കുവൈറ്റ് അന്താരാഷ്ട്ര വിമാനത്താവളത്തിന് നേരെ വീണ്ടും ഡ്രോണ്‍ ആക്രമണം; ആര്‍ക്കും പരിക്കില്ല

കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളത്തിന് നേരെ വ്യാഴാഴ്ച പുലർച്ചെ നിരവധി തവണ ഡ്രോൺ ആക്രമണമുണ്ടായതായി പ്രാദേശിക പത്രം റിപ്പോർട്ട് ചെയ്തു . വിമാനത്താവള പരിസരത്ത് നിരവധി ഡ്രോണുകൾ പതിച്ചതായും എന്നാൽ സംഭവത്തിൽ ആർക്കും പരിക്കേറ്റിട്ടില്ലെന്നും ആഭ്യന്തര മന്ത്രാലയം അറിയിച്ചു.

പുലർച്ചെയോടെയാണ് വിമാനത്താവളത്തെ ലക്ഷ്യമാക്കി ഡ്രോണുകൾ എത്തിയത്. സുരക്ഷാ സംവിധാനങ്ങൾ ഉണർന്നു പ്രവർത്തിച്ചതിനാൽ വലിയ അപകടം ഒഴിവാക്കാനായി. ആക്രമണത്തിൽ വിമാനത്താവളത്തിലെ കെട്ടിടങ്ങൾക്കോ മറ്റ് സുപ്രധാന സൗകര്യങ്ങൾക്കോ കാര്യമായ നാശനഷ്ടങ്ങൾ സംഭവിച്ചിട്ടില്ലെന്നാണ് പ്രാഥമിക റിപ്പോർട്ടുകൾ സൂചിപ്പിക്കുന്നത്.

സംഭവത്തെത്തുടർന്ന് വിമാനത്താവളത്തിൽ അതീവ ജാഗ്രത പ്രഖ്യാപിച്ചു. ആഭ്യന്തര മന്ത്രാലയവും സുരക്ഷാ ഏജൻസികളും സ്ഥലത്തെത്തി വിശദമായ പരിശോധനകൾ നടത്തി. ഡ്രോണുകൾ എവിടെ നിന്നാണ് വന്നതെന്നും ഇതിന് പിന്നിൽ പ്രവർത്തിച്ചവർ ആരാണെന്നും കണ്ടെത്താൻ വിപുലമായ അന്വേഷണം ആരംഭിച്ചിട്ടുണ്ട്. രാജ്യത്തിന്റെ സുരക്ഷയും പൗരന്മാരുടെ സംരക്ഷണവും ഉറപ്പാക്കാൻ കർശന നടപടികൾ സ്വീകരിക്കുമെന്ന് അധികൃതർ വ്യക്തമാക്കി.

ആക്രമണത്തെത്തുടർന്ന് വിമാന സർവീസുകളെ ബാധിക്കാതിരിക്കാൻ ആവശ്യമായ മുൻകരുതലുകൾ സ്വീകരിച്ചിട്ടുണ്ട്. നിലവിൽ വിമാനത്താവളത്തിന്റെ പ്രവർത്തനം സാധാരണ നിലയിലാണെന്നും യാത്രക്കാർ ആശങ്കപ്പെടേണ്ടതില്ലെന്നും സിവിൽ ഏവിയേഷൻ അധികൃതർ അറിയിച്ചു. എങ്കിലും യാത്രക്കാർ കൃത്യമായ വിവരങ്ങൾക്കായി ഔദ്യോഗിക അറിയിപ്പുകൾ ശ്രദ്ധിക്കണമെന്ന് നിർദ്ദേശമുണ്ട്. മേഖലയിൽ നിലനിൽക്കുന്ന സംഘർഷാവസ്ഥയുടെ പശ്ചാത്തലത്തിൽ കുവൈറ്റ് സുരക്ഷാ ക്രമീകരണങ്ങൾ കൂടുതൽ ശക്തമാക്കിയിട്ടുണ്ട്