കുവൈറ്റ് അറേബ്യൻ ഗൾഫ് സ്ട്രീറ്റിൽ ഏപ്രിൽ 23 മുതൽ മേയ് 3 വരെ രണ്ട് ഘട്ടങ്ങളിലായി ഗതാഗത നിയന്ത്രണം

കുവൈത്ത് സിറ്റി: കുവൈത്തിലെ പ്രധാന പാതകളിലൊന്നായ അറേബ്യൻ ഗൾഫ് സ്ട്രീറ്റിൽ ഏപ്രിൽ 23 മുതൽ മേയ് 3 വരെ ഗതാഗത നിയന്ത്രണം ഏർപ്പെടുത്തുന്നതായി ആഭ്യന്തര മന്ത്രാലയം അറിയിച്ചതായി പ്രാദേശിക പത്രം റിപ്പോർട്ട് ചെയ്തു . റോഡ് നവീകരണ പ്രവർത്തനങ്ങളുടെ ഭാഗമായി രണ്ട് ഘട്ടങ്ങളിലായാണ് ഗതാഗതം വഴിതിരിച്ചുവിടുന്നത്.

ഗതാഗത വകുപ്പും പൊതുമരാമത്ത് മന്ത്രാലയവും സംയുക്തമായാണ് ക്രമീകരണങ്ങൾ ഏർപ്പെടുത്തുന്നത്. ആദ്യ ഘട്ട നിയന്ത്രണം ഏപ്രിൽ 23 മുതൽ ആരംഭിക്കും. തുടർന്ന് നിശ്ചിത ഭാഗങ്ങളിലെ ജോലികൾ പൂർത്തിയാക്കി രണ്ടാം ഘട്ടത്തിലേക്ക് കടക്കും. ഈ കാലയളവിൽ അറേബ്യൻ ഗൾഫ് സ്ട്രീറ്റിലൂടെയുള്ള യാത്രയ്ക്ക് ഭാഗികമായ തടസ്സങ്ങൾ ഉണ്ടാകാൻ സാധ്യതയുള്ളതിനാൽ യാത്രക്കാർ മുൻകൂട്ടി പ്ലാൻ ചെയ്യണമെന്ന് അധികൃതർ നിർദ്ദേശിച്ചു.

വാഹനയാത്രക്കാർ റോഡിലെ താൽക്കാലിക ദിശാസൂചകങ്ങളും ട്രാഫിക് സിഗ്നലുകളും കൃത്യമായി പാലിക്കണം. തിരക്ക് ഒഴിവാക്കാൻ സാധ്യമായ ഇടങ്ങളിൽ ബദൽ പാതകൾ ഉപയോഗിക്കണമെന്നും ആഭ്യന്തര മന്ത്രാലയം അറിയിച്ചു. സുരക്ഷാ ഉദ്യോഗസ്ഥരുടെ നിർദ്ദേശങ്ങൾ പാലിക്കാത്തവർക്കെതിരെ നിയമനടപടികൾ ഉണ്ടാകുമെന്നും അധികൃതർ വ്യക്തമാക്കി. ഗതാഗതം സുഗമമാക്കുന്നതിനും റോഡുകളുടെ നിലവാരം മെച്ചപ്പെടുത്തുന്നതിനുമുള്ള ഈ നടപടിയോട് പൊതുജനങ്ങൾ സഹകരിക്കണമെന്ന് ട്രാഫിക് വിഭാഗം അഭ്യർത്ഥിച്ചു.