എയർബസ് എ320 സോഫ്റ്റ്‌വെയർ അപ്‌ഡേറ്റ്; കുവൈറ്റ് എയർവേയ്‌സ് വിമാന സർവീസ് വൈകിയേക്കാമെന്ന് മുന്നറിപ്പ്

കുവൈറ്റ് സിറ്റി: കുവൈറ്റ് എയർവേയ്‌സിന്റെ (കെ.എ.സി.) ചില വിമാന സർവീസുകൾക്ക് കാലതാമസം ഉണ്ടാകാൻ സാധ്യതയുണ്ടെന്ന് യാത്രക്കാർക്ക് മുന്നറിയിപ്പ് നൽകി. എയർബസ് എ320 വിമാനങ്ങളിൽ നിർബന്ധിതമായ സോഫ്റ്റ്‌വെയർ അപ്‌ഡേറ്റുകൾ നടപ്പാക്കുന്നതിനെ തുടർന്നാണ് ഈ അറിയിപ്പ്.

വിമാനത്തിന്റെ സുരക്ഷാ മാനദണ്ഡങ്ങൾ ഉറപ്പാക്കുന്നതിന്റെ ഭാഗമായി എയർബസ് നൽകിയ ഔദ്യോഗിക ശുപാർശകളെ തുടർന്നാണ് ഈ സോഫ്റ്റ്‌വെയർ നവീകരണം. ലോകമെമ്പാടുമുള്ള എ320 വിമാനങ്ങൾ സർവീസ് നടത്തുന്ന എല്ലാ വിമാനക്കമ്പനികളെയും ഈ അപ്‌ഡേറ്റ് ബാധിക്കുമെന്നും കുവൈറ്റ് എയർവേയ്‌സ് അധികൃതർ വ്യക്തമാക്കി.

നിലവിൽ എയർബസുമായി സഹകരിച്ചാണ് സോഫ്റ്റ്‌വെയർ നവീകരണ നടപടികൾ പുരോഗമിക്കുന്നത്. ഏറ്റവും ഉയർന്ന സുരക്ഷാ നിലവാരം നിലനിർത്തുന്നതിനും യാത്രക്കാരുടെ സുരക്ഷ ഉറപ്പാക്കുന്നതിനും വിമാന നിർമ്മാതാക്കളുടെ ഏറ്റവും പുതിയ ആവശ്യകതകൾ പാലിക്കുന്നതിനും ഈ താൽക്കാലിക കാലതാമസം അനിവാര്യമാണെന്ന് എയർലൈൻ പ്രസ്താവനയിൽ അറിയിച്ചു.

കൂടുതൽ വിവരങ്ങൾ ആവശ്യമുള്ള യാത്രക്കാർക്ക് എയർലൈൻസിന്റെ കസ്റ്റമർ സർവീസ് നമ്പറുകളായ 171 (കുവൈറ്റിൽ നിന്ന്), അല്ലെങ്കിൽ +965 24345555 എക്സ്റ്റൻഷൻ 171 (കുവൈറ്റിന് പുറത്തുനിന്ന്) എന്നിവയിലോ, വാട്ട്‌സ്ആപ്പ് വഴി +965 1802050 എന്ന നമ്പറിലോ ബന്ധപ്പെടാവുന്നതാണ്.

ഈ കാലയളവിൽ യാത്രക്കാർ നൽകുന്ന സഹകരണത്തിനും മനസ്സിലാക്കലിനും കുവൈറ്റ് എയർവേയ്‌സ് നന്ദി രേഖപ്പെടുത്തി.