും സമൂഹത്തിനും പരിസ്ഥിതിക്കും വേണ്ടി ARMS4U കുവൈറ്റ് ഇത്തരത്തിലുള്ള സമാനമായ  പൊതുതാൽപ്പര്യ പ്രവർത്തനങ്ങൾ തുടരുമെന്നും അറിയിച്ചു.