ജി.സി.സി എക്സൈസ് നികുതി കരട് നിയമത്തിന് കുവൈറ്റ് മന്ത്രിസഭയുടെ അംഗീകാരം; അടിസ്ഥാന സൗകര്യ വികസന പദ്ധതികൾ വേഗത്തിലാക്കാൻ തീരുമാനം

ജി.സി.സി എക്സൈസ് നികുതി കരട് നിയമത്തിന് കുവൈറ്റ് മന്ത്രിസഭയുടെ അംഗീകാരം; അടിസ്ഥാന സൗകര്യ വികസന പദ്ധതികൾ വേഗത്തിലാക്കാൻ തീരുമാനം

കുവൈറ്റ് സിറ്റി: ജി.സി.സി (ഗൾഫ് സഹകരണ കൗൺസിൽ) രാജ്യങ്ങൾക്കായുള്ള ഏകീകൃത എക്സൈസ് നികുതി കരാറിനും (Unified Excise Tax Agreement) അതിന്റെ ഭേദഗതികൾക്കും സംബന്ധിച്ച കരട് ഓർഡിനൻസ് നിയമത്തിന് കുവൈറ്റ് മന്ത്രിസഭ അംഗീകാരം നൽകി. പ്രധാനമന്ത്രി ശൈഖ് അഹമ്മദ് അബ്ദുള്ള അൽ-അഹമ്മദ് അൽ-സബാഹിന്റെ അധ്യക്ഷതയിൽ ചേർന്ന പ്രതിവാര മന്ത്രിസഭാ യോഗത്തിലാണ് തീരുമാനം. അംഗീകാരം നൽകിയ കരട് നിയമം തുടർനടപടികൾക്കായി അമീർ ശൈഖ് മെഷാൽ അൽ-അഹമ്മദ് അൽ-ജാബർ അൽ-സബാഹിന് സമർപ്പിച്ചു.

രാജ്യത്തെ പ്രധാന വികസന പദ്ധതികൾ നിർദ്ദിഷ്ട സമയപരിധിക്കുള്ളിൽ പൂർത്തിയാക്കണമെന്ന് മന്ത്രിസഭ കർശന നിർദ്ദേശം നൽകി. പൊതുമരാമത്ത് മന്ത്രി ഡോ. നൂറ അൽ-മഷാൻ സമർപ്പിച്ച ദൃശ്യവിവരണം (Visual Presentation) യോഗം വിലയിരുത്തി. പ്രധാന ഹൈവേകളുടെ പരിപാലനം, മഴവെള്ള ഓടകളുടെ ശുചീകരണം, ട്രാഫിക് സിഗ്നലുകൾ സ്ഥാപിക്കൽ, പുതിയ കുവൈറ്റ് അന്താരാഷ്ട്ര വിമാനത്താവളത്തിന്റെ (T2) അടിസ്ഥാന സൗകര്യ വികസനവും റോഡ് ശൃംഖലയും, രാജ്യത്തെ പ്രാദേശിക റോഡുകളുടെ സമഗ്രമായ അറ്റകുറ്റപ്പണികൾ എന്നിവ വേഗത്തിലാക്കാൻ മന്ത്രിസഭ നിർദ്ദേശിച്ചു. ഗതാഗതക്കുരുക്ക് കുറയ്ക്കാനും റോഡ് ഉപയോക്താക്കളുടെ സുരക്ഷ ഉറപ്പാക്കാനും ലക്ഷ്യമിട്ടാണിത്.

കൂടാതെ, വടക്കൻ കബ്ദിലെ മലിനജല ശുദ്ധീകരണ പ്ലാന്റ് പദ്ധതിയുടെ തറക്കല്ലിടൽ ചടങ്ങ് ചൈനീസ് അംബാസഡർ യാങ് ക്സിന്റെ സാന്നിധ്യത്തിൽ അടുത്തിടെ നിർവ്വഹിച്ചതായി മന്ത്രി അറിയിച്ചു. അമീർ, കിരീടാവകാശി ശൈഖ് സബാഹ് ഖാലിദ് അൽ-ഹംദ് അൽ-സബാഹ്, പ്രധാനമന്ത്രി എന്നിവരുടെ നേരിട്ടുള്ള നിർദ്ദേശപ്രകാരമാണ് പദ്ധതി നടപ്പിലാക്കുന്നത്.