സർക്കാർ ആശുപത്രിയിൽ മരുന്ന് മറിച്ചുവിറ്റ് തട്ടിപ്പ്: ഈജിപ്ഷ്യൻ ഫാർമസിസ്റ്റിന് ഏഴ് വർഷം തടവും കനത്ത പിഴയും

കുവൈറ്റ് സിറ്റി: സർക്കാർ ആശുപത്രിയിൽ ജോലി ചെയ്യവെ ഔദ്യോഗിക പദവി ദുരുപയോഗം ചെയ്ത് ലക്ഷക്കണക്കിന് രൂപയുടെ മരുന്നുകൾ മറിച്ചുവിറ്റ ഈജിപ്ഷ്യൻ ഫാർമസിസ്റ്റിന് കുവൈറ്റ് അപ്പീൽ കോടതി കഠിനതടവ് വിധിച്ചു. ഏഴ് വർഷം തടവിനും 28,000 കുവൈറ്റ് ദിനാർ (ഏകദേശം 75 ലക്ഷത്തിലധികം രൂപ) പിഴയൊടുക്കാനുമാണ് കോടതി ഉത്തരവിട്ടത്. ശിക്ഷാ കാലാവധിക്ക് ശേഷം ഇയാളെ ജോലിയിൽ നിന്ന് പിരിച്ചുവിടാനും ഉത്തരവിൽ പറയുന്നു.

സർക്കാർ ഫണ്ടുകൾ വകമാറ്റൽ, ഔദ്യോഗിക രേഖകളിൽ കൃത്രിമം കാണിക്കൽ എന്നീ കുറ്റങ്ങൾ ഇയാൾക്കെതിരെ തെളിഞ്ഞു. ആശുപത്രിയിലെ മരുന്നുകൾ വ്യാജ കുറിപ്പടികൾ (Prescriptions) ഉപയോഗിച്ച് തട്ടിയെടുത്ത് പുറത്ത് വിൽപന നടത്തി വ്യക്തിപരമായ സാമ്പത്തിക ലാഭമുണ്ടാക്കുകയായിരുന്നു ഇയാളുടെ രീതി.

ആശുപത്രിയിലെ മരുന്നുകളുടെ സ്റ്റോക്കിൽ വലിയ കുറവ് അനുഭവപ്പെട്ടതിനെത്തുടർന്ന് നടത്തിയ ആഭ്യന്തര അന്വേഷണത്തിലാണ് തട്ടിപ്പ് പുറത്തായത്. ഗ്രോത്ത് ഹോർമോണുകൾ (Growth Hormones), മനഃശാസ്ത്രപരമായ ചികിത്സയ്ക്ക് ഉപയോഗിക്കുന്ന സൈക്കോട്രോപിക് മരുന്നുകൾ തുടങ്ങിയ വിലകൂടിയ മരുന്നുകളാണ് ഇയാൾ പ്രധാനമായും തട്ടിയെടുത്തത്. ഏകദേശം 14,000 ദിനാർ വിലമതിക്കുന്ന മരുന്നുകളുടെ കുറവാണ് ഓഡിറ്റ് കമ്മിറ്റി കണ്ടെത്തിയത്.

തുടർന്ന് നടത്തിയ വിശദമായ അന്വേഷണത്തിൽ, ഈ മരുന്നുകൾ കൈക്കലാക്കാൻ ഇയാൾ വ്യാജ മെഡിക്കൽ കുറിപ്പടികൾ നിർമ്മിച്ചതായി ക്രിമിനൽ ഇൻവെസ്റ്റിഗേഷൻ വിഭാഗം കണ്ടെത്തി. ഈ റിപ്പോർട്ടുകളുടെ അടിസ്ഥാനത്തിലാണ് കോടതി കർശനമായ ശിക്ഷാ നടപടികൾ സ്വീകരിച്ചത്. തട്ടിയെടുത്ത തുകയുടെ ഇരട്ടി തുകയാണ് പിഴയായി കോടതി ചുമത്തിയിരിക്കുന്നത്.

പൊതുമുതൽ നശിപ്പിക്കുന്നവർക്കും ഔദ്യോഗിക പദവി ദുരുപയോഗം ചെയ്യുന്നവർക്കും ഇതൊരു പാഠമാകുമെന്ന് കോടതി നിരീക്ഷിച്ചു.