സമൂഹമാധ്യമങ്ങളിലെ വ്യാജ പരസ്യങ്ങൾക്കെതിരെ കുവൈറ്റ് എയർവേയ്‌സിന്റെ മുന്നറിയിപ്പ്

കുവൈറ്റ് സിറ്റി: കുവൈറ്റ് എയർവേയ്‌സിന്റെ പേരും ലോഗോയും ദുരുപയോഗം ചെയ്ത് സമൂഹമാധ്യമങ്ങളിൽ പ്രചരിക്കുന്ന വ്യാജ പരസ്യങ്ങൾക്കെതിരെ ജാഗ്രത പാലിക്കണമെന്ന് കമ്പനി അധികൃതർ അറിയിച്ചു. സൗജന്യ വിമാന ടിക്കറ്റുകൾ, ആകർഷകമായ സമ്മാനങ്ങൾ, ആകർഷകമായ ഓഫറുകൾ എന്നിവ വാഗ്ദാനം ചെയ്താണ് തട്ടിപ്പ് സംഘങ്ങൾ രംഗത്തെത്തിയിരിക്കുന്നത്.

ഇത്തരം വ്യാജ പരസ്യങ്ങളിലൂടെയും ലിങ്കുകളിലൂടെയും ആളുകളുടെ വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും ചോർത്താനുള്ള ശ്രമമാണ് നടക്കുന്നത്. അതിനാൽ സംശയകരമായ ലിങ്കുകളിൽ ക്ലിക്ക് ചെയ്യുകയോ വിവരങ്ങൾ പങ്കുവെക്കുകയോ ചെയ്യരുതെന്ന് കുവൈറ്റ് എയർവേയ്‌സ് വാർത്താക്കുറിപ്പിൽ മുന്നറിയിപ്പ് നൽകി.

കമ്പനിയുടെ ഔദ്യോഗികമായ എല്ലാ അറിയിപ്പുകളും ഓഫറുകളും കുവൈറ്റ് എയർവേയ്‌സിന്റെ ഔദ്യോഗിക വെബ്‌സൈറ്റിലൂടെയും (www.kuwaitairways.com) കമ്പനിയുടെ ബ്ലൂ ടിക്ക് ഉള്ള (Verified) ഔദ്യോഗിക സോഷ്യൽ മീഡിയ അക്കൗണ്ടുകളിലൂടെയും മാത്രമേ ലഭ്യമാകൂ. തട്ടിപ്പുകളിൽ പെടാതിരിക്കാൻ ഉപഭോക്താക്കൾ അതീവ ജാഗ്രത പാലിക്കണമെന്നും ഔദ്യോഗിക സ്രോതസ്സുകളിൽ നിന്ന് മാത്രം വിവരങ്ങൾ തേടണമെന്നും അധികൃതർ അഭ്യർത്ഥിച്ചു.