സെന്റ് ബേസിൽ ഇടവകയുടെ ക്രിസ്റ്റൽ ജൂബിലി ആഘോഷങ്ങൾക്ക് പ്രൗഢോജ്ജ്വല സമാപനം

കുവൈറ്റ് സിറ്റി: സെന്റ് ബേസിൽ ഇന്ത്യൻ ഓർത്തഡോക്സ് ഇടവകയുടെ പതിനഞ്ചാം വാർഷികത്തോടനുബന്ധിച്ച് ഒരു വർഷം നീണ്ടുനിന്ന ക്രിസ്റ്റൽ ജൂബിലി ആഘോഷങ്ങൾക്ക് പ്രൗഢോജ്ജ്വല സമാപനം. 2026 ഒക്ടോബർ 22-ന് എൻ.ഇ.സി.കെ. (NECK) കോമ്പൗണ്ടിൽ നടന്ന പ്രൗഢഗംഭീരമായ സമാപന സമ്മേളനത്തോടെയാണ് ആഘോഷങ്ങൾക്ക് തിരശ്ശീല വീണത്.

2011 ഒക്ടോബർ 2-ന് രൂപീകൃതമായ ഇടവകയുടെ ക്രിസ്റ്റൽ ജൂബിലി ആഘോഷങ്ങൾക്ക് 2025 നവംബർ 14-നാണ് ഔദ്യോഗിക തുടക്കമായത്. വിശ്വാസം, കൂട്ടായ്മ, ജീവകാരുണ്യം, സഭാസ്നേഹം എന്നിവയ്ക്ക് പ്രാധാന്യം നൽകിക്കൊണ്ട് സംഘടിപ്പിച്ച വിവിധ വൈവിധ്യമാർന്ന പരിപാടികൾ ജൂബിലി ആഘോഷങ്ങൾക്ക് മാറ്റുകൂട്ടി.

ജൂബിലി ആഘോഷങ്ങളുടെ പ്രധാന ഭാഗമായി വയനാട് ജില്ലയിലെ ചിങ്ങേരി സെന്റ് മേരീസ് ഇടവകാംഗമായ നിർധന കുടുംബത്തിന് വീട് നിർമ്മിച്ചുനൽകിയത് മികച്ച ജീവകാരുണ്യ മാതൃകയായി. കൂടാതെ, ഇടവകയുടെ വളർച്ചയിൽ നിർണായക പങ്കുവഹിച്ച ഭദ്രാസന മെത്രാപ്പോലീത്ത അലക്സിയോസ് മാർ യൂസേബിസ് തിരുമേനിയെയും, മുൻ വികാരിമാർ, മുൻകാല ട്രസ്റ്റിമാർ, സെക്രട്ടറിമാർ എന്നിവരെയും ചടങ്ങിൽ ആദരിച്ചു.

ഇടവകയുടെ രൂപീകരണത്തിന് നേതൃത്വം നൽകിയ മുൻ കൊൽക്കത്ത ഭദ്രാസനാധിപനും നിലവിൽ മലങ്കര ഓർത്തഡോക്സ് സുറിയാനി സഭയുടെ കൊല്ലം ഭദ്രാസനാധിപനുമായ അഭിവന്ദ്യ ഡോ. ജോസഫ് മാർ ദിവന്നാസിയോസ് മെത്രാപ്പോലീത്ത സമാപന സമ്മേളനത്തിൽ മുഖ്യാതിഥിയായിരുന്നു. ഇടവകയുടെ രൂപീകരണകാലത്ത് പ്രവർത്തിച്ചവരുടെ സേവനങ്ങളെ അനുസ്മരിച്ച തിരുമേനി, ഇടവകയുടെ വളർച്ചയ്ക്കായി മുൻകാലങ്ങളിൽ പ്രവർത്തിച്ചവരുടെയും ഇന്നും അക്ഷീണം പ്രവർത്തിക്കുന്നവരുടെയും സംഭാവനകളെ പ്രത്യേകം അഭിനന്ദിച്ചു.

ഇടവക വികാരി ഫാ. അജു കെ. വർഗീസിന്റെ അധ്യക്ഷതയിൽ നടന്ന സമ്മേളനത്തിൽ ഇടവകയുടെ രൂപീകരണ ചരിത്രവും വളർച്ചയുടെ നാൾവഴികളും ജൂബിലി ആഘോഷങ്ങളുടെ പ്രധാന സംഭവങ്ങളും ഉൾക്കൊള്ളുന്ന ‘ക്രിസ്റ്റൽ ജൂബിലി സ്മരണിക’ പ്രകാശനം ചെയ്തു.

സമാപന സമ്മേളനത്തിൽ സഭാ മാനേജിംഗ് കമ്മിറ്റി അംഗം പോൾ വർഗീസ്, ഭദ്രാസന കൗൺസിൽ അംഗം ദീപക് പണിക്കർ, എൻ.ഇ.സി.കെ. ഭാരവാഹികളായ റോയി കെ. യോഹന്നാൻ, അജോഷ് മാത്യു, കുവൈറ്റ് മഹാ ഇടവക വികാരി ഫാ. ഡോ. ബിജു പാറക്കൽ, സഹ വികാരി ഫാ. ബിജു ഡാനിയേൽ, അഹ്മദി പഴയപള്ളി വികാരി ഫാ. കെ. എ. വർഗീസ്, സഹോദരസഭകളിലെ വൈദികർ, ഇടവക ട്രസ്റ്റി ലൈജു പി. ഐസക്ക്, ക്രിസ്റ്റൽ ജൂബിലി ഫിനാൻസ് കൺവീനർ ബിനു ചെമ്പലായം തുടങ്ങിയവർ ആശംസകൾ നേർന്നു.

വിവിധ ആത്മീയ സംഘടനകളുടെയും സൺഡേ സ്കൂൾ കുട്ടികളുടെയും ദൃശ്യ-ശ്രവ്യ കലാപരിപാടികൾ ആഘോഷങ്ങൾക്ക് കൂടുതൽ മിഴിവേകി. ക്രിസ്റ്റൽ ജൂബിലി ജനറൽ കൺവീനർ അലക്സ് മാത്യു പുത്തൂർ സ്വാഗതവും ഇടവക സെക്രട്ടറി മാർക്കോസ് സ്കറിയ നന്ദിയും അർപ്പിച്ചു. സഭാ-ഭദ്രാസന പ്രതിനിധികൾ, വൈദികർ, മറ്റ് പ്രമുഖർ, ധാരാളം ഇടവകാംഗങ്ങൾ എന്നിവർ ചടങ്ങിൽ പങ്കെടുത്തു.

വിശ്വാസത്തിൽ വേരൂന്നി, സ്നേഹത്തിലൂടെ വളർന്ന്, സേവനത്തിലൂടെ സമൂഹത്തിന് വെളിച്ചമേകുന്ന ഇടവകയുടെ പതിനഞ്ചുവർഷത്തെ പ്രയാണത്തിന്റെ ഉജ്ജ്വല സാക്ഷ്യമായി ക്രിസ്റ്റൽ ജൂബിലി ആഘോഷങ്ങൾ മാറി. ഐക്യത്തിന്റെയും ആത്മീയ വളർച്ചയുടെയും പുതിയ അധ്യായങ്ങളിലേക്ക് മുന്നേറാനുള്ള പ്രതിജ്ഞയോടെയാണ് ആഘോഷങ്ങൾ സമാപിച്ചത്.