കുവൈറ്റിലെ 591 തെരുവുകളുടെ പേരുകൾക്ക് പകരം ഇനി നമ്പറുകൾ: മുനിസിപ്പൽ കൗൺസിൽ അംഗീകാരം

കുവൈറ്റ് സിറ്റി: രാജ്യത്തെ 591 തെരുവുകളുടെ പേരുകൾക്ക് പകരം സംഖ്യാ സൂചിക (Numerical Designations) നൽകാൻ കുവൈറ്റ് മുനിസിപ്പൽ കൗൺസിൽ അംഗീകാരം നൽകി. തെരുവുകൾ തിരിച്ചറിയുന്നതിൽ ഏകീകരണം കൊണ്ടുവരുന്നതിനും നഗര ഇടങ്ങളുടെ ക്രമീകരണം മെച്ചപ്പെടുത്തുന്നതിനുമുള്ള സുപ്രധാന നീക്കമാണിത്.

മുനിസിപ്പൽ കൗൺസിൽ പ്രസിഡന്റ് അബ്ദുല്ല അൽ-മെഹ്രിയുടെ അധ്യക്ഷതയിൽ ചേർന്ന അസാധാരണ സമ്മേളനത്തിലാണ് തീരുമാനം കൈക്കൊണ്ടത്. 2023-ലെ മന്ത്രിതല പ്രമേയം നമ്പർ 558 നെ അടിസ്ഥാനമാക്കിയാണ് നടപടി.

തെരുവ് തിരിച്ചറിയൽ കൂടുതൽ വ്യക്തമാക്കാനും നഗര പ്രദേശങ്ങളുടെ സംവിധാനം മെച്ചപ്പെടുത്താനും ഈ മാറ്റങ്ങൾ ലക്ഷ്യമിടുന്നു. അതേസമയം, സാംസ്കാരിക പ്രാദേശിക സ്വത്വങ്ങൾ സംരക്ഷിക്കുന്നതിന്റെ ഭാഗമായി 66 തെരുവുകളുടെ നിലവിലെ പേരുകൾ നിലനിർത്താനും, മൂന്ന് തെരുവുകൾക്ക് അറബ് തലസ്ഥാനങ്ങളുടെ പേരുകൾ നൽകാനും കൗൺസിൽ തീരുമാനിച്ചിട്ടുണ്ട്.

നഗരങ്ങൾ, പ്രാന്തപ്രദേശങ്ങൾ, പ്രദേശങ്ങൾ, തെരുവുകൾ, സ്ക്വയറുകൾ എന്നിവയ്ക്ക് പേര് നൽകുന്നത് സംബന്ധിച്ച നിർദ്ദേശങ്ങളും അപേക്ഷകളും പഠിക്കുന്നതിനുള്ള സമിതിയുടെ റിപ്പോർട്ടും കൗൺസിൽ അംഗീകരിച്ചു. രാജ്യത്തുടനീളമുള്ള ഭൗമനാമങ്ങൾ അവലോകനം ചെയ്യാനും ശുപാർശകൾ നൽകാനും രൂപീകരിച്ച സമിതിയാണ് ഈ നിർദ്ദേശം സമർപ്പിച്ചത്.