കുവൈറ്റ് അബു ഫത്തീറ ‘ഖുറൈൻ മാർക്കറ്റിൽ’ സംയുക്ത സർക്കാർ ഏജൻസികളുടെ ശക്തമായ സുരക്ഷാ പരിശോധന : നിരവധി പേർ പിടിയിൽ

കുവൈറ്റ് സിറ്റി: മുബാറക് അൽ-കബീർ ഗവർണറേറ്റ് സെക്യൂരിറ്റി ഡയറക്ടറേറ്റിന്റെ നേതൃത്വത്തിൽ അബു ഫത്തീറ വ്യാവസായിക മേഖലയിലെ ‘ഖുറൈൻ മാർക്കറ്റുകളിൽ’ (Abu Futeira Industrial Area) വ്യാപകമായ സുരക്ഷാ പരിശോധന നടത്തി. രാജ്യത്ത് നിയമവാഴ്ച ഉറപ്പുവരുത്തുന്നതിനും ഇഖാമ ലംഘകരെയും നിയമനടപടികൾ നേരിടുന്നവരെയും കണ്ടെത്താനുമായിരുന്നു പരിശോധന. ജനറൽ ട്രാഫിക് ഡിപ്പാർട്ട്‌മെന്റ്, ക്രിമിനൽ ഇൻവെസ്റ്റിഗേഷൻ വിഭാഗം, കുവൈറ്റ് മുൻസിപ്പാലിറ്റി, വാണിജ്യ വ്യവസായ മന്ത്രാലയം, ഫുഡ് ആൻഡ് ന്യൂട്രീഷ്യൻ അതോറിറ്റി, മാൻപവർ അതോറിറ്റി എന്നിവയുടെ പങ്കാളിത്തത്തോടെ സംയുക്തമായാണ് ഈ സുരക്ഷാ കാമ്പയിൻ സംഘടിപ്പിച്ചത്.

പരിശോധനയിൽ 189 ഗതാഗത നിയമലംഘനങ്ങൾ രേഖപ്പെടുത്തുകയും ഗതാഗത ലംഘനം നടത്തിയ 2 വാഹനങ്ങളും കോടതി ഉത്തരവുള്ള 1 വാഹനവും കസ്റ്റഡിയിലെടുക്കുകയും ചെയ്തു. റോഡുകളിൽ ഉപേക്ഷിക്കപ്പെട്ട 37 വാഹനങ്ങളിൽ മുന്നറിയിപ്പ് സ്റ്റിക്കറുകൾ പതിപ്പിച്ചു. കൂടാതെ ഇഖാമ കാലാവധി കഴിഞ്ഞ 22 പേർ, മറ്റ് ഇഖാമ നിയമലംഘനം നടത്തിയ 6 പേർ, വിവിധ കേസുകളിൽ തിരയുന്ന 6 പേർ, തിരിച്ചറിയൽ രേഖകളില്ലാത്ത ഒരാൾ, അനധികൃതമായി മദ്യം കൈവശം വെച്ച ഒരാൾ എന്നിവരെ സുരക്ഷാ ഉദ്യോഗസ്ഥർ കസ്റ്റഡിയിലെടുത്തു.

വാണിജ്യ സമുച്ചയങ്ങളും സ്ഥാപനങ്ങളും കേന്ദ്രീകരിച്ച് നടത്തിയ പരിശോധനയിൽ കുവൈറ്റ് മുൻസിപ്പാലിറ്റി 42 ലംഘനങ്ങളും, വാണിജ്യ വ്യവസായ മന്ത്രാലയം 34 ലംഘനങ്ങളും, ഫുഡ് ആൻഡ് ന്യൂട്രീഷ്യൻ അതോറിറ്റി 16 ലംഘനങ്ങളും രേഖപ്പെടുത്തി. നിയമലംഘനം നടത്തിയവർക്കും പിടിയിലായവർക്കുമെതിരെ അതത് മന്ത്രാലയങ്ങളുടെയും അതോറിറ്റികളുടെയും അധികാരപരിധിയിൽ നിയമനടപടികൾ സ്വീകരിച്ചതായും, ഗൗരവകരമായ കേസുകൾ തുടർനടപടികൾക്കായി ബന്ധപ്പെട്ട വകുപ്പുകൾക്ക് കൈമാറിയതായും അധികൃതർ വ്യക്തമാക്കി.