കുവൈറ്റിൽ ഇൻഷുറൻസ് കമ്പനികൾക്ക് അപകടത്തിൽപ്പെട്ട വാഹനങ്ങളുടെ മൂല്യം പുനർനിർണയിക്കുന്നതിലും മാറ്റുന്നതിലും കർശ്ശന നിയന്ത്രണം ; ഉപഭോക്തൃ സംരക്ഷണം ശക്തമാക്കി കുവൈറ്റ് ഇൻഷുറൻസ് റെഗുലേറ്ററി യൂണിറ്റ്

കുൈവറ്റ് സിറ്റി: വാഹന അപകടങ്ങൾ സംഭവിച്ച ശേഷം ഇൻഷുറൻസ് കമ്പനികൾ വാഹനങ്ങളുടെ മൂല്യം തിരുത്തുന്നതിനും നഷ്ടപരിഹാര തുക ഏകപക്ഷീയമായി വെട്ടിക്കുറയ്ക്കുന്നതിനും വിലക്കേർപ്പെടുത്തി കുവൈറ്റ് ഇൻഷുറൻസ് റെഗുലേറ്ററി യൂണിറ്റ് പുതിയ ഉത്തരവിറക്കി. രാജ്യത്തെ സമഗ്ര വാഹന ഇൻഷുറൻസ് (Comprehensive Vehicle Insurance) മേഖലയിലെ സുതാര്യത ഉറപ്പാക്കാനും വാഹന ഉടമകളുടെ അവകാശങ്ങൾ സംരക്ഷിക്കാനും ലക്ഷ്യമിട്ടാണ് ഈ സുപ്രധാന തീരുമാനം.

അടിസ്ഥാന കവറേജിൽ ഇളവുകൾ അനുവദിക്കില്ല

പുതിയ നിർദ്ദേശപ്രകാരം, ഇൻഷുറൻസ് പോളിസിയുടെ അടിസ്ഥാന കവറേജിനെയോ പ്രധാന ഉദ്ദേശ്യത്തെയോ ബാധിക്കുന്ന തരത്തിലുള്ള നിബന്ധനകളോ ഇളവുകളോ ഉൾപ്പെടുത്താൻ കമ്പനികൾക്ക് അനുവാദമില്ല. അംഗീകൃത ആക്ചുവറിയുടെ നിർദ്ദേശാനുസരണമോ റെഗുലേറ്ററി ബോർഡിന്റെ മാനദണ്ഡങ്ങൾ അനുസരിച്ചോ മാത്രമേ പോളിസി നിരക്കുകൾ നിശ്ചയിക്കാവൂ. പോളിസി തുക നിർദ്ദിഷ്ട കുറഞ്ഞ പരിധിയിലും താഴാൻ പാടില്ല. കൂടാതെ പോളിസി നൽകുന്നതിന് മുൻപ് വാഹനങ്ങൾ നിർബന്ധമായും പരിശോധിച്ച് ഫോട്ടോകൾ എടുത്ത് സൂക്ഷിക്കണം. പോളിസി റദ്ദാക്കേണ്ടി വന്നാൽ ബാക്കിയുള്ള ഉപയോഗിക്കാത്ത കാലാവധിക്കുള്ള പ്രീമിയം തുക ഉപഭോക്താവിന് തിരികെ നൽകണം. ഇരു കക്ഷികളും ഒപ്പുവെച്ച രേഖാമൂലമുള്ള കത്തിലൂടെ മാത്രമേ പോളിസി റദ്ദാക്കൽ സാധുവാകൂ.

റിപ്പെയറിംഗ് കേന്ദ്രവും ടോട്ടൽ ലോസ് മാനദണ്ഡങ്ങളും

അപകടനഷ്ടം സംഭവിച്ച വാഹനം അംഗീകൃത ഡീലർഷിപ്പ് ഷോപ്പിലാണോ അതോ മറ്റ് വർക്ക്‌ഷോപ്പുകളിലാണോ റിപ്പയർ ചെയ്യുന്നതെന്ന് പോളിസിയിൽ കൃത്യമായി വ്യക്തമാക്കണം. വാഹനം പരിശോധിച്ച റിപ്പോർട്ടിന്റെ പകർപ്പ് പോളിസി ഉടമയ്ക്ക് നൽകേണ്ടതും നിർബന്ധമാണ്. സാങ്കേതികമായി പൂർണ്ണമായി നശിച്ച അവസ്ഥയിലോ (Technical Total Loss) അല്ലെങ്കിൽ സാമ്പത്തിക ലാഭമില്ലാത്ത തകരാറുകൾ ഉള്ളപ്പോഴോ (Economic Partial Loss) മാത്രമേ വാഹനം ‘ടോട്ടൽ ലോസ്’ ആയി തരംതിരിക്കാൻ പാടുള്ളൂ. തകരാറിലായ വാഹനത്തിന്റെ അവശിഷ്ടങ്ങൾ കൈകാര്യം ചെയ്യുന്നതിന് മുൻപ് അതിന്റെ മൂല്യം കൃത്യമായി വിലയിരുത്തി രേഖപ്പെടുത്തണം.

ക്യു.ആർ കോഡ് നിർബന്ധമാക്കി

ഇൻഷുറൻസ് പോളിസികളുടെ വിവരങ്ങൾ ഇലക്ട്രോണിക് സംവിധാനത്തിലൂടെ പരിശോധിച്ച് ഉറപ്പാക്കുന്നതിന് എല്ലാ പോളിസികളിലും ക്യു.ആർ (QR) കോഡ് നിർബന്ധമാക്കി. ഓരോ പോളിസിക്കും ഡിജിറ്റൽ റെക്കോർഡ് തയ്യാറാക്കി അത് ക്യു.ആർ കോഡുമായി ബന്ധിപ്പിക്കണം. സമഗ്ര ഇൻഷുറൻസ് പോളിസികളിൽ പുതിയ ക്യു.ആർ കോഡ് സംവിധാനം നടപ്പിലാക്കുന്നതിനായി കമ്പനികൾക്ക് 90 ദിവസത്തെ സാവകാശം നൽകിയിട്ടുണ്ട്. അപകടങ്ങൾക്ക് ശേഷമുള്ള തുക വെട്ടിക്കുറയ്ക്കലും മൂല്യനിർണ്ണയ തർക്കങ്ങളും ഇല്ലാതാക്കാൻ ഈ പുതിയ നിയമം സഹായിക്കും.