ഇറാനെതിരായ സൈനിക നടപടിയിൽ പങ്കാളിയായിട്ടില്ല : വാൾസ്ട്രീറ്റ് ജേണൽ റിപ്പോർട്ട് തള്ളി കുവൈറ്റ്

കുവൈറ്റ് സിറ്റി: ഇറാനെതിരെ നടത്തിയ സൈനിക നടപടികളിൽ കുവൈത്ത് പങ്കാളിയായെന്ന തരത്തിൽ പുറത്തുവന്ന മാധ്യമ വാർത്തകൾ പൂർണ്ണമായും തെറ്റാണെന്ന് കുവൈറ്റ് ഔദ്യോഗികമായി വ്യക്തമാക്കി. അമേരിക്കൻ പ്രമുഖ ദിനപത്രമായ ‘വാൾസ്ട്രീറ്റ് ജേണൽ’ (WSJ) പ്രസിദ്ധീകരിച്ച റിപ്പോർട്ടിലെ ആരോപണങ്ങളെ തള്ളിക്കൊണ്ടാണ് കുവൈത്ത് തങ്ങളുടെ നയം വ്യക്തമാക്കിയത്.

അയൽ രാജ്യങ്ങൾക്കെതിരെ ഏതെങ്കിലും തരത്തിലുള്ള ആക്രമണാത്മക സൈനിക നീക്കങ്ങൾ നടത്താനോ, അതിനായി രാജ്യത്തിന്റെ ഭൂപരിധി, വ്യോമാതിർത്തി, സമുദ്രാതിർത്തി എന്നിവ ഉപയോഗിക്കാനോ കുവൈറ്റ് അനുവാദം നൽകിയിട്ടില്ലെന്ന് യുഎസിലെ കുവൈറ്റ് അംബാസഡർ ശൈഖ സൈൻ അൽ സബാഹ് വ്യക്തമാക്കി. വാൾസ്ട്രീറ്റ് ജേണൽ എഡിറ്റോറിയൽ ബോർഡിന് അയച്ച ഔദ്യോഗിക കത്തിലാണ് അവർ ഈ കാര്യം ഉറപ്പിച്ചു പറഞ്ഞത്. ‘ബഹ്‌റൈൻ, കുവൈത്ത് യുദ്ധവിമാനങ്ങൾ ഇറാനിൽ ആക്രമണം നടത്തി’ എന്ന തലക്കെട്ടിൽ ജൂലൈ 24-നാണ് വാൾസ്ട്രീറ്റ് ജേണൽ റിപ്പോർട്ട് പ്രസിദ്ധീകരിച്ചത്.

അന്താരാഷ്ട്ര നിയമങ്ങൾ പാലിക്കുന്നതിനും, അയൽരാജ്യങ്ങളുടെ പരമാധികാരത്തെ ബഹുമാനിക്കുന്നതിനും, നയതന്ത്ര ചർച്ചകളിലൂടെ പ്രശ്നങ്ങൾ പരിഹരിക്കുന്നതിനുമാണ് കുവൈത്ത് എപ്പോഴും മുൻഗണന നൽകുന്നതെന്ന് അംബാസഡർ കത്തിൽ ചൂണ്ടിക്കാട്ടി. പശ്ചിമേഷ്യൻ മേഖലയിലെ സമാധാനത്തിനും സ്ഥിരതയ്ക്കും കൃത്യവും വസ്തുതാപരവുമായ വാർത്തകൾ അത്യാവശ്യമാണെന്നും, തെറ്റായ റിപ്പോർട്ട് തിരുത്താൻ വാൾസ്ട്രീറ്റ് ജേണൽ തയ്യാറാകണമെന്നും കുവൈറ്റ് ആവശ്യപ്പെട്ടു.