ഭക്ഷണത്തിലെ പോഷകമൂല്യങ്ങളെ സംബന്ധിച്ച വിവരങ്ങൾ കൃത്യമാണെന്ന് ഉറപ്പുവരുത്തണം ; റെസ്റ്റോറന്റുകൾക്ക് കർശന നിയമങ്ങളുമായി കുവൈറ്റ് മുൻസിപ്പൽ കൗൺസിൽ

കുവൈറ്റ് സിറ്റി: രാജ്യത്തെ റെസ്റ്റോറന്റുകളിലും കഫേകളിലും വിളമ്പുന്ന ഭക്ഷണത്തിലെ പോഷകമൂല്യങ്ങളെ (Nutritional Data) സംബന്ധിച്ച വിവരങ്ങൾ കൃത്യമാണെന്ന് ഉറപ്പുവരുത്താൻ കർശനമായ പുതിയ നിയമങ്ങൾ കുവൈറ്റ് മുൻസിപ്പൽ കൗൺസിൽ നിർദ്ദേശിച്ചു. മുൻസിപ്പൽ കൗൺസിൽ അംഗം ഫഹദ് അൽ അബ്ദൽജാദർ ആണ് ഇത് സംബന്ധിച്ച നിർദ്ദേശം സമർപ്പിച്ചത്. നിലവിൽ മെനുകളിലും മറ്റും നൽകുന്ന കലോറി, പ്രോട്ടീൻ, കാർബോഹൈഡ്രേറ്റ്സ് തുടങ്ങിയ വിവരങ്ങളിൽ പലപ്പോഴും അവ്യക്തതയും തെറ്റായ കണക്കുകളും കാണപ്പെടുന്നു എന്ന നിരീക്ഷണത്തെ തുടർന്നാണ് ഈ നീക്കം.

പ്രധാന നിർദ്ദേശങ്ങൾ:

മുൻകൂർ അനുമതി: ‘ന്യൂട്രീഷണൽ ലേബൽ അപ്രൂവൽ സർട്ടിഫിക്കറ്റ്’ ഇല്ലാതെ ഒരു റെസ്റ്റോറന്റിനും ഭക്ഷണത്തിന്റെ പോഷകവിവരങ്ങൾ പ്രദർശിപ്പിക്കാൻ അനുവാദമുണ്ടാകില്ല. അംഗീകൃത ലാബുകളിൽ നടത്തിയ പരിശോധനാ ഫലത്തിന്റെ അടിസ്ഥാനത്തിൽ മാത്രമേ ഈ സർട്ടിഫിക്കറ്റ് നൽകൂ.

ക്യു.ആർ കോഡ് സംവിധാനം: ഓരോ ഭക്ഷണ വിഭവത്തോടൊപ്പവും ക്യു.ആർ കോഡ് (QR Code) നിർബന്ധമാക്കും. ഇത് വഴി ഉപഭോക്താക്കൾക്കും പരിശോധനാ ഉദ്യോഗസ്ഥർക്കും ആ വിഭവത്തിന്റെ പോഷക ഗുണനിലവാര സർട്ടിഫിക്കറ്റ് നേരിട്ട് പരിശോധിക്കാൻ സാധിക്കും.

പരിശോധനകൾ: എല്ലാ മൂന്ന് മാസത്തിലും മുന്നറിയിപ്പില്ലാതെ റെസ്റ്റോറന്റുകളിൽ പരിശോധന നടത്തുകയും ഭക്ഷണസാമ്പിളുകൾ ശേഖരിക്കുകയും ചെയ്യും. റെസ്റ്റോറന്റുകളുടെ പേര് വെളിപ്പെടുത്താതെ ‘ബ്ലൈൻഡ് ടെസ്റ്റിംഗ്’ (Blind Testing) രീതിയിലായിരിക്കും ലാബ് പരിശോധനകൾ നടക്കുക.

ലംഘിച്ചാൽ കടുത്ത നടപടി:

പരിശോധനയിൽ കണ്ടെത്തുന്ന വിവരങ്ങളും മെനുവിൽ നൽകിയിരിക്കുന്ന വിവരങ്ങളും തമ്മിൽ 10 മുതൽ 15 ശതമാനത്തിൽ കൂടുതൽ വ്യത്യാസമുണ്ടെങ്കിൽ കർശന ശിക്ഷാ നടപടികൾ ഉണ്ടാകും:

ആദ്യ നിയമലംഘനം: ഔദ്യോഗിക മുന്നറിയിപ്പ് നൽകുകയും തെറ്റായ വിവരങ്ങൾ മെനുവിൽ നിന്ന് നീക്കം ചെയ്യുകയും വേണം.

രണ്ടാം തവണ: ‘വാണിജ്യപരമായ വഞ്ചന’, ‘ഉപഭോക്താവിന്റെ ആരോഗ്യം അപകടത്തിലാക്കൽ’ എന്നീ കുറ്റങ്ങൾ ചുമത്തി വൻതുക പിഴ ഈടാക്കും.

മൂന്നാം തവണ: പോഷകവിവരങ്ങൾ പ്രദർശിപ്പിക്കാനുള്ള ലൈസൻസ് സ്ഥിരമായി റദ്ദാക്കുകയും സ്ഥാപനം താൽക്കാലികമായി അടച്ചുപൂട്ടുകയും ചെയ്യും.

ആഗോളതലത്തിലെ മികച്ച മാതൃകകൾ പിന്തുടർന്നുകൊണ്ട് ജനങ്ങളുടെ ആരോഗ്യം സംരക്ഷിക്കാനും വിപണിയിൽ സുതാര്യത ഉറപ്പാക്കാനുമാണ് ഈ മാറ്റങ്ങളിലൂടെ ലക്ഷ്യമിടുന്നത്.