കുവൈത്തിൽ സലൂണുകൾക്കും ബ്യൂട്ടി പാർലറുകൾക്കും പുതിയ ആരോഗ്യനിയമങ്ങൾ: കർശന മാനദണ്ഡങ്ങൾ നിലവിൽ വന്നു

കുവൈത്ത് സിറ്റി: പൊതുജനാരോഗ്യം ഉറപ്പാക്കുന്നതിൻ്റെ ഭാഗമായി കുവൈത്തിലെ സലൂണുകൾ, ബ്യൂട്ടി പാർലറുകൾ, വ്യക്തിഗത പരിചരണ സ്ഥാപനങ്ങൾ എന്നിവയ്ക്ക് കർശനമായ പുതിയ ആരോഗ്യ മാനദണ്ഡങ്ങൾ ഏർപ്പെടുത്തി. ആരോഗ്യ മന്ത്രി ഡോ. അഹമ്മദ് അൽ-അവാദി പുറത്തിറക്കിയ 194/2025 നമ്പർ ഉത്തരവ് ഔദ്യോഗിക ഗസറ്റായ ‘കുവൈത്ത് അൽ-യൗം’ൽ പ്രസിദ്ധീകരിച്ചു.

പുതിയ ആരോഗ്യ സ്ഥാപനങ്ങൾക്കായുള്ള സമഗ്രമായ മാർഗ്ഗനിർദ്ദേശക രേഖ നടപ്പാക്കാൻ ഉത്തരവിൽ നിഷ്കർഷിക്കുന്നു. പൊതുജനാരോഗ്യം സംരക്ഷിക്കുന്നതിന് പ്രസക്തമായ അധികാരികളുമായി സഹകരിച്ച് ആവശ്യമായ നടപടികൾ സ്വീകരിക്കേണ്ടതിൻ്റെ പ്രാധാന്യം മന്ത്രി അൽ-അവാദി ഊന്നിപ്പറഞ്ഞു.

പുതിയ നിയമങ്ങളും ആരോഗ്യപരമായ ആവശ്യകതകളും പാലിക്കുന്നതിനായി രാജ്യത്തെ ആരോഗ്യ സ്ഥാപനങ്ങൾക്കും സലൂണുകൾക്കും ബ്യൂട്ടി പാർലറുകൾക്കും 2026 മാർച്ച് 1 വരെ സമയം അനുവദിച്ചിട്ടുണ്ട്. ഈ സമയപരിധിക്കുള്ളിൽ എല്ലാ സ്ഥാപനങ്ങളും പുതിയ മാനദണ്ഡങ്ങൾക്കനുസൃതമായി പ്രവർത്തിക്കേണ്ടതുണ്ട്.

നിയമങ്ങൾ കൃത്യമായി നടപ്പാക്കുന്നത് ഉറപ്പാക്കാനും ആരോഗ്യപരമായ നിലവാരം ഉയർത്താനും പൊതുജനാരോഗ്യ സംരക്ഷണം മെച്ചപ്പെടുത്താനും ഈ നടപടി ലക്ഷ്യമിടുന്നു.