ഭീകരവാദ സംഘത്തെ പിടികൂടിയെന്ന വാർത്ത വ്യാജം : സോഷ്യൽ മീഡിയ പ്രചാരണം തള്ളി കുവൈറ്റ് ആഭ്യന്തര മന്ത്രാലയം

കുവൈത്ത് സിറ്റി: രാജ്യത്തിനുള്ളിൽ ഭീകരവാദ സെല്ലിനെ (Terrorist Cell) പിടികൂടിയെന്ന രീതിയിൽ ചില സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിക്കുന്ന വാർത്തകൾ തീർത്തും അടിസ്ഥാനരഹിതമാണെന്ന് കുവൈത്ത് ആഭ്യന്തര മന്ത്രാലയം അറിയിച്ചു. ഇത്തരത്തിലുള്ള പ്രചാരണങ്ങൾക്ക് ഔദ്യോഗികമായി യാതൊരു അടിസ്ഥാനവുമില്ലെന്നും മന്ത്രാലയം വ്യക്തമാക്കി.

ദേശീയ സുരക്ഷയുമായി ബന്ധപ്പെട്ട ഏതൊരു വിഷയത്തിലും മന്ത്രാലയം പൂർണ്ണ സുതാര്യതയോടെയാണ് ഇടപെടുന്നത്. ഭീകരവാദ സെല്ലുകളോ മറ്റ് സുരക്ഷാ ഭീഷണികളോ സംബന്ധിച്ച് എന്തെങ്കിലും അന്വേഷണങ്ങളോ അറസ്റ്റുകളോ ഉണ്ടായാൽ, അത്തരം വിവരങ്ങൾ അംഗീകൃത നടപടിക്രമങ്ങൾ പാലിച്ചുകൊണ്ട് ഔദ്യോഗിക മാധ്യമങ്ങളിലൂടെ ജനങ്ങളെ നേരിട്ട് അറിയിക്കുമെന്നും അധികൃതർ വ്യക്തമാക്കി.

സോഷ്യൽ മീഡിയയിലൂടെ പ്രചരിക്കുന്ന സ്ഥിരീകരിക്കാത്ത വാർത്തകളിലോ അഭ്യൂഹങ്ങളിലോ വഞ്ചിക്കപ്പെടരുതെന്നും വാർത്തകളുടെ കൃത്യത ഉറപ്പുവരുത്താൻ ഔദ്യോഗിക സ്രോതസ്സുകളെ മാത്രം ആശ്രയിക്കണമെന്നും ആഭ്യന്തര മന്ത്രാലയം പൊതുജനങ്ങളോട് അഭ്യർത്ഥിച്ചു. ആഭ്യന്തര മന്ത്രാലയത്തിന്റെയും രാജ്യത്തെ മറ്റ് ഔദ്യോഗിക സ്ഥാപനങ്ങളുടെയും ഔദ്യോഗിക അക്കൗണ്ടുകൾ മാത്രമാണ് ഇത്തരം വിവരങ്ങൾക്കുള്ള ആധികാരിക സ്രോതസ്സ്.

പൊതുതാൽപ്പര്യത്തെ ബാധിക്കുന്ന രീതിയിലോ ജനങ്ങളിൽ ഭീതി സൃഷ്ടിക്കുന്ന തരത്തിലോ തെറ്റായ വിവരങ്ങളും വ്യാജ വാർത്തകളും നിർമ്മിക്കുന്നവർക്കും അത് പുനഃപ്രചരിപ്പിക്കുന്നവർക്കുമെതിരെ നിലവിലുള്ള നിയമങ്ങൾ അനുസരിച്ച് കർശനമായ നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി.