കുവൈറ്റ് അഹമ്മദിയിൽ നഗരസഭയുടെ വ്യാപക പരിശോധന : നിരവധി ഉപേക്ഷിക്കപ്പെട്ട വാഹനങ്ങൾ നീക്കം ചെയ്തു

കുവൈറ്റ് സിറ്റി: മുനിസിപ്പൽ നിയമങ്ങൾ പൂർണ്ണമായി പാലിക്കുന്നുണ്ടെന്ന് ഉറപ്പുവരുത്തുന്നതിനായി അഹമ്മദി ഗവർണറേറ്റിൽ കുവൈറ്റ് മുനിസിപ്പാലിറ്റി സമഗ്രമായ ഫീൽഡ് പരിശോധനാ കാമ്പയിൻ നടത്തി. പൊതു സേവനങ്ങൾ മെച്ചപ്പെടുത്തുക, ഗവർണറേറ്റിന്റെ സൗന്ദര്യം സംരക്ഷിക്കുക, വിപണികൾ ചിട്ടപ്പെടുത്തുക, മൊത്തത്തിലുള്ള ശുചിത്വം നിലനിർത്തുക എന്നിവ ലക്ഷ്യമിട്ടാണ് കാമ്പയിൻ നടത്തിയതെന്ന് അഹമ്മദി ഗവർണറേറ്റ് മുനിസിപ്പാലിറ്റി ടീം മേധാവി ഡോ. മുബാറക് അൽ-മുജാവിബ് അറിയിച്ചു.

നഗരസഭയുടെ ക്ലീനിംഗ് ആൻഡ് റോഡ് ഒക്യുപ്പേഷൻ വിഭാഗം നടത്തിയ പരിശോധനയിൽ 13 ഉപേക്ഷിക്കപ്പെട്ട വാഹനങ്ങളും 4 അനധികൃത ഫുഡ് ട്രക്കുകളും നീക്കം ചെയ്തു. കൂടാതെ, ലൈസൻസില്ലാതെ പൊതുയിടം നിയമവിരുദ്ധമായി ഉപയോഗിച്ചതിന് 6 നിയമലംഘനങ്ങളും മൂന്ന് വഴിയോര കച്ചവടക്കാരെ അറസ്റ്റ് ചെയ്യുകയും ചെയ്തു.

മുൻകൂട്ടി നൽകിയ മുന്നറിയിപ്പുകൾക്ക് ശേഷം 11 അനധികൃത കാനോപ്പികൾ മുനിസിപ്പൽ ടീം പൊളിച്ചുനീക്കി. അതേസമയം, എഞ്ചിനീയറിംഗ് ഓഡിറ്റ് ആൻഡ് ഫോളോ-അപ്പ് വിഭാഗം കെട്ടിട നിർമ്മാണ നിയമലംഘനങ്ങളുമായി ബന്ധപ്പെട്ട് 4 മുന്നറിയിപ്പുകളും പരസ്യങ്ങളുമായി ബന്ധപ്പെട്ട് 16 നിയമലംഘനങ്ങളും രേഖപ്പെടുത്തി.

കുവൈറ്റ് മുനിസിപ്പാലിറ്റിയുടെ നിയമങ്ങളും ചട്ടങ്ങളും നടപ്പിലാക്കാൻ ആറ് ഗവർണറേറ്റുകളിലുടനീളമുള്ള പരിശോധനാ സംഘങ്ങൾ പ്രതിജ്ഞാബദ്ധരാണെന്ന് ഡോ. അൽ-മുജാവിബ് ഊന്നിപ്പറഞ്ഞു. സമൂഹത്തിന്റെ സുരക്ഷയും ക്രമവും ശുചിത്വവും ഉറപ്പാക്കുന്നതിന് വ്യക്തികളും സ്ഥാപനങ്ങളും മുനിസിപ്പൽ നിയമങ്ങൾ കർശനമായി പാലിക്കണമെന്നും അദ്ദേഹം അഭ്യർത്ഥിച്ചു. നിയമലംഘനങ്ങൾക്കെതിരെ തുടർന്നും കർശന നടപടികൾ സ്വീകരിക്കുമെന്നും അധികൃതർ അറിയിച്ചു.