കുവൈറ്റിൽ ഫുഡ് ഡെലിവറി സർവീസുകൾക്ക് പുതിയ നിയന്ത്രണം; കമ്മീഷനും സർവീസ് ചാർജും പരിമിതപ്പെടുത്തി

കുവൈറ്റ് സിറ്റി: രാജ്യത്തെ ഫുഡ് ഡെലിവറി മേഖലയിൽ സുതാര്യത ഉറപ്പാക്കുന്നതിനും ഉപഭോക്താക്കളെയും ചെറുകിട സംരംഭകരെയും സംരക്ഷിക്കുന്നതിനുമായി പുതിയ നിയന്ത്രണങ്ങൾ പ്രഖ്യാപിച്ച് കുവൈറ്റ് സർക്കാർ. വാണിജ്യ-വ്യവസായ മന്ത്രി ഖലീഫ അൽ-അജീൽ പുറപ്പെടുവിച്ച 2026-ലെ പത്താം നമ്പർ മന്ത്രിതല തീരുമാനപ്രകാരമാണ് ഈ പരിഷ്കാരങ്ങൾ. ഗൾഫ് രാജ്യങ്ങളിൽ ഇത്തരമൊരു സമഗ്ര നിയമനിർമ്മാണം ആദ്യമായാണ്.

പ്രധാന മാറ്റങ്ങൾ:

• കമ്മീഷൻ നിരക്കുകളിൽ നിയന്ത്രണം: ഫുഡ് ഡെലിവറി പ്ലാറ്റ്‌ഫോമുകൾ റെസ്റ്റോറന്റുകളിൽ നിന്ന് ഈടാക്കുന്ന കമ്മീഷനും മറ്റ് ഫീസുകളും അടുത്ത മൂന്ന് വർഷത്തേക്ക് മാറ്റമില്ലാതെ തുടരണമെന്ന് ഉത്തരവിൽ വ്യക്തമാക്കുന്നു. നിലവിലുള്ള കമ്മീഷൻ നിരക്കുകൾ പരമാവധി പരിധിയായി നിശ്ചയിച്ചിട്ടുണ്ട്.
• ലൈസൻസ് പുതുക്കൽ: ഇലക്ട്രോണിക് പ്ലാറ്റ്‌ഫോമുകൾ വഴി ഡെലിവറി നടത്തുന്ന എല്ലാ കമ്പനികളും രണ്ട് മാസത്തിനുള്ളിൽ തങ്ങളുടെ ലൈസൻസ് ‘മാനേജ്‌മെന്റ് ഓഫ് ഡെലിവറി സർവീസസ്’ എന്ന വിഭാഗത്തിലേക്ക് മാറ്റണം.
• വിലയിലെ തുല്യത: റെസ്റ്റോറന്റുകളിൽ നേരിട്ട് നൽകുന്ന വിലയേക്കാൾ കൂടുതൽ തുക ഡെലിവറി ആപ്പുകൾ വഴി ഈടാക്കാൻ പാടില്ല. മറഞ്ഞിരിക്കുന്ന നിരക്കുകൾ (Hidden charges) പാടില്ലെന്നും ഉപഭോക്താക്കൾ ഓർഡർ പൂർത്തിയാക്കുന്നതിന് മുമ്പ് തന്നെ എല്ലാ നിരക്കുകളും വ്യക്തമായി കാണിക്കണമെന്നും നിയമം അനുശാസിക്കുന്നു.
• കുത്തക വിരുദ്ധ നടപടികൾ: ചില റെസ്റ്റോറന്റുകളെ മാത്രം കേന്ദ്രീകരിച്ചുള്ള പ്രത്യേക കരാറുകൾ (Exclusivity agreements) നിരോധിച്ചു. റെസ്റ്റോറന്റുകൾക്ക് ഒന്നിലധികം ഡെലിവറി പ്ലാറ്റ്‌ഫോമുകളുമായി ഒരേസമയം സഹകരിക്കാൻ ഇനി സ്വാതന്ത്ര്യമുണ്ടാകും.
• ഏകീകൃത നിരീക്ഷണ സംവിധാനം: പ്ലാറ്റ്‌ഫോമുകളുടെ പ്രവർത്തനം നിരീക്ഷിക്കുന്നതിനായി വാണിജ്യ മന്ത്രാലയം ഒരു ഏകീകൃത ഇലക്ട്രോണിക് സംവിധാനം ഏർപ്പെടുത്തും. ഡെലിവറി ഏജന്റുമാരുടെ വിവരങ്ങൾ, പരാതി പരിഹാര സംവിധാനങ്ങൾ എന്നിവ ഇതിന് കീഴിൽ വരും.

വിപണിയിലെ അനാവശ്യമായ മത്സരങ്ങൾ ഒഴിവാക്കാനും ചെറുകിട-ഇടത്തരം സംരംഭങ്ങളെ വൻകിട കമ്പനികളുടെ ചൂഷണത്തിൽ നിന്ന് സംരക്ഷിക്കാനുമാണ് ഈ നീക്കം. നിയമം ലംഘിക്കുന്ന കമ്പനികൾക്കെതിരെ മുന്നറിയിപ്പ് നൽകുന്നതു മുതൽ ലൈസൻസ് റദ്ദാക്കുന്നത് വരെയുള്ള കർശന നടപടികൾ സ്വീകരിക്കുമെന്നും മന്ത്രാലയം അറിയിച്ചു.