ഫഹഹീൽ റോഡിൽ ഗതാഗത നിയന്ത്രണം; എഗ്ഗൈല-ഫിൻതാസ് ഇന്റർസെക്ഷൻ അടച്ചിടും

കുവൈറ്റ് സിറ്റി: കുവൈറ്റ് സിറ്റിയിൽ നിന്ന് അൽ-ഫഹഹീൽ ലക്ഷ്യമാക്കി പോകുന്ന കിംഗ് അബ്ദുൽ അസീസ് ബിൻ അബ്ദുറഹ്മാൻ അൽ സൗദ് റോഡിൽ (ഫഹഹീൽ റോഡ് – Road 30) ഭാഗികമായി ഗതാഗത നിയന്ത്രണം ഏർപ്പെടുത്തുമെന്ന് ജനറൽ ഡയറക്ടറേറ്റ് ഓഫ് ട്രാഫിക് അറിയിച്ചു.

നിലവിലെ ട്രാഫിക് ക്രമീകരണങ്ങളുടെ ഭാഗമായാണ് ഈ നടപടി. എഗ്ഗൈല-ഫിൻതാസ് ഇന്റർസെക്ഷൻ പൂർണ്ണമായി അടയ്ക്കുന്നതിനൊപ്പം, റോഡിൻ്റെ വലത്, മധ്യ ലൈനുകളിലും നിയന്ത്രണം ഏർപ്പെടുത്തും.

ഗതാഗത വകുപ്പിന്റെ അറിയിപ്പ് പ്രകാരം, 2025 ഡിസംബർ 8 തിങ്കളാഴ്ച മുതൽ ഡിസംബർ 23 ചൊവ്വാഴ്ച വരെയാണ് റോഡ് അടച്ചിടലും ഗതാഗത നിയന്ത്രണങ്ങളും പ്രാബല്യത്തിലുണ്ടാവുക.

ഗതാഗതക്കുരുക്ക് ഒഴിവാക്കുന്നതിനും സുരക്ഷ ഉറപ്പാക്കുന്നതിനുമായി വാഹന യാത്രികർ ട്രാഫിക് സൈനുകൾ കർശനമായി പാലിക്കണമെന്നും, ബദൽ വഴികൾ ഉപയോഗിക്കണമെന്നും, ട്രാഫിക് ഉദ്യോഗസ്ഥരുമായി സഹകരിക്കണമെന്നും അധികൃതർ മുന്നറിയിപ്പ് നൽകി.