ഐബിപിസി കുവൈത്ത് പുതിയ നേതൃത്വത്തെ പ്രഖ്യാപിച്ചു; ബിസിനസ് നെറ്റ്‌വർക്കിംഗും ഇന്ത്യ–കുവൈത്ത് ബന്ധവും ശക്തിപ്പെടുത്തൽ പ്രധാന ലക്ഷ്യം

കുവൈറ്റ്: ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (ഐബിപിസി) കുവൈറ്റിന്റെ 2026–2028 കാലയളവിലേക്കുള്ള പുതിയ നേതൃത്വസംഘം ചുമതലയേറ്റു. ബിസിനസ് സഹകരണം വിപുലീകരിക്കുക, വിവിധ സ്ഥാപനങ്ങളുമായുള്ള പങ്കാളിത്തം ശക്തിപ്പെടുത്തുക, ഇന്ത്യ–കുവൈറ്റ് സാമ്പത്തിക ബന്ധങ്ങൾക്ക് കൂടുതൽ കരുത്തേകുക എന്നിവയ്ക്കാണ് പുതിയ നേതൃത്വം മുൻഗണന നൽകുന്നത്.

ഒക്ടോബർ 6ന് സാൽമിയയിലെ ഹോളിഡേ ഇൻ ഹോട്ടലിൽ നടന്ന ഐബിപിസി വാർഷിക പൊതുയോഗത്തിനും തെരഞ്ഞെടുപ്പിനും ശേഷമാണ് പുതിയ നേതൃത്വം ചുമതലയേറ്റത്.

ഐബിപിസിയുടെ നടപടിക്രമമനുസരിച്ച് മുൻ വൈസ് ചെയർമാൻ ഗൗരവ് ഒബ്റോയ് ചെയർമാനായും മുൻ ജോയിന്റ് സെക്രട്ടറി സുനിത് അറോറ സെക്രട്ടറിയായും ചുമതലയേറ്റു.

മറ്റ് ഭാരവാഹി സ്ഥാനങ്ങളിലേക്ക് നടന്ന തെരഞ്ഞെടുപ്പിൽ സുരേഷ് കെ.പി. വൈസ് ചെയർമാനായും, കൃഷൻ സൂര്യകാന്ത് ജോയിന്റ് സെക്രട്ടറിയായും, രാമദാസ് കാർത്തിക് ട്രഷററായും 2026–2028 കാലയളവിലേക്ക് തെരഞ്ഞെടുക്കപ്പെട്ടു.

ചുമതലയേറ്റ ശേഷം അംഗങ്ങളെ അഭിസംബോധന ചെയ്ത ചെയർമാൻ ഗൗരവ് ഒബ്റോയ്, ഇന്ത്യയിലെയും കുവൈറ്റിലെയും ബിസിനസ് സമൂഹത്തെയും സംരംഭകരെയും പ്രൊഫഷണലുകളെയും കൂടുതൽ ഫലപ്രദമായി ബന്ധിപ്പിക്കുന്ന വേദിയായി ഐബിപിസിയെ ശക്തിപ്പെടുത്തുകയാണ് പുതിയ നേതൃത്വത്തിന്റെ ലക്ഷ്യമെന്ന് പറഞ്ഞു. ഇന്ത്യൻ എംബസി, കുവൈത്തിലെ വിവിധ സ്ഥാപനങ്ങൾ, ഇന്ത്യയിലെ പ്രമുഖ വ്യവസായ സംഘടനകൾ, കുവൈറ്റിലെ അന്താരാഷ്ട്ര ബിസിനസ് കൗൺസിലുകൾ എന്നിവയുമായുള്ള സഹകരണം കൂടുതൽ ശക്തമാക്കുമെന്നും അദ്ദേഹം വ്യക്തമാക്കി.

“അംഗങ്ങൾക്ക് പുതിയ ബിസിനസ് അവസരങ്ങൾ സൃഷ്ടിക്കുകയും വിവിധ സ്ഥാപനങ്ങളുമായുള്ള സഹകരണം ശക്തിപ്പെടുത്തുകയും ഇന്ത്യയും കുവൈറ്റും തമ്മിൽ വളർന്നുവരുന്ന സാമ്പത്തിക ബന്ധത്തിന് കൂടുതൽ സംഭാവന നൽകുകയും ചെയ്യുക എന്നതാണ് ഞങ്ങളുടെ പ്രധാന ലക്ഷ്യം,” ഗൗരവ് ഒബ്റോയ് പറഞ്ഞു.

തെരഞ്ഞെടുപ്പിലൂടെ അംഗങ്ങൾ നൽകിയ വിശ്വാസത്തിന് പുതുതായി തെരഞ്ഞെടുക്കപ്പെട്ട വൈസ് ചെയർമാൻ സുരേഷ് കെ.പി. നന്ദി രേഖപ്പെടുത്തി. ജനാധിപത്യപരമായ തെരഞ്ഞെടുപ്പ് പ്രക്രിയ പൂർത്തിയായ സാഹചര്യത്തിൽ സംഘടനയുടെ ഐക്യത്തിനാണ് ഇനി പ്രഥമ പരിഗണനയെന്നും അദ്ദേഹം പറഞ്ഞു.

“അംഗങ്ങൾ ഞങ്ങളിൽ അർപ്പിച്ച വിശ്വാസം കൂടുതൽ ഉത്തരവാദിത്തവും പ്രതിബദ്ധതയും നൽകുന്നു. തെരഞ്ഞെടുപ്പ് ഇനി പിന്നിട്ട അധ്യായമാണ്. ഒരൊറ്റ ഐബിപിസി, ഒരൊറ്റ ടീം, ഒരേ ലക്ഷ്യം എന്ന മനോഭാവത്തോടെ നമുക്ക് ഒരുമിച്ച് മുന്നോട്ടുപോകാം,” സുരേഷ് കെ.പി. പറഞ്ഞു.

സ്ഥാനമൊഴിഞ്ഞ ചെയർമാൻ ഡോ. കൈസർ ടി. ഷാക്കിർ വിടവാങ്ങൽ പ്രസംഗത്തിൽ തന്റെ കാലയളവിൽ അംഗങ്ങൾ നൽകിയ പിന്തുണയ്ക്ക് നന്ദി രേഖപ്പെടുത്തി. ഐബിപിസിയുടെ ബിസിനസ്, പ്രൊഫഷണൽ, സ്ഥാപനതല പ്രവർത്തനങ്ങൾ വിപുലപ്പെടുത്തുന്നതിൽ അംഗങ്ങളുടെ കൂട്ടായ പരിശ്രമം നിർണായകമായിരുന്നുവെന്ന് അദ്ദേഹം ചൂണ്ടിക്കാട്ടി. യുവ സംരംഭകരും പ്രൊഫഷണലുകളും സംഘടനയുടെ പ്രവർത്തനങ്ങളിലും നേതൃത്വത്തിലും കൂടുതൽ സജീവമായി മുന്നോട്ടുവരണമെന്നും അദ്ദേഹം ആഹ്വാനം ചെയ്തു.

ഐബിപിസിയുടെ മുൻ ചെയർമാൻമാരായ ധീരജ് ഒബ്റോയ്, ടോണി ജഷൻമൽ, എസ്.കെ. വാധവാൻ, ഷിവി ഭാസിൻ എന്നിവരും യോഗത്തെ അഭിസംബോധന ചെയ്തു. ഐബിപിസിയുടെ വളർച്ചയുടെ വിവിധ ഘട്ടങ്ങളും വർഷങ്ങളായുള്ള സംഭാവനകളും അവർ അനുസ്മരിച്ചു. ഭാവിയിലെ നേതൃത്വത്തിലേക്ക് കൂടുതൽ യുവ സംരംഭകരും പ്രൊഫഷണലുകളും കടന്നുവരേണ്ടതിന്റെ ആവശ്യകത അവർ ഊന്നിപ്പറഞ്ഞു. ഇന്ത്യ–കുവൈറ്റ് ബന്ധം കൂടുതൽ ശക്തിപ്പെടുത്തുന്നതിൽ ഐബിപിസിയുടെ പങ്ക് വിപുലപ്പെടുത്തണമെന്നും അംഗങ്ങൾക്ക് പരസ്പരം ബന്ധപ്പെടാനും ബിസിനസ് അവസരങ്ങൾ പങ്കുവയ്ക്കാനും പുതിയ പങ്കാളിത്തങ്ങൾ രൂപപ്പെടുത്താനും സഹായിക്കുന്ന കൂടുതൽ പരിപാടികൾ സംഘടിപ്പിക്കണമെന്നും അവർ അഭിപ്രായപ്പെട്ടു.

വാർഷിക പൊതുയോഗത്തിൽ സ്ഥാനമൊഴിഞ്ഞ സെക്രട്ടറി സുരേഷ് കെ.പി., കഴിഞ്ഞ കാലയളവിൽ ഐബിപിസി സംഘടിപ്പിച്ച പ്രധാന പരിപാടികൾ, ബിസിനസ് പ്രതിനിധിസംഘങ്ങളുടെ സന്ദർശനങ്ങൾ, വിവിധ സ്ഥാപനങ്ങളുമായുള്ള സഹകരണം, സാമൂഹിക പ്രവർത്തനങ്ങൾ എന്നിവ ഉൾപ്പെടുത്തിയ റിപ്പോർട്ട് അവതരിപ്പിച്ചു. ട്രഷറർ കൃഷൻ സൂര്യകാന്ത്, സി.എ. ദീപക് ബിന്ദാൽ തയ്യാറാക്കിയ ഓഡിറ്റ് ചെയ്ത സാമ്പത്തിക റിപ്പോർട്ട് അവതരിപ്പിച്ചു. അംഗങ്ങൾ ഇത് ഏകകണ്ഠമായി അംഗീകരിച്ചു.

ഇൻവെസ്റ്റ് ഇന്ത്യ, അസോചം (ASSOCHAM), ഫിക്കി (FICCI), സിഐഐ (CII), നാസ്‌കോം (NASSCOM), ടിപിസിഐ (TPCI), എഫ്ഐഇഒ (FIEO) തുടങ്ങിയ ഇന്ത്യയിലെ പ്രമുഖ സ്ഥാപനങ്ങളുമായുള്ള ബന്ധം കൂടുതൽ ശക്തിപ്പെടുത്തുന്നതിനൊപ്പം കുവൈറ്റ് ചേംബർ ഓഫ് കൊമേഴ്‌സ് ആൻഡ് ഇൻഡസ്ട്രി, കുവൈത്തിലെ പ്രമുഖ ബിസിനസ് സമൂഹം, വിവിധ അന്താരാഷ്ട്ര ബിസിനസ് കൗൺസിലുകൾ എന്നിവയുമായുള്ള സഹകരണം വിപുലീകരിക്കാനും പുതിയ നേതൃത്വം ലക്ഷ്യമിടുന്നു.

ജിസിസിയിലെ വിവിധ ഇന്ത്യൻ ബിസിനസ് കൗൺസിലുകളുമായുള്ള ബന്ധവും കൂടുതൽ ശക്തിപ്പെടുത്തും. ഇതിലൂടെ ജിസിസി രാജ്യങ്ങൾക്കിടയിലെ ബിസിനസ് ബന്ധങ്ങൾ, സംരംഭകത്വം, നിക്ഷേപം, പ്രൊഫഷണൽ സഹകരണം എന്നിവയ്ക്ക് കൂടുതൽ അവസരങ്ങൾ സൃഷ്ടിക്കുകയാണ് ലക്ഷ്യം.

മുൻകാല നേതൃത്വങ്ങൾ പടുത്തുയർത്തിയ ശക്തമായ അടിത്തറയിൽ, അംഗങ്ങളുടെ കൂടുതൽ പങ്കാളിത്തവും കൂട്ടായ പ്രവർത്തനവും ഉറപ്പാക്കി ഐബിപിസിയെ മുന്നോട്ടുകൊണ്ടുപോകുമെന്ന പുതിയ നേതൃത്വത്തിന്റെ പ്രതിബദ്ധതയോടെയാണ് വാർഷിക പൊതുയോഗം സമാപിച്ചത്.

ഇന്ത്യൻ എംബസിയുടെ രക്ഷാകർതൃത്വത്തിൽ പ്രവർത്തിക്കുന്ന ലാഭേച്ഛയില്ലാത്ത സംഘടനയാണ് ഇന്ത്യൻ ബിസിനസ് ആൻഡ് പ്രൊഫഷണൽ കൗൺസിൽ (ഐബിപിസി) കുവൈറ്റ്. ഇന്ത്യയും കുവൈറ്റും തമ്മിലുള്ള വ്യാപാര, നിക്ഷേപ, ബിസിനസ്, പ്രൊഫഷണൽ ബന്ധങ്ങൾ ശക്തിപ്പെടുത്തുന്നതിനായി ബിസിനസ് കൂടിക്കാഴ്ചകൾ, പ്രതിനിധിസംഘങ്ങളുടെ സന്ദർശനങ്ങൾ, വിവിധ സ്ഥാപനങ്ങളുമായുള്ള സഹകരണം, പ്രൊഫഷണൽ ആശയവിനിമയം എന്നിവയ്ക്ക് ഐബിപിസി വേദിയൊരുക്കുന്നു.