കുവൈത്തിൽ ബുധനാഴ്ചവരെ ശക്തമായ കാറ്റും പൊടിക്കാറ്റും തുടരാൻ സാധ്യത

കുവൈറ്റ് : രാജ്യത്ത് അതിശക്തമായ കാറ്റും പൊടിക്കാറ്റും തുടരുമെന്ന് കുവൈത്ത് കാലാവസ്ഥാ നിരീക്ഷണ വകുപ്പ് മുന്നറിയിപ്പ് നൽകി. വടക്ക് പടിഞ്ഞാറൻ ദിശയിൽ നിന്നുള്ള കാറ്റ് കാരണം രൂപപ്പെടുന്ന ഈ പ്രതികൂല കാലാവസ്ഥാ സാഹചര്യം ബുധനാഴ്ച (ഒക്ടോബർ 1) വൈകുന്നേരം വരെ തുടർന്നേക്കാം.

കാലാവസ്ഥാ നിരീക്ഷണ വകുപ്പ് ഡയറക്ടർ ദിരാർ അൽ-അലി കുവൈത്ത് വാർത്താ ഏജൻസിയോട് (KUNA) സംസാരിക്കവെ, കാറ്റിന്റെ വേഗത മണിക്കൂറിൽ 55 കിലോമീറ്ററിലധികം എത്താൻ സാധ്യതയുണ്ടെന്ന് അറിയിച്ചു. ഈ ശക്തമായ കാറ്റ് കാരണം അന്തരീക്ഷത്തിൽ പൊടിപടലങ്ങൾ ഉയരുകയും പല പ്രദേശങ്ങളിലും കാഴ്ചാപരിധി ഗണ്യമായി കുറയുകയും ചെയ്യും.

കൂടാതെ, കടൽ പ്രക്ഷുബ്ധമാകാനും ഉയർന്ന തിരമാലകൾ ഉണ്ടാകാനും സാധ്യതയുണ്ട്. വടക്ക് പടിഞ്ഞാറൻ ഭാഗത്തുനിന്നുള്ള ഉയർന്ന മർദ്ദത്തിന്റെ വ്യാപനമാണ് ഈ കാലാവസ്ഥാ വ്യതിയാനത്തിന് കാരണമെന്ന് അധികൃതർ വിശദീകരിച്ചു.

ഈ ദിവസങ്ങളിൽ പരമാവധി താപനില 39°C മുതൽ 42°C വരെയും കുറഞ്ഞ താപനില 26°C മുതൽ 29°C വരെയും ആയിരിക്കും. പൊതുജനങ്ങൾ, പ്രത്യേകിച്ച് വാഹനമോടിക്കുന്നവരും കടലിൽ പോകുന്നവരും, ഉചിതമായ ജാഗ്രത പാലിക്കണമെന്ന് കാലാവസ്ഥാ വകുപ്പ് നിർദ്ദേശിച്ചു. ബുധനാഴ്ചയോടെ കാറ്റും പൊടിക്കാറ്റും ക്രമേണ കുറഞ്ഞ് കാലാവസ്ഥ സാധാരണ നിലയിലേക്ക് എത്തുമെന്നാണ് പ്രതീക്ഷിക്കുന്നത്.