കുവൈറ്റിൽ വാട്ട്സ്ആപ്പ് അടക്കമുള്ള സോഷ്യൽ മീഡിയ അക്കൗണ്ടുകൾ ഹാക്കിങ് ഭീഷണിയിൽ : ജാഗ്രത പാലിക്കാൻ മുന്നറിയിപ്പ് നൽകി അധികൃതർ

സുരക്ഷ ഉറപ്പാക്കാൻ ടു-ഫാക്ടർ ഓതന്റിക്കേഷൻ നിർബന്ധമാക്കണമെന്ന് ദേശീയ സൈബർ സുരക്ഷാ കേന്ദ്രം

---

കുവൈറ്റ് സിറ്റി: രാജ്യത്തെ സോഷ്യൽ മീഡിയ അക്കൗണ്ടുകൾ ലക്ഷ്യമിട്ടുള്ള ഹാക്കിങ് ശ്രമങ്ങൾ വർധിച്ചുവരുന്നതായി ദേശീയ സൈബർ സുരക്ഷാ കേന്ദ്രം (NCSC) മുന്നറിയിപ്പ് നൽകി. ഉപയോക്താക്കളുടെ ഇടപെടൽ ഇല്ലാതെ തന്നെ അക്കൗണ്ടുകളിൽ നുഴഞ്ഞുകയറാൻ സാധിക്കുന്ന അതീവ ഗുരുതരമായ സൈബർ ആക്രമണങ്ങളാണ് റിപ്പോർട്ട് ചെയ്യപ്പെടുന്നത്.

പ്രധാനമായും വാട്ട്സ്ആപ്പ് പോലുള്ള സന്ദേശ കൈമാറ്റ ആപ്ലിക്കേഷനുകളെയാണ് ഹാക്കർമാർ ലക്ഷ്യമിടുന്നത്. മൊബൈൽ ഓപ്പറേറ്റിംഗ് സിസ്റ്റങ്ങളിലെയും ആപ്ലിക്കേഷനുകളിലെയും സുരക്ഷാ പിഴവുകൾ മുതലെടുത്താണ് ആക്രമണങ്ങൾ നടത്തുന്നത്. ഇത് വ്യക്തിഗത വിവരങ്ങളുടെ സ്വകാര്യതയ്ക്കും സുരക്ഷയ്ക്കും വലിയ ഭീഷണിയാണ് ഉയർത്തുന്നത്. അക്കൗണ്ടുകൾ ഹൈജാക്ക് ചെയ്യപ്പെടാനും ആശയവിനിമയങ്ങൾ ചോർത്തപ്പെടാനും സാധ്യതയുണ്ടെന്ന് കേന്ദ്രം വ്യക്തമാക്കി.

ഈ സാഹചര്യത്തിൽ, സൈബർ സുരക്ഷ ഉറപ്പാക്കുന്നതിനായി പൊതുജനങ്ങൾ കർശനമായി പാലിക്കേണ്ട നിർദ്ദേശങ്ങൾ ദേശീയ സൈബർ സുരക്ഷാ കേന്ദ്രം പുറത്തിറക്കി:

1. സോഫ്റ്റ്‌വെയർ അപ്‌ഡേറ്റുകൾ: സ്മാർട്ട്‌ഫോൺ ഓപ്പറേറ്റിംഗ് സിസ്റ്റവും, വാട്ട്സ്ആപ്പ് ഉൾപ്പെടെയുള്ള സോഷ്യൽ മീഡിയാ ആപ്ലിക്കേഷനുകളും ഏറ്റവും പുതിയ പതിപ്പുകളിലേക്ക് അപ്‌ഡേറ്റ് ചെയ്യുക. സുരക്ഷാ പ്രശ്നങ്ങൾ പരിഹരിക്കുന്നതിനുള്ള പാച്ചുകൾ ഇത്തരം അപ്‌ഡേറ്റുകളിൽ ഉണ്ടാകും.
2. ടു-ഫാക്ടർ ഓതന്റിക്കേഷൻ: എല്ലാ സോഷ്യൽ മീഡിയാ പ്ലാറ്റ്‌ഫോമുകളിലും ദ്വിഘടക പ്രാമാണീകരണം (Two-Factor Authentication – 2FA) നിർബന്ധമായും പ്രവർത്തനക്ഷമമാക്കുക. പാസ്‌വേഡിന് പുറമെ ഒരു അധിക സുരക്ഷാ ഘടകം ഇത് ഉറപ്പാക്കും.
3. ജാഗ്രത പാലിക്കുക: സംശയാസ്പദമായ കോളുകൾ, സന്ദേശങ്ങൾ, ഇമെയിലുകൾ എന്നിവ അവഗണിക്കുക.
4. വിവരങ്ങൾ കൈമാറാതിരിക്കുക: അക്കൗണ്ടുകളുടെ വെരിഫിക്കേഷൻ കോഡുകളോ പാസ്‌വേഡുകളോ യാതൊരു കാരണവശാലും മറ്റൊരാളുമായി പങ്കുവെക്കാതിരിക്കുക.

സൈബർ ഭീഷണികളെക്കുറിച്ച് എല്ലാവരും ബോധവാന്മാരായിരിക്കണമെന്നും, സംശയകരമായ എന്തെങ്കിലും ശ്രദ്ധയിൽ പെട്ടാൽ ഉടൻ ബന്ധപ്പെട്ട അധികാരികളെ വിവരമറിയിക്കണമെന്നും NCSC കൂട്ടിച്ചേർത്തു.