കുവൈറ്റിൽ തണുപ്പ് കഠിനമാകും; ‘അൽ-ഷബത്ത്’ സീസൺ ബുധനാഴ്ച മുതൽ

കുവൈറ്റ് സിറ്റി: കുവൈറ്റിൽ ശൈത്യം അതിന്റെ പാരമ്യത്തിലേക്ക്. നാൽപ്പത് ദിവസം നീണ്ടുനിന്ന ‘അൽ-മുറബ്ബാനിയ’ സീസൺ അവസാനിക്കുന്നതോടെ, ജനുവരി 14 ബുധനാഴ്ച മുതൽ രാജ്യത്ത് ‘അൽ-ഷബത്ത്’ സീസൺ ആരംഭിക്കുമെന്ന് അൽ-ഉജൈരി സയന്റിഫിക് സെന്റർ അറിയിച്ചു. ഇതോടെ വരും ദിവസങ്ങളിൽ തണുപ്പ് അതിശക്തമാകുമെന്നാണ് കാലാവസ്ഥാ പ്രവചനം.

26 ദിവസത്തെ കഠിന ശൈത്യം ആകെ 26 ദിവസം നീണ്ടുനിൽക്കുന്ന ഷബത്ത് സീസണിനെ രണ്ട് ഘട്ടങ്ങളായാണ് തിരിച്ചിരിക്കുന്നത്. ‘അൽ-നയിം’, ‘അൽ-ബലദ’ എന്നിങ്ങനെ 13 ദിവസം വീതമുള്ള രണ്ട് നക്ഷത്ര ഘട്ടങ്ങളിലൂടെയാണ് ഈ സീസൺ കടന്നുപോകുന്നത്. ഈ കാലയളവിൽ അതിരാവിലെകളിൽ മഞ്ഞ് വീഴ്ചയ്ക്കും (Frost) ശക്തമായ വടക്കൻ കാറ്റിനും സാധ്യതയുണ്ട്.

നിർണ്ണായകമായ ‘അൽ-അസിറഖ്’ ഷബത്ത് സീസണിലെ ഏറ്റവും കഠിനമായ തണുപ്പുള്ള എട്ട് ദിവസങ്ങളെ ‘അൽ-അസിറഖ്’ എന്നാണ് വിശേഷിപ്പിക്കുന്നത്. ജനുവരി 24 മുതൽ ആരംഭിക്കുന്ന ഈ എട്ട് ദിവസങ്ങളിൽ തണുപ്പ് അസഹനീയമായിരിക്കും. ആകാശം തെളിഞ്ഞു കാണപ്പെടുമെങ്കിലും വീശിയടിക്കുന്ന തണുത്ത കാറ്റ് ജനജീവിതത്തെ ബാധിച്ചേക്കാം. കഠിനമായ തണുപ്പ് കാരണം ചർമ്മത്തിന് നീലനിറം ബാധിച്ചേക്കാവുന്ന അവസ്ഥയെ സൂചിപ്പിച്ചാണ് ‘അസിറഖ്’ (നീല) എന്ന പേര് ഈ കാലയളവിന് നൽകിയിരിക്കുന്നത്.

പകൽ സമയത്തിന് ദൈർഘ്യം കൂടുകയും രാത്രി കുറയുകയും ചെയ്യുന്ന പ്രതിഭാസവും ഈ സീസണിന്റെ പ്രത്യേകതയാണ്. വരും ദിവസങ്ങളിൽ താപനില ഗണ്യമായി കുറയാൻ സാധ്യതയുള്ളതിനാൽ തുറസ്സായ സ്ഥലങ്ങളിൽ ജോലി ചെയ്യുന്നവരും മരുഭൂമിയിൽ ക്യാമ്പ് ചെയ്യുന്നവരും ജാഗ്രത പാലിക്കണമെന്ന് അധികൃതർ നിർദ്ദേശിച്ചു. ശൈത്യകാല രോഗങ്ങൾക്കെതിരെ മുൻകരുതൽ എടുക്കണമെന്നും ആരോഗ്യ മന്ത്രാലയം അറിയിച്ചു.