‘വികസിത് ഭാരത് റൺ 2026’: കുവൈറ്റിൽ ആയിരത്തിലധികം ആളുകൾ പങ്കെടുത്തു; കായികക്ഷമതയും ശുചിത്വ സന്ദേശവുമായി ഇന്ത്യൻ എംബസി

കുവൈറ്റ് സിറ്റി: മഹാത്മാ ഗാന്ധി ജയന്തി ആഘോഷങ്ങളുടെയും ‘സേവാ പഖ്‌വാഡ 2026’ (സേവന വാരം) കാമ്പെയ്‌ന്റെയും ഭാഗമായി കുവൈറ്റിലെ ഇന്ത്യൻ എംബസിയുടെ നേതൃത്വത്തിൽ സംഘടിപ്പിച്ച ‘വികസിത് ഭാരത് റൺ’ ശ്രദ്ധേയമായി. ഒക്ടോബർ 2-ന് സൽമിയയിലെ ബൊളിവാർഡ് പാർക്കിൽ നടന്ന ചടങ്ങിൽ കുവൈറ്റിലെ ഇന്ത്യൻ സമൂഹത്തിൽ നിന്നുള്ളവരും ഇന്ത്യയുടെ സുഹൃത്തുക്കളുമടക്കം 1,600-ലധികം ആളുകൾ പങ്കെടുത്തു.

ഇന്ത്യൻ അംബാസഡർ ശ്രീമതി പരമിത ത്രിപാഠി ഫ്ലാഗ് ഓഫ് ചെയ്തതോടെയാണ് റൺ ആരംഭിച്ചത്. ‘വികസിത് ഭാരത് @2047’ എന്ന ലക്ഷ്യത്തിലേക്കായി കായികക്ഷമതയും സാമൂഹിക പങ്കാളിത്തവും പ്രോത്സാഹിപ്പിക്കുക എന്നതായിരുന്നു ചടങ്ങിന്റെ പ്രധാന ലക്ഷ്യം.

കേന്ദ്ര സർക്കാരിന്റെ ‘ഫിറ്റ് ഇന്ത്യ മൂവ്‌മെന്റിന്റെ’ ഭാഗമായ ‘ഫിറ്റ് ഇന്ത്യ ഫ്രീഡം റൺ 7.0’-ന് പിന്തുണ പ്രഖ്യാപിച്ചാണ് കുവൈറ്റിൽ റൺ സംഘടിപ്പിച്ചത്. ചടങ്ങിൽ സംസാരിച്ച അംബാസഡർ പരമിത ത്രിപാഠി, എല്ലാവരും ശാരീരികക്ഷമത ദൈനംദിന ജീവിതത്തിന്റെ ഭാഗമാക്കണമെന്ന് ആഹ്വാനം ചെയ്തു. ദിവസവും കുറഞ്ഞത് 30 മിനിറ്റെങ്കിലും വ്യായാമത്തിനോ കായിക വിനോദങ്ങൾക്കോ മാറ്റിവെക്കണമെന്നും, “ഓടാൻ കഴിയുന്നവർ ഓടുക, കഴിയാത്തവർ നടക്കുക” എന്ന ലളിതമായ പരിശീലനത്തിലൂടെ ആരോഗ്യം സംരക്ഷിക്കണമെന്നും അംബാസഡർ ഓർമ്മിപ്പിച്ചു. “ഫിറ്റ്‌നസിനായി ഓടുക, ഐക്യത്തിനായി ഓടുക, വികസിത ഭാരതത്തിനായി ഓടുക” (Run for Fitness, Run for Unity, Run for Viksit Bharat!) എന്ന സന്ദേശവും റണ്ണിലൂടെ പങ്കുവെച്ചു.

കായികക്ഷമതയ്ക്കൊപ്പം പരിസ്ഥിതി ശുചിത്വത്തിനും തുല്യ പ്രാധാന്യം നൽകിയാണ് പരിപാടി സംഘടിപ്പിച്ചത്. ‘സ്വച്ഛത ഹി സേവ 2026’ കാമ്പെയ്‌ന്റെ ഭാഗമായി, ‘വേസ്റ്റ് ഉപേക്ഷിക്കില്ല’ (Leave No Trace) എന്ന തത്വം പാലിച്ചുകൊണ്ട് റണ്ണിന് ശേഷം പാർക്കിലെ മാലിന്യങ്ങൾ ശേഖരിക്കുകയും പരിസരം ശുചീകരിക്കുകയും ചെയ്തു. ശുചിത്വം എന്നത് സ്വയം ബഹുമാനത്തിന്റെയും പരിസ്ഥിതിയോടുള്ള ആദരവിന്റെയും പ്രതിഫലനമാണെന്ന ഗാന്ധിജിയുടെ വചനങ്ങൾ അംബാസഡർ അനുസ്മരിച്ചു. റണ്ണിന്റെ വിജയത്തിനായി സഹകരിച്ച എല്ലാ പങ്കാളികൾക്കും ഇന്ത്യൻ എംബസി നന്ദി രേഖപ്പെടുത്തി.