സാമ്പത്തിക രേഖകൾ സമർപ്പിച്ചില്ല; കുവൈറ്റിൽ 516 കമ്പനികളുടെ ലൈസൻസ് റദ്ദാക്കി

കുവൈറ്റ് സിറ്റി: നിശ്ചിത സമയപരിധിക്കുള്ളിൽ സാമ്പത്തിക സ്റ്റേറ്റ്‌മെന്റുകൾ (Financial Statements) സമർപ്പിക്കാത്തതിനെ തുടർന്ന് കുവൈറ്റിൽ 516 കമ്പനികളുടെ വാണിജ്യ ലൈസൻസുകൾ റദ്ദാക്കി. വാണിജ്യ വ്യവസായ മന്ത്രി ഖലീഫ അൽ-അജിൽ ഇതുസംബന്ധിച്ച 2025-ലെ 196-ാം നമ്പർ മന്ത്രിതല ഉത്തരവ് പുറപ്പെടുവിച്ചു.

തുടർച്ചയായി മൂന്ന് വർഷം സാമ്പത്തിക റിപ്പോർട്ടുകൾ സമർപ്പിക്കുന്നതിൽ പരാജയപ്പെട്ട കമ്പനികൾക്കെതിരെയാണ് നടപടി. 2016-ലെ ഒന്നാം നമ്പർ കമ്പനി നിയമത്തിലെ ആർട്ടിക്കിൾ 266-ലെ ഏഴാം ഖണ്ഡിക പ്രകാരമാണ് ഈ നടപടിയെന്ന് ഉത്തരവിൽ വ്യക്തമാക്കുന്നു.

ലൈസൻസ് റദ്ദാക്കിയ കമ്പനികളെ പിരിച്ചുവിടുന്നതിനുള്ള (Dissolution) നടപടികൾ ആരംഭിക്കാൻ ആർട്ടിക്കിൾ 2-ൽ നിർദ്ദേശമുണ്ട്. നിയമപ്രകാരമുള്ള ലിക്വിഡേഷൻ നടപടികൾ ആരംഭിക്കുന്നതിനായി ബന്ധപ്പെട്ട കമ്പനികൾക്ക് ഔദ്യോഗികമായി അറിയിപ്പ് നൽകും.

മന്ത്രിതല ഉത്തരവ് ഔദ്യോഗിക ഗസറ്റിൽ പ്രസിദ്ധീകരിക്കുന്ന തീയതി മുതൽ പ്രാബല്യത്തിൽ വരും. കള്ളപ്പണം വെളുപ്പിക്കുന്നത് തടയുന്നതിനുള്ള (Anti-money laundering) നടപടികളുടെ ഭാഗമായി ബിസിനസ് ഉടമകളുടെ വിവരങ്ങൾ രജിസ്റ്റർ ചെയ്യുന്ന നടപടി കുവൈറ്റിൽ 98 ശതമാനം പൂർത്തിയായതായും റിപ്പോർട്ടുകൾ സൂചിപ്പിക്കുന്നു. രാജ്യത്തെ സാമ്പത്തിക മേഖലയിൽ സുതാര്യത ഉറപ്പുവരുത്തുന്നതിന്റെ ഭാഗമായാണ് നിയമം ലംഘിക്കുന്ന കമ്പനികൾക്കെതിരെ കർശന നടപടിയുമായി മന്ത്രാലയം മുന്നോട്ട് പോകുന്നത്.