കുവൈത്തിൽ ഗതാഗത നിരീക്ഷണത്തിന് ആർട്ടിഫിഷ്യൽ ഇന്റലിജൻസ്; പൊതുഗതാഗതവും ഡെലിവറി സേവനങ്ങളും ഇനി എഐ നിഴലിൽ

കുവൈത്ത് സിറ്റി: കുവൈത്തിലെ പൊതുഗതാഗത സംവിധാനങ്ങളും ഡെലിവറി സേവനങ്ങളും നിരീക്ഷിക്കുന്നതിനായി ആർട്ടിഫിഷ്യൽ ഇന്റലിജൻസ് (AI) അധിഷ്ഠിത അത്യാധുനിക ഇലക്ട്രോണിക് സംവിധാനം വരുന്നു. ടാക്സികൾ, റൈഡ്-ഹെയ്‌ലിംഗ് സർവീസുകൾ, റെന്റ്-എ-കാർ, മറ്റ് പൊതുഗതാഗത വാഹനങ്ങൾ എന്നിവ പുതിയ നിരീക്ഷണ വലയത്തിലാകുമെന്ന് ട്രാഫിക് ഡിപ്പാർട്ട്‌മെന്റിലെ കോർഡിനേഷൻ ആൻഡ് എഡ്യൂക്കേഷൻ അസിസ്റ്റന്റ് ഡയറക്ടർ ജനറൽ ബ്രിഗേഡിയർ ജനറൽ ഖാലിദ് അൽ-അദ്വാനി അറിയിച്ചു.

സ്വകാര്യ മേഖലയുമായി സഹകരിച്ച് സംഘടിപ്പിച്ച ‘നാഷണൽ ഫോറം ഫോർ ട്രാൻസ്‌പോർട്ടേഷൻ ആൻഡ് സ്മാർട്ട് സർവീസസ്’ എന്ന സമ്മേളനത്തിലാണ് അദ്ദേഹം ഇക്കാര്യം വ്യക്തമാക്കിയത്. റോഡിലെ ഡ്രൈവർമാരുടെ പെരുമാറ്റം നിരീക്ഷിക്കാനും നിയമലംഘനങ്ങൾ സ്വയം കണ്ടെത്താനും പിഴകൾ തത്സമയം ഈടാക്കാനും ഈ ഇലക്ട്രോണിക് സംവിധാനത്തിലൂടെ സാധിക്കും.

ഭക്ഷണവും മറ്റ് അവശ്യസാധനങ്ങളും എത്തിക്കുന്ന ഡെലിവറി ആപ്പുകളുടെ പ്രവർത്തനവും പുതിയ സംവിധാനത്തിന്റെ പരിധിയിൽ വരും. ടാക്സികൾ, ട്രക്കുകൾ, പ്രതിദിന വാടകയ്ക്ക് നൽകുന്ന വാഹനങ്ങൾ എന്നിവയിൽ ഡ്രൈവർമാർ വരുത്തുന്ന അച്ചടക്കലംഘനങ്ങൾ തടയുന്നതിലൂടെ റോഡ് സുരക്ഷ വർധിപ്പിക്കുകയാണ് ഇതിന്റെ ലക്ഷ്യം. സാമൂഹിക വിരുദ്ധമായ ഗതാഗത പ്രവണതകൾ ഇല്ലാതാക്കാനും കുറ്റവാളികളെ എളുപ്പത്തിൽ പിടികൂടാനും ഈ സാങ്കേതികവിദ്യ സഹായിക്കും.

കുവൈത്തിന്റെ ‘വിഷൻ 2035’ വികസന ലക്ഷ്യങ്ങൾ കൈവരിക്കുന്നതിന്റെ ഭാഗമായാണ് ഗതാഗത മേഖലയിലെ ഈ ആധുനികവൽക്കരണം. സർക്കാർ ഏജൻസികൾ, ഡെലിവറി കമ്പനികൾ, സാങ്കേതിക വിദഗ്ധർ എന്നിവർ തമ്മിലുള്ള ഏകോപനം ഉറപ്പാക്കി ഗതാഗത മേഖലയെ കുറ്റമറ്റതാക്കാനാണ് മന്ത്രാലയം ലക്ഷ്യമിടുന്നത്. ഗതാഗത സുരക്ഷ എന്നത് നിയമം കൊണ്ടോ സാങ്കേതികവിദ്യ കൊണ്ടോ മാത്രം നേടാനാവില്ലെന്നും, ഡ്രൈവർമാരുടെ ബോധവൽക്കരണവും സ്ഥാപനങ്ങളുടെ പ്രതിബദ്ധതയും ഇതിൽ നിർണ്ണായകമാണെന്നും അൽ-അദ്വാനി കൂട്ടിച്ചേർത്തു.