ചരിത്ര നിമിഷം : കുവൈറ്റിലെ ആദ്യ വനിതാ സ്ഥാനപതിയായി അധികാരപത്രം സമർപ്പിച്ച്‌ ഹെർ എക്സലൻസി പരമിത ത്രിപാഠി

കുവൈറ്റ് സിറ്റി: കുവൈറ്റിലെ പുതിയ ഇന്ത്യൻ അംബാസഡറായി നിയമിതയായ എച്ച്.ഇ. പരമിത ത്രിപാഠി തന്റെ അധികാരപത്രം കുവൈറ്റ് അമീർ ഹിസ് ഹൈനസ് ഷെയ്ഖ് മിഷാൽ അൽ-അഹമ്മദ് അൽ-ജابر അൽ-സബാഹിന് സമർപ്പിച്ചു. ഏപ്രിൽ 21 ചൊവ്വാഴ്ച ബയാൻ കൊട്ടാരത്തിൽ നടന്ന പ്രൗഢഗംഭീരമായ ചടങ്ങിലാണ് അവർ അധികാരപത്രം കൈമാറിയത്. കുവൈറ്റിലെ ഇന്ത്യയുടെ ഇരുപതാമത്തെ അംബാസഡറായ പരമിത ത്രിപാഠി, ഈ പദവിയിലെത്തുന്ന ആദ്യ വനിത കൂടിയാണ്.

ബയാൻ കൊട്ടാരത്തിലെത്തിയ അംബാസഡർക്ക് ഔദ്യോഗികമായ ഗാർഡ് ഓഫ് ഓണർ നൽകി അധികൃതർ സ്വീകരിച്ചു. തുടർന്ന് നടന്ന കൂടിക്കാഴ്ചയിൽ കുവൈറ്റ് അമീർ അംബാസഡറെ ഊഷ്മളമായി സ്വാഗതം ചെയ്യുകയും പുതിയ ദൗത്യത്തിൽ എല്ലാവിധ വിജയങ്ങളും നേരുന്നതായും അറിയിച്ചു. ഇന്ത്യയും കുവൈറ്റും തമ്മിലുള്ള ചരിത്രപരമായ ബന്ധത്തെയും ശക്തമായ ജനതകൾ തമ്മിലുള്ള സഹകരണത്തെയും അദ്ദേഹം എടുത്തുപറഞ്ഞു. ഇരുരാജ്യങ്ങളും തമ്മിലുള്ള ഉഭയകക്ഷി സഹകരണം കൂടുതൽ മേഖലകളിലേക്ക് വ്യാപിപ്പിക്കേണ്ടതിന്റെ പ്രാധാന്യവും അമീർ ചൂണ്ടിക്കാട്ടി.

ഇന്ത്യൻ രാഷ്ട്രപതി ദ്രൗപദി മുർമു, പ്രധാനമന്ത്രി നരേന്ദ്ര മോദി എന്നിവരുടെ പ്രത്യേക ആശംസകൾ അംബാസഡർ പരമിത ത്രിപാഠി അമീറിനെ അറിയിച്ചു. ഇന്ത്യയുടെ വിശ്വസ്ത സുഹൃത്തായ കുവൈറ്റുമായി ചേർന്ന് പ്രവർത്തിക്കാൻ താൻ ആഗ്രഹിക്കുന്നതായി അവർ പറഞ്ഞു. മേഖലയിലെ സമാധാനത്തിനും സുസ്ഥിരതയ്ക്കും കുവൈറ്റ് നൽകുന്ന പിന്തുണയെ അവർ പ്രകീർത്തിച്ചു.

കുവൈറ്റിലെ പത്ത് ലക്ഷത്തോളം വരുന്ന ഇന്ത്യൻ പ്രവാസി സമൂഹത്തിന് കുവൈറ്റ് ഭരണകൂടം നൽകുന്ന പിന്തുണയ്ക്ക് അവർ നന്ദി അറിയിച്ചു. ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിന്റെ പാലമായി പ്രവർത്തിക്കുന്നത് ഈ പ്രവാസി സമൂഹമാണെന്ന് അവർ പറഞ്ഞു. വ്യാപാരം, നിക്ഷേപം, പ്രതിരോധം, സുരക്ഷ, ഊർജ്ജം, ആരോഗ്യം, ശാസ്ത്ര-സാങ്കേതികവിദ്യ, തൊഴിൽ വൈദഗ്ധ്യം എന്നീ മേഖലകളിൽ സഹകരണം വർദ്ധിപ്പിക്കുന്നതിലൂടെ ഇന്ത്യ-കുവൈറ്റ് തന്ത്രപ്രധാന പങ്കാളിത്തം കൂടുതൽ ശക്തിപ്പെടുത്തുമെന്നും അവർ വ്യക്തമാക്കി.

ഇന്ത്യയും കുവൈറ്റും തമ്മിലുള്ള നയതന്ത്ര ബന്ധത്തിന്റെ 65-ാം വാർഷികം ആഘോഷിക്കുന്ന വേളയിലാണ് പുതിയ അംബാസഡറുടെ നിയമനം എന്നതും ഏറെ ശ്രദ്ധേയമാണ്. അന്താരാഷ്ട്ര തലത്തിലും പ്രാദേശിക തലത്തിലുമുള്ള വിഷയങ്ങളിൽ ഇരുരാജ്യങ്ങളും ഒരേ നിലപാടാണ് പുലർത്തുന്നതെന്നും അത് വരും നാളുകളിലും തുടരുമെന്നും അംബാസഡർ കൂട്ടിചേർത്തു.