കുവൈറ്റ് വിമാനത്താവളത്തിൽ രേഖകളില്ലാതെ കടത്താൻ ശ്രമിച്ച വിദേശ കറൻസികൾ പിടികൂടി; യാത്രക്കാരൻ പിടിയിൽ

കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളത്തിലെ അഞ്ചാം നമ്പർ ടെർമിനലിൽ (T-5) രേഖകളില്ലാതെ കടത്താൻ ശ്രമിച്ച വൻ തുക കസ്റ്റംസ് അധികൃതർ പിടികൂടി. ഒരു അറബ് രാജ്യത്തുനിന്ന് എത്തിയ യാത്രക്കാരനിൽ നിന്നാണ് വിവിധ രാജ്യങ്ങളിലെ കറൻസികൾ പിടിച്ചെടുത്തത്.

പതിവ് പരിശോധനയ്ക്കിടെ സംശയം തോന്നിയ യാത്രക്കാരന്റെ ബാഗേജ് പരിശോധിച്ചപ്പോഴാണ് വെളിപ്പെടുത്താത്ത പണം കണ്ടെത്തിയത്. 10,000 യുഎസ് ഡോളർ, 1,467 കുവൈറ്റ് ദിനാർ, ഏകദേശം 5,00,000 സിറിയൻ പൗണ്ട് എന്നിവയാണ് ഇയാളിൽ നിന്ന് പിടിച്ചെടുത്തതെന്ന് കസ്റ്റംസ് ജനറൽ അഡ്മിനിസ്‌ട്രേഷൻ അറിയിച്ചു.

നിയമപ്രകാരമുള്ള നടപടികൾ പൂർത്തിയാക്കിയ ശേഷം യാത്രക്കാരനെയും പിടിച്ചെടുത്ത പണവും തുടർ അന്വേഷണത്തിനായി ബന്ധപ്പെട്ട വകുപ്പുകൾക്ക് കൈമാറി. കള്ളപ്പണം വെളുപ്പിക്കുന്നത് തടയുന്നതിനുള്ള 2013-ലെ 106-ാം നമ്പർ നിയമപ്രകാരം, യാത്രക്കാരുടെ കൈവശം 3,000 കുവൈറ്റ് ദിനാറോ അതിന് തുല്യമായ വിദേശ കറൻസിയോ ഉണ്ടെങ്കിൽ വിമാനത്താവളത്തിൽ വെച്ച് അത് വെളിപ്പെടുത്തേണ്ടതുണ്ട്.

യാത്രക്കാർ നിയമങ്ങൾ കർശനമായി പാലിക്കണമെന്നും പണം കൈവശം വെക്കുന്ന കാര്യത്തിൽ സുതാര്യത ഉറപ്പാക്കണമെന്നും കസ്റ്റംസ് അധികൃതർ അറിയിച്ചു. നിയമലംഘനം നടത്തുന്നവർക്കെതിരെ കർശനമായ നിയമനടപടികൾ സ്വീകരിക്കുമെന്നും അധികൃതർ മുന്നറിയിപ്പ് നൽകി. വിമാനത്താവളങ്ങളിലെ സുരക്ഷയും നിയമപാലനവും ശക്തമാക്കുന്നതിന്റെ ഭാഗമായാണ് പരിശോധനകൾ കർശനമാക്കിയിരിക്കുന്നത്.